کراچی: سابق ٹاؤن ناظم ڈاکٹر پرویز محمود کے قتل میں ملوث ایم کیو ایم لندن کے ٹارگٹ کلر کنور عمران کو انسداد دہشت گردی کی عدالت میں پیش کردیا گیا۔

تفصیلات کے مطابق گزشتہ دنوں پولیس اور قانون نافذ کرنے والے اداروں کی کارروائی کے نتیجے میں گرفتار ہونے والے ایم کیو ایم لندن کے کارکن کنور عمران کو انسداد دہشت گردی کی عدالت میں پیش کیا گیا۔

تفتیشی افسر نے عدالت کو آگاہ کیا کہ ملزم ناظم آباد گلبہار سیکٹر کی ٹارگٹ کلنگ ٹیم کا انچارج تھا جب دوران پوچھ گچھ اُس نے ٹارگٹ کلنگ کی متعدد وارداتوں کا بھی اعتراف کیا۔

پولیس حکام نے عدالت کو آگاہ کیا کہ ملزم جماعت اسلامی کے رہنما اور سابق ٹاؤن ناظم ڈاکٹر پرویز محمود کے قتل میں شامل اور مفرور تھا جبکہ کنور عمران نے اسلحہ اور بارود اکھٹا کر کے ٹارگٹ کلنگ ٹیم کو فراہم کیا۔ عدالت نے سابق سیکٹر انچارج کو 30 اپریل تک جسمانی ریمانڈ پر پولیس کے حوالے کردیا۔

یاد رہے کہ جماعت اسلامی کے مقامی رہنما اور لیاقت آباد ٹاؤن کے ناظم کو 17 ستمبر 2012 کے روز نارتھ ناظم آباد میں فائرنگ کر کے قتل کیا گیا تھا۔ ڈاکٹر پرویز اپنی گاڑی میں جارہے تھے کہ حیدری کے قریب واقع کے ڈی اے چورنگی پر نامعلوم مسلح ملزمان نے فائرنگ کردی۔

سابق ٹاؤن انچارج کو زخمی حالت میں عباسی شہید اسپتال منتقل کیا گیا تھا البتہ وہ زخموں کی تاب نہ لاتے ہوئے دم توڑ گئے تھے۔ جماعت اسلامی نے اُن کے قتل کا الزام ایم کیو ایم پر عائد کیا تھا۔

کراچی: وزیراعلیٰ پنجاب نے ڈیرہ غازی خان میں انسٹی ٹیوٹ آف کارڈیالوجی اسپتال کے قیام کا اعلان کردیا جو 200 بستروں پر مشتمل ہوگا۔

تفصیلات کے مطابق وزیراعلیٰ پنجاب نے آئندہ سال میڈیکل کالجوں میں 100 نشستیں بڑھانے اور ڈیرہ غازی خان میں انسٹی ٹیوٹ آف کارڈیالوجی اسپتال کے قیام کا اعلان کیا۔

عثمان بزدار کا کہنا تھا کہ انسٹی ٹیوٹ آف کارڈیالوجی 200بستروں پرمشتمل ہوگا، اسپتال کے لیے 4 ارب روپے مختص کیے گئے ہیں۔ اُن کا کہنا تھا کہ ’جنوبی پنجاب سیکرٹریٹ بہت جلدکام شروع کردےگا جبکہ ڈی جی خان میں آئی ٹی ٹاور بھی بنایا جائے گا‘۔

وزیراعلیٰ پنجاب کا کہنا تھا کہ راجن پور، لیہ میں بھی 200 بستروں پر مشتمل مدر اینڈ چائلڈ کیئر اسپتال بنایا جائے گا، عوام سے جو وعدے کیے انہیں ضرور پورا کریں گے۔ اُن کا مزید کہنا تھا کہ  رابطہ سڑکوں کوکشادہ کرکےڈبل روڈزبنائیں گے۔

مزید پڑھیں: ملتان کا نشتراسپتال معیاری سہولتیں فراہم کررہا ہے، عثمان بزدار

قبل ازیں سردار عثمان بزدار نے ملتان میں بنائے جانے والے نشتر اسپتال 2 کا سنگ بنیاد رکھا۔ تقریب کے شرکا سے خطاب کرتے ہوئے اُن کا کہنا تھا کہ نشتر اسپتال ملتان کے عوام کے لیے بڑا تحفہ ہے۔

اُن کا کہنا تھا کہ ملتان کا نشتراسپتال معیاری سہولتیں فراہم کررہا ہے، او پی ڈی میں یومیہ 6 ہزار مریضوں کا چیک اپ کیا جاتا ہے جبکہ دوسرے صوبوں سے بھی مریض علاج کے لیے یہاں آتے ہیں۔

عثمان بزدار کا کہنا تھا کہ ’نشتر اسپتال فیز 2 کو بہت پہلے شروع ہوجانا تھا مگر ماضی کی حکومتوں نے غفلت کا مظاہرہ کیا جس کی وجہ سے منصوبہ تاخیر کا شکار ہوا۔ اُن کا مزید کہنا تھا کہ پہلے مرحلے میں 500 بستروں کا اسپتال بنایا جائے گا، نشتراسپتال 2 میں 120 بستروں پرمشتمل ایمرجنسی وارڈ بنایا جائے گا۔

اسلام آباد: سپریم کورٹ آف پاکستان میں سابق وزیر اعظم نواز شریف کی مستقل ضمانت کی درخواست دائر کر دی گئی۔

تفصیلات کے مطابق مسلم لیگ ن کے رہنما نواز شریف کی جانب سے مستقل ضمانت کے لیے سپریم کورٹ میں درخواست دائر کر دی گئی، متفرق درخواست میں اضافی دستاویزات بھی شامل کی گئی ہیں۔

ذرایع کا کہنا ہے کہ متفرق درخواست میں ذاتی معالج ڈاکٹر عدنان کی رائے بھی شامل کی گئی ہے، درخواست کے ساتھ اضافی میڈیکل سرٹیفکیٹ بھی جمع کرایا گیا۔

واضح رہے کہ گزشتہ روز سابق وزیر اعظم نواز شریف نے برطانیہ میں علاج کرانے کی خواہش ظاہر کر دی تھی اور سپریم کورٹ سے رجوع کرتے ہوئے استدعا کی کہ پاکستان میں علاج کی پابندی پر نظر ثانی کی جائے۔

یہ بھی پڑھیں:  نواز شریف نے برطانیہ میں علاج کرانے کی خواہش ظاہر کردی

عدالت نے 26 مارچ کو 6 ہفتے کے لیے مشروط ضمانت دی تھی، جس پر نواز شریف کی درخواست میں کہا گیا کہ حکم نامے میں کہا گیا تھا ملک چھوڑ کر نہیں جا سکتے لیکن علاج اسی ڈاکٹر سے ممکن ہے جس نے برطانیہ میں علاج کیا تھا۔

مؤقف میں کہا گیا کہ نواز شریف کی مکمل صحت یابی 6 ہفتے میں نا ممکن ہے، طبی ماہرین کے مطابق نواز شریف کی زندگی کو خطرات لاحق ہیں، نواز شریف کو دل اور گردوں کے امراض لاحق ہیں۔