ملتان : نشتر اسپتال ملتان سے اغوا کئے گئے بچے کو بازیاب کراکر خاتون کو گرفتار کرلیا گیا، اغوا کی منصوبہ بندی میں پرائیویٹ اسپتال کی ڈاکٹر بھی شامل تھی۔

تفصیلات کے مطابق ملتان میں 2 دن قبل نشتر اسپتال سے اغوا کئے جانے والے نومولود بچے کو بازیاب کرالیا گیا۔

پولیس نے بتایا کہ فوٹیج اور تکنیکی وسائل کا استعمال کر کے اغوا کار خاتون کو تلاش کرکے گرفتار کیا۔

پولیس کا کہنا تھا کہ بچے کے اغوا کی منصوبہ بندی میں پرائیویٹ اسپتال کی ڈاکٹربھی شامل تھیں تاہم منصوبہ بندی میں شامل ڈاکٹرکی گرفتاری کیلئے چھاپے مارے جارہے ہیں۔

مزید پڑھیں : نشتر اسپتال ملتان سے نامعلوم خاتون نومولود بچہ اغوا کرکے فرار

یاد رہے دو روز قبل ملتان میں نشتر اسپتال وارڈ نمبر 16 سے نامعلوم خاتون نے نومولود کو اغوا کرلیا تھا،

کبیر والا کے رہائشی ستار کے ہاں گزشتہ روز بچے کی پیدائش ہوئی تھی، والد نے بتایا تھا کہ نامعلوم خاتون بیٹے کی پیدائش پر مبارک باد دینے آئی تھی اور بچہ اٹھا کر پیار کرنے لگی، جس کے بعد نامعلوم خاتون بچے کو اپنے شوہر کو دکھانے وارڈ کے دروازے تک لے گئی اور موقع پا کر بچے کو لیکر فرار ہوگئی۔

پولیس کا کہنا تھا کہ مغوی بچے کے والد کی درخواست پرتھانہ کینٹ میں مقدمہ درج کرکے تحقیقات شروع کردی ہے۔

اسلام آباد : مدارس رجسٹریشن بل پر صدر کے اعتراضات پر جے یو آئی کا ردعمل سامنے آگیا، نے کہا بلی تھیلے سے باہرآگئی ہے اور ثابت ہوگیا یہ پارلیمنٹ پاکستان کی نہیں ایف اے ٹی ایف کی ہے۔

تفصیلات کے مطابق صدر مملکت آصف زرداری کے دینی مدارس رجسٹریشن بل پر اعتراضات پر جے یو آئی رہنما حافظ حمداللہ نے ردعمل دیتے ہوئے کہا پارلیمنٹ کے پاس کردہ بل پر صدر کے اعتراضات سے بلی تھیلے سے باہر آگئی۔

حافظ حمد اللہ کا کہنا تھا کہ ثابت ہوا اصل مقصد مدارس کوایف اےٹی ایف کے کہنے پر اس کے حوالے کرنا ہے، ثابت ہوگیا یہ پارلیمنٹ پاکستان کی نہیں ایف اےٹی ایف کی ہے۔

انھوں نے سوال کیا کہ کیاایف اےٹی ایف ڈکٹیٹ کرے گا کون سا ادارہ کس قانون کے تحت کام کرے گا؟ قوم پر واضح ہوگیا پارلیمنٹ قانون سازی میں آج بھی آزاد نہیں۔

مزید پڑھیں : مدارس رجسٹریشن بل : صدر آصف زرداری کے اعتراضات کی تفصیلات سامنے آگئیں

رہنما جے یو آئی نے کہا کہ ایوان صدر کے بابوؤں نے سوسائیٹیز ایکٹ پڑھا ہی نہیں ، یہ سوسائیٹیز ایکٹ پڑھتے تو اعتراضات اٹھانے کی نوبت ہی نہیں آتی، کیا سوسائیٹیز  ایکٹ کا قیام فائن آرٹس کے لئے ہیں؟

ان کا مزید کہنا تھا کہ ایوان صدر قوم کو بتائے آج تک فائن آرٹس کے ادارے کتنے ہیں، فائن آرٹس کے ادارے آٹے میں نمک کے برابر بھی نہیں۔

فیصل آباد: فیصل آباد ایئرپورٹ پر مسافروں کی جعلی ویزے پر کینیڈا جانے کی کوشش ناکام بنادی گئی اور گرفتار کرکے تفتیش شروع کردی ہے۔

تفصیلات کے مطابق فیصل آباد ایئرپورٹ پر ایف آئی اے نے جعلی ویزوں پر کینیڈا جانے کی کوشش کرنے والے دو مسافروں کو گرفتار کر لیا۔

منڈی بہاؤالدین کا رہائشی نواز اور سرگودھا کا احمد شیر فیصل آباد ایئرپورٹ سے نجی ایئرلائن کی پرواز کے ذریعے دبئی کے راستے کینیڈا جانے کی کوشش کر رہےتھے۔

ایف آئی اے امیگریشن کاؤنٹر پر پاسپورٹس کی چیکنگ کے دوران دونوں مسافروں کے ویزے جعلی پائے گئے۔

ایف آئی اے عملے نے ملزمان نواز اور احمد شیر کو گرفتار کر کے مزید قانونی کارروائی کرنے اور جعلی ویزے فراہم کرنے والے ایجنٹوں کی نشاندہی کے سلسلے میں تفتیش کے لئے ایف آئی اے سرکل دفتر منتقل کر دیا ہے۔

یاد رہے چند ماہ قبل ایف آئی اے امیگریشن نے اسلام آباد ائیرپورٹ پر بڑی کارروائی کرتے ہوئے عمرے پر جانے والے 4 مسافروں سے جعلی ویزے برآمد کرلئے تھے۔

ایف آئی اے کے مطابق ملزمان فلائٹ نمبر ER801 کے ذریعے عمرے ویزے پر سعودی عرب جا رہے تھے، دوران تلاشی ملزمان کے قبضے سے اٹلی اور لتھونیا کے جعلی ویزے برآمد کئے۔