پادشاہ بیگم کے خطابِ پرشکوہ سے سرفراز ہونے والوں میں پہلی خاتون مغل سلطنت کے بانی ظہیر الدین بابر کی ملکہ ماہم بیگم تھیں جب کہ آخری مقتدر پادشاہ بیگم ملکہ الزّمانی تھیں۔ وہ مغل شہنشاہ محمد شاہ کی زوجہ تھیں۔ 14 دسمبر 1789ء میں ملکہ الزمانی کا انتقال کرگئی تھیں۔

یہ عالی شان شاہی خطاب حاصل کرنے والی بیگم ملکہ الزمانی خاتونِ اوّل یا سلطنتِ مغلیہ کی ملکہ تھیں اور اس خطاب نے مغل حرم میں اُن کی حیثیت سب پر نمایاں اور واضح کردی تھی۔

ہندوستان کی تاریخ ایسے واقعات سے بھری ہوئی ہے کہ شاہی خاندان کی عورتوں نے خواہ وہ ملکہ ہوں یا شہزادیاں سلطنت کے امور اور سیاست پر گہرا اثر ڈالا اور بلاواسطہ نہ سہی لیکن بالواسطہ ملک پر حکومت کی۔ مؤرخین نے اس ضمن میں ملکہ نور جہاں، چاند بی بی اور ملکہ حضرت محل کے ساتھ کئی دوسری شاہی بیگمات کے نام لیے ہیں۔ یہ خواتین محلاتی سازشوں میں بھی پیش پیش رہا کرتی تھیں اور ان کا مقصد اپنے بیٹوں کو مسندِ شاہی تک پہنچانا ہوتا تھا۔ اس کے لیے سازشیں رچانے کے ساتھ قتل تک کیے گئے، لیکن انہی میں بعض خواتین نے ملک کی سرحدوں کو وسعت دینے اور اپنے فہم و فراست سے کام لے کر جھگڑے نمٹانے میں بھی اہم کردار ادا کیا۔ ہندوستان کی شاہی بیگمات میں کچھ ایسی بھی ہیں جنھوں نے علم و ادب اور فن و ثقافت کے فروغ میں‌ بڑا کردار ادا کیا اور خود بھی شاعرہ اور نثر نگار تھیں۔

سلطنتِ مغلیہ کی بیگم ملکہ الزمانی نے مغل شہنشاہ محمد شاہ کی زوجیت کے ساتھ تاریخ میں‌ بحیثیت مغل ملکہ 26 سال حکومت کرنے والی بڑی زیرک خاتون کے طور پر جگہ پائی۔ انھوں نے ہندوستان کی تاریخ کے کئی نشیب و فراز دیکھے۔ پادشاہ بیگم کی پیدائش 1703ء میں بنگال صوبہ میں ہوئی۔ اُس وقت ہندوستان پر اورنگزیب عالمگیر کی حکومت قائم تھی۔ بادشاہ بیگم کے والد فرخ سیر تھے جو بعد ازاں مغل شہنشاہ بنے۔ پادشاہ بیگم کی والدہ گوہر النساء بیگم تھیں۔ پادشاہ بیگم کا خطاب پانے والی مغل ملکہ کو اعلیٰ تعلیم دی گئی اور انھیں ذہین اور عالی دماغ لکھا گیا ہے جو اپنے شوہر محمد شاہ کے دور میں سیاسی و خارجی معاملات میں شریک رہیں۔ ان کا نکاح 1721ء میں محمد شاہ سے ہوا۔ نکاح کے بعد پہلے وہ ملکہ الزمانی کہلائیں اور پھر پادشاہ بیگم کا خطاب پایا۔ پادشاہ بیگم کا ایک فرزند شہریار شاہ بہادر متولد ہوا مگر وہ کم سنی میں انتقال کرگیا اور اس کے بعد کوئی اولاد نہ ہوئی۔ مغل شہنشاہ محمد شاہ کو قدسیہ بیگم کے بطن سےایک بیٹا احمد شاہ بہادر عطا ہوا اور اس کی تربیت ملکہ الزمانی نے کی اور محمد شاہ کی وفات کے بعد احمد شاہ بہادر کو تخت نشیں کروایا۔ یہ سیاسی طور پر ایک منظم حکمت عملی تھی جسے بیگم ملکہ الزمانی نے نبھایا۔

پادشاہ بیگم سلطنت مغلیہ کے زوال کے دور میں وہ آخری ملکہ تھیں جن کو مکمل اختیار و اقتدار میسر رہا۔ وہ دربارِ شاہی، عدالتی نظام اور سیاسی معاملات میں بااقتدار ملکہ تھیں جن کی رائے واجب الاحترام سمجھی جاتی تھی۔ وہ محمد شاہ کے ابتدائی دورِ حکومت ہی میں نظام سلطنت سے وابستہ ہو گئی تھیں اور معاملات و انتظامات میں اپنی رائے دیتی تھیں۔ بعد میں پادشاہ بیگم کے خطاب سے سرفراز ہونے پر اُن کا اثر رسوخ بہت بڑھ گیا۔ 1748ء سے 1789ء تک وہ مغل دربار کی معزز ترین بزرگ ملکہ تصویر کی جاتی تھیں اور ان کو بہت عزت و احترام حاصل تھا۔

بیگم ملکہ الزمانی نے دہلی کے لال قلعہ میں وفات پائی اور پرانی دہلی کے تیس ہزاری باغ میں ان کی تدفین کی گئی۔

بھارتی ساؤتھ انڈین فلم اسٹار الو ارجن کی گرفتاری پر متاثرہ خاندان کا بیان سامنے آگیا ہے۔

بھارتی میڈیا رپورٹ کے مطابق سپر اسٹار الو ارجن کی گرفتاری اور عبوری ضمانت کے بعد متاثرہ خاندان کا کہنا ہے کہ وہ کیس واپس لینا چاہتے ہیں۔

آنجہانی ریوتی کے شوہر، بھاسکر نے میڈیا سے گفتگو کرتے ہوئے کہا کہ ’میں مقدمہ واپس لینے کے لیے تیار ہوں، مجھے گرفتاری کے بارے میں علم نہیں تھا اور الو ارجن کا اس بھگدڑ سے کوئی تعلق نہیں جس میں میری بیوی کی موت ہوئی تھی۔

انہوں نے کہا کہ وہ اس دن سندھیا تھیٹر گئے تھے کیونکہ ان کا بیٹا فلم دیکھنا چاہتا تھا لیکن یہ الو ارجن کی غلطی نہیں کہ وہ تھیٹر میں تھے۔

بھاسکر نے مزید کہا کہ پولیس نے انہیں اداکار کی گرفتاری کے بارے میں مطلع نہیں کیا تھا، ان کی گرفتاری کے بارے میں فون پر ایک نیوز اپ ڈیٹ سے پتا چلا جب میں اسپتال میں تھا، الو ارجن کا واقعے سے کوئی تعلق نہیں تھا اور میں کیس واپس لینے کے لیے تیار ہوں۔

واضح رہے کہ حیدر آباد میں فلم ’پشپا 2‘ کے پریمیئر کے دوران بھگدڑ کے نتیجے میں ہونے والی ہلاکت کے معاملے میں الو ارجن کو گرفتار کیا گیا ہے۔

رپورٹ کے مطاق خاتون کی ہلاکت کا افسوسناک واقعہ 4 دسمبر کو حیدرآباد کے تھیٹر میں پیش آیا تھا، پریمئیر کے دوران بھگدڑ مچنے سے 39 سالہ خاتون جاں بحق اور اسکا بیٹا شدید زخمی ہو گیا تھا۔

واقعے کے خلاف پولیس نے تھیٹر انتظامیہ، الو ارجن اور ان کی سیکیورٹی ٹیم کے خلاف مقدمہ درج کیا تھا جس کے بعد گزشتہ روز تھیٹر کے مالک سمیت 3 افراد کو گرفتار کیا گیا تھا تاہم اب اداکار الوارجن کو گرفتار کرلیا گیا ہے۔

بھارتی میڈیا کا کہنا ہے کہ گرفتاری کے بعد الو ارجن کو آج مجسٹریٹ کے سامنے پیش کیا جائے گا، پولیس کا کہنا تھا کہ انہیں فلم کے پریمیئر میں اداکار اور ان کی ٹیم کی موجودگی کی کوئی پیشگی اطلاع نہیں دی گئی تھی۔

حیدر آباد کے ڈپٹی کمشنر پولیس نے بھارتی میڈیا سے گفتگو کرتے ہوئے بتایا کہ پولیس اسٹیشن میں متاثرہ خاندان کی شکایت پر بی این ایس سیکشن 105 اور 118 کے تحت مقدمہ درج کیا گیا تھا، واقعے کے ذمہ دار افراد کے خلاف سخت قانونی کارروائی کی جائے گی۔