اسلام آباد: وفاقی وزیرسائنس و ٹیکنالوجی اعظم سواتی نے کہا ہے کہ میں نے کوئی کام خلاف قانون نہیں کیا، آئی جی اسلام آباد کا رویہ غیر ذمہ دارانہ ہے۔

ان خیالات کا اظہا رانہوں نے اے آر وائی نیوز کے پروگرام ’آف دی ریکارڈ‘ میں کیا، اعظم سواتی نے تفصیلات سے آگاہ کرتے ہوئے کہا کہ تجاوزات قائم کرنے والوں اور چوکیدار کے درمیان جھگڑا ہوا تھا، جھگڑے کے بعد دھمکی دی گئی بم لگا کر آپ کے خان کو اُڑائیں گے۔

اعظم سواتی نے کہا کہ آئی جی اسلام آباد کسی کو بھیج دیتے تو تین ملازم زخمی نہ ہوتے، میں ایک شہری کے طور پر انہیں فون کررہا تھا، انہوں نے 22 گھنٹے تک میرا فون نہیں سنا، تنگ آکر معاملہ وزیراعظم اور سیکریٹری داخلہ کے نوٹس میں لایا۔

قبل ازیں اعظم سواتی نے سپریم کورٹ میں پیش ہونے کا اعلان کرتے ہوئے کہا کہ سپریم کورٹ میں پیش ہوکر اپنا موقف پیش کروں گا، امید ہے چیف جسٹس کو موقف سمجھانے میں کامیاب ہوجاؤں گا۔

انہوں نے سوال کیا کہ کیا عام شہری کی حیثیت سے تحفظ کا مطالبہ کرنا میرا حق نہیں؟ کوشش کے باوجود سیکریٹری داخلہ کا آئی جی اسلام آباد سے رابطہ نہیں ہوسکا۔

واضح رہے کہ وفاقی وزیر سائنس اینڈ ٹیکنالوجی اعظم سواتی کا فون اٹینڈ نہ کرنے پر آئی جی اسلام آباد جان محمد کو عہدے سے ہٹادیا گیا تھا۔

چیف جسٹس ثاقب نثار نے ازخود نوٹس کیس کی سماعت کرتے ہوئے وزیراعظم عمران خان کے زبانی حکم پر ہونے والا آئی جی اسلام آباد کا تبادلہ روک دیا تھا۔

اسلام آباد: پاکستان پیپلز پارٹی کے شریک چیئرمین آصف علی زرداری اور چیئرمین بلاول بھٹو نے اپوزیشن کی آل پارٹیز کانفرنس میں بھرپور شرکت کا فیصلہ کر لیا۔

تفصیلات کے مطابق پیپلز پارٹی نے اپوزیشن کی اے پی سی میں بھرپور طور پر شرکت کا فیصلہ کر لیا ہے، بلاول بھٹو نے آل پارٹیز کانفرنس میں شرکت کی تصدیق کر دی۔

[bs-quote quote=”مولانا کی اے پی سی میں ضرور شرکت کریں گے: بلاول بھٹو” style=”style-7″ align=”left” color=”#dd3333″][/bs-quote]

بلاول بھٹو سے جب سوال کیا گیا کہ کیا پیپلز پارٹی اپوزیشن کی آل پارٹیز کانفرنس میں شرکت کرے گی، تو انھوں نے اے پی سی میں شرکت کی تصدیق کر دی۔

پی پی چیئرمین نے اس موقع پر کہا کہ مولانا فضل الرحمان آل پارٹیز کانفرنس بلا رہے ہیں، اور ہم مولانا کی اے پی سی میں ضرور شرکت کریں گے۔

خیال رہے کہ گزشتہ روز جے یو آئی ف کے سربراہ نے نواز شریف سے لاہور، جاتی امرا میں خصوصی ملاقات کی، سیاسی صورتِ حال پر تبادلۂ خیال کے علاوہ انھوں نے لیگی رہنما کو اے پی سی میں شرکت کی دعوت دی۔

یہ بھی پڑھیں:  لاہور: مولانا فضل الرحمان کی نوازشریف سے ملاقات

چار دن قبل بھی مولانا فضل الرحمان نے نواز شریف کو فون کر کے مجوزہ اے پی سی میں شرکت کی دعوت دی تھی، جس پر نواز شریف کا کہنا تھا کہ وہ پارٹی سے مشاورت کے بعد جواب دیں گے۔

ایک ہفتے قبل حکومت کو ٹف ٹائم دینے کے لیے پی پی شریک چیئرمین آصف زرداری بھی سرگرم ہو چکے ہیں، مولانا فضل الرحمان سے خصوصی ملاقات میں حکومت کے خلاف قرارداد لانے کی بات کر کے اقتدار کے ایوانوں میں ہل چل مچا دی تھی۔

اسلام آباد: وزارت داخلہ نے ڈاکٹر عمران فاروق قتل کیس میں بانی ایم کیو ایم کے ریڈوارنٹ کے لیے انٹرپول سے رابطے کا فیصلہ کیا ہے۔

تفصیلات کے مطابق ڈاکٹر عمران فاروق قتل کیس میں اہم پیش رفت ہوئی ہے، وزارت داخلہ نے بانی ایم کیو ایم کے ریڈوارنٹ کے لیے انٹرپول کو خط لکھنے کا فیصلہ کیا ہے۔

وزارت داخلہ نے بانی ایم کیو ایم کے ریڈ وارنٹ کے لیے ایف آئی اے کی طرف سے انٹرپول سے رابطے کی درخواست کی منظوری دے دی ہے۔

ذرائع کے مطابق ایف آئی اے ونگ بانی ایم کیو ایم کی حوالگی کے لیے متعلقہ دستاویزات بھی انٹرپول کو بھیجے گی۔

واضح رہے کہ ڈاکٹر عمران فاروق کو 16 ستمبر 2010 کو لندن میں ان کی رہائش گاہ کے باہر قتل کردیا گیا تھا۔

ایف آئی اے نے 2015 میں عمران فاروق کے قتل میں مبینہ طور پر ملوث ہونے کے شبے میں بانی متحدہ اور ایم کیو ایم کے دیگر سینئر رہنماؤں کے خلاف مقدمہ درج کیا تھا۔

قتل کیس کے الزام میں تین ملزمان محسن علی سید، معظم خان، خالد شمیم کو گرفتار کیا گیا تھا جبکہ ایک اور ملزم کاشف خان کامران کی موت واقع ہوچکی ہے۔

مزید پڑھیں: بانی ایم کیو ایم کی گرفتاری کے لیے انٹر پول کا تعاون سے انکار

یاد رہے کہ گزشتہ سال انٹرپول نے بانی ایم کیو ایم کے ریڈ وارنٹ کے لیے تعاون سے انکار کرتے ہوئے پاکستانی حکام کی جانب سے بھیجی گئی درخواست اعتراض لگا کر واپس کردی تھی۔

انٹرپول کے مطابق شاہد حامد قتل کیس پرانا ہے ایسی صورتحال میں ریڈ وارنٹ جاری نہیں ہوسکتے۔

لاہور: امیر جماعت اسلامی سراج الحق نے کہا ہے کہ ملک میں جمہوریت کے لیے افراد کے بجائے اداروں کا استحکام ضروری ہے۔

ان خیالات کا اظہار انہوں نے وسطی پنجاب امیر العظیم کی قیادت میں وفد سے منصورہ میں ملاقات کے موقع پر گفتگو کرتے ہوئے کیا، سراج الحق نے کہا کہ جمہوریت کی راہ میں اصل رکاوٹ سیاسی جماعتوں کے نام پر خاندانوں، لسانیت اور شخصیت کے گرد گھومنے والی جماعتیں ہیں۔

انہوں نے کہا کہ آمریت کی سوچ والی جماعتوں نے جمہوریت کو نقصان پہنچایا، جمہوری استحکام کے لیے سیاسی جماعتوں میں جمہوریت لانا ہوگی، قومی یکجہتی کے لیے لسانی، گروہی تعصبات سے نکلنا ہوگا۔

سراج الحق نے کہا کہ باپ کے بعد بیٹا اور بیٹے کے بعد پوتا اور نواسا پارٹی سربراہ بن بیٹھتا ہے، جماعت اسلامی کو یہ اعزاز حاصل ہے کہ اس میں مضبوط جمہوری نظام قائم ہے۔

انہوں نے کہا کہ جماعت اسلامی میں مضبوط جمہوری عمل کے بعد پارٹی سربراہ چنا جاتا ہے، دو سال بعد ضلعی، تین سال بعد صوبائی اور پانچ سال بعد جماعت کے مرکزی امیر کا انتخاب ہوتا ہے۔

امیر جماعت اسلامی نے کہا کہ انتخابی عمل میں حصہ لینے والی علاقائی، لسانی اور کسی خاص فرقہ کی نمائندہ جماعتوں کو اپنے اندر قومی سوچ کو پروان چڑھانا ہوگا۔

سراج الحق نے کہا کہ اْئین پاکستان میں اسلامی دفعات تو شامل کی گئیں مگر ان پر عمل درآمد ایک خواب ہی رہا ہے، پاکستان کی اسلامی شناخت کو ختم کرنے کی کوئی سازش کامیاب نہیں ہونے دیں گے۔