اسلام آباد: ترجمان دفتر خارجہ عائشہ فاروقی کا کہنا ہے کہ کرونا وائرس کے پیش نظر مقبوضہ کشمیر میں شہریوں کو بنیادی سہولتوں تک رسائی دی جائے۔

تفصیلات کے مطابق ترجمان دفتر خارجہ عائشہ فاروقی نے میڈیا سے گفتگو کرتے ہوئے کہا کہ پاکستان کو مقبوضہ کشمیر میں صورتحال پر سخت تشویش ہے، مقبوضہ کشمیر میں بھارتی حکومت فوری کمیونی کیشن لاک ڈاؤن ختم کرے۔

ترجمان دفتر خارجہ نے کہا کہ کرونا وبا سے نبرد آزما ہونے کے لیے وسائل بروئے کار لارہے ہیں، وزیر خارجہ چیلنج سے نمٹنے کے لیے مختلف وزرائے خارجہ سے رابطے میں ہیں، سارک وزرائے صحت ویڈیو کانفرنس کے انعقاد کے خواہاں ہیں۔

عائشہ فاروقی نے کہا کہ کرونا وائرس سے پاکستان سمیت پوری دنیا کو چیلنج کا سامنا ہے، دفتر خارجہ میں ایمرجنسی سینٹر مسلسل کام کررہا ہے، کرائسز مینجمنٹ سیل، دفتر خارجہ، پاکستانی مشنز رابطے میں ہیں۔

مزید پڑھیں: کورونا وائرس پر قومی سیاسی لائحہ عمل، پارلیمانی کمیٹی تشکیل

انہوں نے کہا کہ دنیا بھر میں ایئرپورٹس پر پھنسے پاکستانیوں کی واپسی کے لیے کام کررہے ہیں، سعودی عرب، یو اے ای، قطر کے علاوہ بنکاک سے پاکستانی واپس لائے گئے ہیں۔

ترجمان دفتر خارجہ کا کہنا ہے کہ روم میں پھنسے پاکستانیوں کو ہمارے مشن نے واپس ان کے گھروں تک پہنچایا ہے۔

عائشہ فاروقی کا کہنا تھا کہ وزیر خارجہ نے مختلف ممالک کے وزرائے خارجہ سے فون پر رابطے کیے ہیں، شاہ محمود قریشی نے کرونا وائرس سے نمٹنے کے لیے مشترکہ حکمت عملی پر زور دیا ہے۔

ان کا کہنا تھا کہ وزیر خارجہ نے سارک وزرا صحت کی جلد ویڈیو کانفرنس پر زور دیا، شاہ محمود قریشی نے فرانس، جرمن وزرائے خارجہ سے ایران پر پابندیوں کا معاملہ بھی اٹھایا۔

لاہور: گورنر پنجاب چوہدری محمد سرور کا کہنا ہے کہ کرونا سے بچاؤ کے لیے عوام کوگھروں میں رکھنے کے لیے سختی کریں گے۔

تفصیلات کے مطابق صوبائی دارالحکومت لاہور میں گورنر پنجاب چوہدری محمد سرور سے فارماسیوٹیکل ایسوسی ایشن کے وفد نے ملاقات کی۔ فارماسیوٹیکل ایسوسی ایشن نے سینی ٹائزرز ،کلوروکوئن انجکشن عطیہ کیے۔

بعدازاں گورنر پنجاب چوہدری محمد سرور نے میڈیا سے گفتگو کرتے ہوئے کہا کہ کرونا سے بچاؤ کے لیے عوام کوگھروں میں رکھنے کے لیے سختی کریں گے۔

چوہدری محمد سرور کا کہنا تھا کہ خدا کے لیے عوام حالات کو سنجیدہ لیں، کوتاہی کی گنجائش نہیں ہے۔ انہوں نے کہا کہ 10 ہزار سینی ٹائزر، 12 ہزار کلوروکوئن انجکشن ڈاکٹرز کو دیے جا رہے ہیں۔

گورنر پنجاب کا کہنا تھا کہ 20 ہزار راشن کے پیکٹ بھی عطیہ کے طور پر جمع ہو چکے ہیں،مستحق افراد میں راشن کی تقسیم شروع کی جا رہی ہے۔

کرونا سے نمٹنے کےلیے چین کا پاکستان میں طبی ماہرین بھیجنے کا اعلان

دوسری جانب کرونا وائرس سے نمٹنے کے لیے چین نے پاکستان میں طبی ماہرین کی ٹیم بھیجنے کا اعلان کر دیا۔

واضح رہے کہ پاکستان میں بھی کورونا وائرس کی وبا تیزی سے پھیل رہی ہے اور متاثر افراد کی تعداد 1106 تک جا پہنچی ہے ، سب سے زیادہ کیسز صوبہ سندھ میں رپورٹ ہوئے جبکہ وائرس سے اب تک 8 افراد جاں بحق اور 21 مریض صحت یاب ہوچکے ہیں۔