اسرائیل نے کہا ہے کہ پانچ تھائی شہریوں اور تین اسرائیلیوں کو جمعرات کو رہا کر دیا جائے گا۔
اسرائیلی وزیر اعظم بنجمن نیتن یاہو کے دفتر کا کہنا ہے کہ کل آٹھ اسیران جن میں تین اسرائیلی اور پانچ تھائی باشندے ہیں، جمعرات کو غزہ سے رہا کیے جانے والے ہیں۔
دفتر نے اسرائیلی اسیران کے نام بھی جاری کیے: اربیل یہود، اگام برجر، اور گاڈی موسی۔
حماس کے عہدیدار کا کہنا ہے کہ اسرائیل کی غزہ کو امداد کی فراہمی میں تاخیر سے یرغمالیوں کی رہائی متاثر ہو سکتی ہے اسرائیل غزہ کو امداد کی فراہمی میں جان بوجھ رکاوٹیں کھڑی کر رہا ہے۔
انہوں نے کہا کہ اسرائیل جنگ بندی اور یرغمالیوں کی رہائی کے معاہدے کو خطرے میں ڈال رہا ہے۔
حماس اب تک 7 اسرائیلیوں کو رہا کر چکا ہے جن کے بدلے 290 فلسطینی رہا ہوئے ہیں۔ حماس کی جانب سے مزید 3 اسرائیلی شہریوں کو کل رہا کیے جانے کا امکان ہے۔
ممبئی: معروف بھارتی فلمساز سورج برجاتیا نے سُپر اسٹار سلمان خان اور شاہد کپور میں موازنہ کرتے ہوئے اپنی رائے کا اظہار کر دیا۔
اگرچہ سلمان خان سورج برجاتیا کے ’ہم آپ کے ہیں کون‘ اور ’ہم ساتھ ساتھ ہیں‘ جیسے بہت سے پروجیکٹس کا حصہ رہے ہیں لیکن فلم ’ویواہ‘ کیلیے کاسٹنگ کی بات آئی تو انہوں نے شاہد کپور کا انتخاب کیا۔
سلمان خان کے بجائے شاہد کپور کا انتخاب کرنے کی وجہ یہ تھی کہ وہ ایسے اداکار کو شامل کرنا چاہتے تھے جو بظاہر معصوم اور جوان نظر آئے، لہٰذا شاہد کپور اور امریتا راؤ کو کاسٹ کیا گیا۔
حالیہ انٹرویو میں سورج برجاتیا نے کہا کہ فلم ’پریم کی دیوانی ہوں‘ کے فلاپ ہونے کے بعد سلمان خان نے مجھے فون کیا اور کہا ’چلو ساتھ میں کام کرتے ہیں‘، لیکن اُس وقت میرے پاس ان کیلیے فلم نہیں تھی جبکہ ’ویوا‘ ایک ایسی کہانی تھی جو والد نے مجھے دی تھی۔
انہوں نے بتایا کہ جب میں نے فیصلہ کیا کہ میں اسے بنانا چاہتا ہوں تو مجھے معلوم تھا کہ سلمان خان یہاں فٹ نہیں ہوں گے کیونکہ وہ ایک بڑے اسٹار ہیں، اس میں کردار کیلیے چہرے پر معصومیت اور جوانی چاہیے تھی جس کی وجہ سے شاہد کپور اور امرتا راؤ کو کاسٹ کیا۔
شاہد کپور نے حال ہی میں سورج برجاتیا سے اپنی محبت کا اظہار کرتے ہوئے کہا تھا کہ کس طرح فلمساز نے کیریئر کے مشکل وقت میں ان کا ساتھ دیا۔
اداکار نے بتایا کہ باکس آفس پر ناکامیوں کا سامنا کرنے کے باوجود سورج برجاتیا ان کے ساتھ کھڑے رہے۔
’فلمساز نے مجھ سے کہا ’اگر تم جانتے ہو کہ کیمرے کے سامنے کیا کرنا ہے تو بس وہ کرو باقی مجھ پر چھوڑ دو‘،اس وقت ’ویواہ‘ میری سب سے بڑی ہٹ فلم بنی۔ انہوں نے میرا ساتھ دیا اور اُس وقت انہیں مجھ پر بھروسہ تھا لہذا سورج برجاتیا اور فلم ہمیشہ میری بہترین یاد رہیں گے۔
فلم ’ویوا‘ 2006 کی سب سے زیادہ کمائی کرنے والی فلموں میں سے ایک تھی جس نے شاہد کپور کے تباہ ہوتے کیریئر کو سہارا دیا اور ساتھ میں امرتا راؤ کی فلموگرافی کی سب سے یادگار فلموں میں سے ایک ہے۔
افغانستان میں چھوڑے گئے ہتھیار واپس لینے کے امریکی فیصلے کے حوالے سے ترجمان دفترخارجہ کا ردعمل سامنے آگیا ہے۔
پاکستانی دفترخارجہ کے ترجمان نے اپنے بیان میں کہا کہ افغانستان سے امریکی انخلا کے بعد چھوڑے ہوئے ہتھیار پاکستان کی سلامتی کیلئے تشویش کا باعث ہیں، ٹی ٹی پی سمیت دہشتگرد تنظیمیں ہتھیار پاکستان کیخلاف استعمال کرتی رہی ہیں۔
دفترخارجہ کا مزید کہنا تھا کہ کابل میں حکام سے مطالبہ کررہے ہیں کہ ہتھیارغلط ہاتھوں میں نہ جانے کو یقینی بنائیں۔
خیال رہے کہ افغانستان سے نکلنے کے دوران امریکی افواج نے اپنے تمام ہتھیار بیکار کرکے وہیں چھوڑنے کو ترجیح دی تھی، تاہم طالبان حکومت کے بعد ان ہتھیاروں کو استعمال میں لیاگیا ہے۔
امریکی فوج کے چھوڑے گئے ہتھیاروں اور فوجی سازوسامان میں بلیک ہاک ہیلی کاپٹر، لڑاکا طیارے اور ٹینک، ملٹری کی بکتر بند گاڑیاں، چھوٹے اور بڑے ہتھیار سمیت بہت کچھ شامل تھا۔
پاکستان کے سابق کرکٹر تنویر احمد نے ہوم سیریز میں ویسٹ انڈیز کے خلاف ٹیسٹ میچ میں شکست پر اپنے خیالات کا اظہار کیا ہے۔
سابق پیسر تنویر احمد کا سرکاری چینل پر گفتگو کرتے کہنا تھا کہ اتنی گندی کرکٹ ہم نے کھیلی، ایسی کرکٹ ہم نے کھیلی یا کھلائی جارہی ہے، اگر آپ مجھ سے پوچھیں تو میں بولوں گا کہ زبردستی کھلائی جارہی ہے۔
تنویر احمد کا ماننا ہے کہ ویسٹ انڈیز کے خلاف ٹیسٹ میچ میں شکست کے ذمہ دار کرکٹرز نہیں بلکہ ہیڈ کوچ اور سیلکٹرز ہیں۔
انھوں نے کہا کہ ہمارے ہاں جس قسم کی پچز بنائی جارہی ہیں، میں پہلے بھی کہہ چکا ہوں کہ اگر ہماری بیٹنگ فلاپ ہوئی یا ہمارے بیٹر کچھ نہیں کریں گے تو اس کا پورا پورا ذمہ دار ہیڈ کوچ ہے،
پاکستان کے سابق فاسٹ بولر کا پچ کی وجہ سے شکست پر تبصرہ کرتے ہوئے مزید کہنا تھا کہ آپ کے سیلکٹرز اس کے ذمہ دار ہیں جنھوں نے اس قسم کی پچز بنائیں۔
کراچی: پاکستانی نوجوان کی محبت میں گرفتار امریکی خاتون نے بالآخر اُس لڑکے کا گھر ڈھونڈ لیا جس سے وہ شادی کرنا چاہتی ہیں۔
امریکی خاتون مبینہ طور پر شادی کا جھانسہ دینے والے نوجوان سے شادی کیلیے کراچی میں موجود ہیں۔ آج انہوں نے گارڈن میں اُس لڑکے کا گھر ڈھونڈ لیا اور بلڈنگ کی پارکنگ میں موجود ہیں۔
اپارٹمٹ کی یونین کی جانب سے ان کو واپس جانے کا کہا جا رہا ہے لیکن وہ انکاری ہیں۔
انہوں نے میڈیا سے گفتگو میں فرمائش کی کہ مجھے پاکستانی پاسپورٹ اور ہر ہفتے 2 ہزار ڈالر چاہئیں۔ صحافی نے سوال کیا کہ آپ یہاں کیا کر رہی ہیں اور پرواز کیوں نہیں لی؟ تو انہوں نے جواب دیا کہ میں یہاں گھوم رہی ہوں اس سے تمہیں کیا مطلب؟
مبینہ طور پر ان کو کراچی کے 19 سالہ نوجوان نے شادی کا جھانسہ دے کر پاکستان بلایا ہے۔ گزشتہ روز خاتون کا کہنا تھا کہ یہاں شادی کرنے آئی ہوں اور شادی کر کے ہی رہوں گی۔
امریکی خاتون کے واپسی سے انکار پر امریکی قونصل خانے کی 2 رکنی ٹیم کراچی ایئرپورٹ پہنچی تھی اور ایئرپورٹ حکام اور خاتون اونیجا سے ملاقات کی تھی۔
ایئرپورٹ حکام نے بتایا تھا کہ اونیجا تاحال واپس جانے سے انکاری ہیں اور احمد میمن نامی لڑکے سے ملنا چاہتی ہیں۔
قونصل خانے کی ٹیم کا کہنا تھا کہ اگر خاتون نہ جانا چاہے تو زبردستی نہیں کر سکتے کیونکہ ایسا کرنا غیر قانونی ہوگا اور زبردستی بھیجا تو خاتون وہاں امریکی حکومت اور قونصل خانے پر کیس کر سکتی ہیں۔ کوشش یہی ہے کہ اونیجا کو راضی کر کے واپس بھیجا جائے۔
بعد ازاں اونیجا نوجوان کی تلاش میں ایئرپورٹ سے روانہ ہوگئی تھیں، ایئرپورٹ انتظامیہ اور ویجلنس نے خاتون کو ٹیکسی کروا کے روانہ کیا تھا۔
وزارت داخلہ نے ان کے ویزے میں 12 فروری 2025 تک توسیع کر رکھی ہے۔
بھارتی پیسر محمد سراج اور بالی ووڈ اداکارہ ماہرہ شرما کی دوستی کی خبروں سے متعلق ایک بھارتی اخبار نے بڑا انکشاف کیا ہے۔
ٹائمز آف انڈیا نے اپنی رپورٹ میں دعویٰ کیا ہے کہ محمد سراج اداکارہ ماہرہ شرما کے ساتھ رومانوی تعلقات میں ہیں، ان کے قریبی ذرائع کا کہنا ہے کہ دونوں ڈیٹنگ کررہے ہیں اور ایک دوسرے کو بہتر طور پر جاننے کی کوشش کررہے ہیں۔
تاہم اب تک نہ ہی محمد سراج اور نہ ہی ماہرہ شرما کی جانب سے اپنے تعلق کی تصدیق یا تردید کی گئی ہے، دونوں کی درمیان دوستی کی خبریں نومبر 2024 میں میڈیا کی زینت بنی تھیں۔
سوشل میڈیا صارفین نے نوٹس کیا تھا کہ بھارتی کرکٹر محمد سراج نے انسٹاگرام پر ماہرہ شرما کی کچھ تصاویر کو لائیک کیا تھا جس کے بعد دنوں کی دوستی کی خبروں نے زور پکڑا تھا۔
ان خبروں کے سامنے آنے سے قبل ماہرہ شرما ساتھی اداکار پارس چھابڑا کے ساتھ تعلقات میں تھیں دونوں کی ملاقات بگ باس 13 کے گھر میں ہوئی تھی۔
تاہم دونوں کی دوستی 2023 میں اختتام کو پہنچ گئی تھی جب ماہرہ شرما نے پارس کو انسٹاگرام سے ان فالو کردیا تھا، بعدازاں پارس نے تصدیق کی تھی کہ ان میں بریک اپ ہوگیا ہے۔
مصر کے صدر نے غزہ سے فلسطینیوں کو بےدخل کر کے اپنے ملک میں بسانے سے متعلق ٹرمپ کے مطالبات کو مسترد کر دیا۔
مصری صدر عبدالفتاح السیسی نے ایک نیوز کانفرنس سے خطاب کرتے ہوئے کہا کہ مصر فلسطینیوں کی نقل مکانی میں کوئی کردار ادا نہیں کرے گا اور ان کی بےدخلی "ناانصافی” اور مصر کی سلامتی کے لیے خطرہ ہے۔
امریکی صدر ڈونلڈ ٹرمپ کی جانب سے اردن اور مصر کی طرف سے فلسطینیوں کو غزہ سے پاک کرنے میں مدد کی تجویز پر السیسی نے کہا کہ مصری عوام، اگر میں ان سے کہوں گا کہ وہ [فلسطینیوں کو مصر جانے کو قبول کریں]، تو وہ سب سڑکوں پر نکل آئیں گے اور مجھ سے کہیں گے نہیں۔۔ میں اس ناانصافی میں شریک نہ ہوں۔
ان کا کہنا تھا کہ میں واضح طور پر کہتا ہوں فلسطینی عوام کو ان کی سرزمین سے بے گھر کرنا ایک ناانصافی ہے جس میں ہم حصہ نہیں لیں گے۔
انہوں نے کہا کہ مصر اسرائیلیوں اور فلسطینیوں کے لیے دو ریاستی حل کے لیے پُرعزم ہے اور اسے حاصل کرنے کے لیے ٹرمپ کے ساتھ مل کر کام کرنے کو تیار ہے، اس مسئلے کا حل دو ریاستی حل ہے جس کا مطلب ایک فلسطینی ریاست کا قیام ہے یہ تاریخی حقوق ہیں جن سے تجاوز نہیں کیا جا سکتا۔
مصر سمیت عرب ریاستوں نے طویل عرصے سے فلسطینیوں کو غزہ سے ملنے سے انکار کیا ہے، اس علاقے کو وہ مستقبل کی فلسطینی ریاست میں شامل کرنا چاہتے ہیں۔
لاہور کی شادمان کالونی سنٹرل جیل کو مسمار کر کے بنائی گئی۔ سنٹرل جیل کے آخری قیدیوں میں بہت سے سیاسی اور دینی اکابرین شامل تھے۔ مولانا مجاہد الحسینی بھی ان میں شامل تھے۔ اپنے زمانۂ اسیری میں مولانا کی سبطِ حسن سے جیل میں شناسائی ہوئی اور ان میں استاد اور شاگرد کا تعلق بھی بن گیا۔
مولانا مجاہد الحسینی نے نامور ترقی پسند دانش ور، ادیب اور صحافی سید سبطِ حسن سے اپنے اسی تعلق کی یادوں کو قلم بند کیا جس سے ایک پارہ قارئین کی دل چسپی کے لیے پیش ہے۔ وہ لکھتے ہیں:
سید سبطِ حسن بھی سیفٹی ایکٹ کے تحت گرفتار دیوانی احاطے میں آگئے تھے۔ وہاں استادی، شاگردی کے ادب و آداب کے تحت اربابِ جیل نے خصوصاً ہمارے لئے چارپائیوں کا انتظام کر دیا تھا، چونکہ رات کے مرحلے میں کسی نئے قیدی کے لئے چارپائی کا فوراً انتظام مشکل تھا، سید سبط حسن ہم زندانیوں میں سے کسی سے بھی متعارف نہیں تھے، مَیں نے ان کی تحریروں مطالعہ کیا تھا، روزنامہ امروز میں ان کے مضامین شریک اشاعت ہوتے رہتے تھے، اس لئے میں نے خندہ پیشانی کے ساتھ ان کا خیر مقدم کیا، اپنا تعارف کرایا تو انہوں نے میری بابت احمد ندیم قاسمی اور حمید ہاشمی (نواسہ مولانا احمد سعید دہلوی) مدیرانِ امروز سے جو چند اچھے کلمات سنے ہوں گے، ان کے حوالے سے کہا کہ آپ سے غائبانہ تو متعارف تھا، آج ملاقات سے مسرت ہوئی اور وہ بھی جیل خانے میں۔
اس پر میں نے کہا:”دنیا میں جیل ٹھکانہ ہے آزاد منش انسانوں کا“…. مصرع سنتے ہی متانت آمیز مسکراہٹ کے ساتھ کہا: خوب، اچھا ذوق ہے، پھر میں نے حضرت امیر شریعت سید عطاءاللہ شاہ بخاریؒ اور دوسرے بزرگوں سے ان کا تعارف کرایا، تو انہوں نے بھی دعائیہ کلمات کے ساتھ سبط حسن صاحب کا خیر مقدم کیا، اس وقت جیل کے اس مسافر خانے میں جو کچھ میسر تھا، پیش کیا، چائے نوشی کے دوران میں نے فتح دین نامی مشقتی سے سرگوشی کی صورت میں کہا کہ میری چارپائی پر سبط حسن صاحب کا بستر بچھا دو اور میرا بستر گارڈینا کی اوٹ میں زمین پر بچھا دیا جائے، جس کی تعمیل کی گئی۔
بعد ازیں ہم اپنے معمولات و عبادات سے فارغ ہو کر اپنے بستروں کی جانب راغب ہوئے اور سبط حسن صاحب کو ان کی آرام گاہ کی نشان دہی کی گئی تو انہوں نے دیگر حضرات کے ساتھ میری چار پائی مفقود دیکھ کر مشقتی سے دریافت کیا وہ کہاں ہے؟….اس نے گارڈینے کی اوٹ میں، اشارے کے ساتھ نشان دہی کی تو سبط حسن صاحب نے میرے پاس آتے ہی مستعّجب ہو کر کہا: یہ کیا؟
میں نے کہا، میری کمر میں کھنچاؤ محسوس ہوتا ہے، زمین پر لیٹنے سے راحت ملے گی۔ بایں ہمہ، سبط حسن صاحب نے مجھے اپنی چارپائی پر آرام کرنے پر اصرار کیا، مگر میرا عذر غالب آگیا اور میں نے انہیں بازو سے پکڑ کر چارپائی پر بٹھا دیا، چنانچہ حسنِ خُلق کا یہی مظاہرہ میرے اور سید سبط حسن کے درمیان گہرے تعلق خاطر کا موجب بن گیا تھا۔ پھر ڈپٹی سپرنٹنڈنٹ جیل امتیاز نقوی کے ساتھ وہ بھی حصول تعلیم قرآن کی سعادت پر آمادہ ہوگئے تھے، چنانچہ انہیں ابتدائی تعلیم عربی کی چھوٹی کتب سے متعارف کرایا گیا، حتیٰ کہ آیاتِ قرآن کے ترجمے اور بعد ازاں عربی گفتگو میں دسترس اور مہارت پیدا کرنے کی کوشش کی گئی تھی۔ اسی دوران میں نے ان سے انگریزی زبان کی تعلیم پانے کا آغاز کیا، جس پر ہم دونوں میں استاد، شاگرد کا تعلق استوار ہوگیا تھا۔
ممبئی: معروف بھارتی گلوکار و اداکار ہمیش ریشمیا اداکاری سے طویل وقفے کے بعد ایکشن فلم ’بیڈ ایس روی کمار‘ سے اسکرین پر واپس آ رہے ہیں۔
انڈین میڈیا کی رپورٹس کے مطابق 6 جنوری 2025 کو جاری ’بیڈ ایس روی کمار‘ کے ٹریلز میں ہمیش ریشمیا کو فلم ’دی ایکسپوز‘ سے ’روی کمار‘ کے کردار کو دہراتے ہوئے دکھایا گیا۔
اب فلمسازوں نے ڈائیلاگ پرومو جاری کیا ہے جس نے فلم کے منتظر شائقین کا جوش مزید بڑھا دیا۔ ہمیش ریشمیا نے اپنے آفیشل انسٹاگرام اکاؤنٹ سے نیا ٹیزر جاری کیا۔
ٹیزر میں ہمیش ریشمیا اور ان کے دشمن کا سامنا ہوتا ہے جس میں وہ منفرد ڈائیلاگز کا تبادلہ کرتے ہیں۔ اس سے قبل ٹریلر میں کردار ’روی کمار‘ خطرناک اسٹنٹ کرتے ہوئے عمارتوں سے چھلانگ لگاتے ہوئے نظر آتا ہے۔
مداحوں کی جانب سے ڈائیلاگز کی خوب تعریف کی جا رہی ہے۔ فلم کے ڈائیلاگ کے علاوہ گانے ’تندوری ڈیز‘ اور ’دل کے تاج محل میں‘ بھی پہلے ہی دھوم مچا چکے ہیں۔
مرکزی کردار میں ہمیش ریشمیا اور پربھو دیوا کے ساتھ سنجے مشرا، جانی لیور، کیرتی کلہاری، منیش وادھوا، انیل جارج اور بھی شامل ہیں۔
امریکی بحریہ نے چینی کمپنی ڈیپ سیک کا مصنوعی ذہانت کا ماڈل استعمال کرنے سے روک دیا ہے۔
مصنوعی ذہانت کی دنیا میں ایک اور چیٹ باٹ آگیا، چینی کمپنی کی ایپ ڈیپ سیک نے دنیا بھر میں دھوم مچادی۔
چینی ایپ کے لانچ ہوتے ہی امریکا اور یورپ میں ہلچل مچ گئی ، ایک ہفتے میں امریکا میں چینی ایپ کو سب سے زیادہ ڈاؤن لوڈ کیا گیا، جس سے امریکا اور یورپ کی ٹیک کمپینز نے سرپکڑ لئے۔
امریکا میں چینی ڈیپ سیک کی اچانک مقبولیت کے بعد اسٹاک ایکسچینج میں ٹیکنالوجی کمپنیوں کے شئیرز گرگئے۔
امریکی صدر ٹرمپ نے بھی ڈیپ سیک ایپ کو خطرناک قرار دے دیا اور تنبیہ کرتے ہوئے کہا اتنی سستی چینی ایپ کی لانچنگ کے بعد ہماری انڈسٹری کو جاگ جانا چاہیے۔
اب امریکی بحریہ نے بھی چینی ڈیپ سیک کے استعمال پر پابندی عائد کرتے ہوئے متعلقین کو سخت ہدایات جاری کر دی ہیں۔ امریکی بحریہ کے اہلکاروں کو جاری مراسلے میں کہا گیا ہے کہ ڈیپ سیک کا آرون ماڈل کسی بھی کام کیلئے استعمال نہ کیا جائے۔
امریکی کمپنی اوپن اے آئی کے مالک کا کہنا ہے چینی ایپ متاثر کن ہے تاہم، ہم اس سے مقابلہ کرنے کیلئے تیار ہیں۔
خیال رہے ڈیپ سیک اے آئی چیٹ باٹ ہے، جو صرف چھ ملین ڈالر کی لاگت سے تیار ہوئی ہے، چینی کمپنی نے دعویٰ کیا کہ یہ ایپ حساب، کوڈنگ اور دیگر معاملات میں اوپن اے آئی کے جدید ترین ماڈل سے مقابلہ کرسکتی ہے۔
