اتوار, جون 22, 2025
لائیو سٹریم
اے آر وائی نیوز انگریزی
رمضان کیلنڈر 2025
گولڈ ریٹس
کرنسی ریٹ
ایندھن قیمتیں
ہوم بلاگ صفحہ 24298

پی ایس ایل تھری:‌ دبئی میں‌ سنہری ٹرافی کی رونمائی

کی طرف
ویب ڈیسک
-
0

دبئی: پاکستان سپر لیگ سیزن تھری کی سنہری ٹرافی کی رنگا رنگ تقریب رونمائی دبئی میں معنقد ہوئی.

تفصیلات کے مطابق دبئی انٹرنیشنل کرکٹ اسٹیڈیم میں پی ایس ایل ٹرافی کی رونمائی کے لئے خصوصی تقریب کا اہتمام کیا گیا، جس میں پاکستان کرکٹ بورڈ کے اعلیٰ‌ حکام، ٹیموں کے کپتان، فرنچائز مالکان اور مینجمنٹ نے شرکت کی.

اس موقع پر پاکستان کرکٹ بورڈ کے چیئرمین نجم سیٹھی نے میگا ایونٹ میں شامل ٹیموں‌ کے کپتانوں کے ساتھ پریس کانفرنس کی. نجم سیٹھی کے کہنے پر سپراسٹار شاہد خان آفریدی نے بھی پریس کانفرنس میں شرکت کی.

نجم سیٹھی

پریس کانفرنس میں‌ نجم سیٹھی نے پی ایس ایل کو برانڈ بنانے پر تمام اسٹیک ہولڈرز کا شکریہ ادا کیا. ان کا کہنا تھا کہ فرنچائز مالکان کے بغیر پی ایس ایل ممکن نہیں تھا، اس بار بہترین بولر، بیٹسمین، وکٹ کیپر اور فیلڈر کو بھی ٹرافی دی جائیں گی.

انھوں نے تمام کپتانوں کا بھی تعارف کروایا، انھوں‌ نے مصباح الحق کی خدمات کو ناقابل فراموش اور ڈیرن سیمی کو سپراسٹار قرار دیا، ان کا کہنا تھا کہ آل رائونڈر شعیب ملک اس بار ملتان سلطانزکے کپتان ہیں. سرفراز احمد پاکستان کے لئے نئی تاریخ رقم کر چکے ہیں۔

کراچی کنگز کے فاسٹ بولر عثمان شنواری نے شعیب اختر کو اپنا رول ماڈل قرار دے دیا

انھوں‌ نے کراچی کنگز کے نوجوان کپتان عماد وسیم کو سراہتے ہوئے کہا کہ عماد وسیم ابھرتے ہوئے کھلاڑی ہیں، ان میں پاکستان کا کپتان بنے کی بھرپور صلاحیت موجود ہے.

انھوں نے امید ظاہر کی کہ مستقبل میں‌ لاہور کے کپتان برینڈن میک کلم کی مدد سے نیوزی لینڈ کی ٹیم پاکستان کا دورہ کرے گا.

کپتانوں‌ کا عزم

پریس کانفرنس میں‌ تمام ٹیموں‌ کے کپتانوں‌نے اظہار خیال کیا. کپتان پشاور زلمی ڈیرن سیمی نے کہا کہ ہم ٹائٹل کا دفاع کرنے کی بھرپور کوشش کریں گے، اسلام آباد یونائیٹڈز کے کپتان مصباح الحق نے کہا کہ ہم پی سی بی اور تمام عالمی کھلاڑیوں کا شکریہ ادا کرتے ہیں۔

لاہور قلندرز کے کپتان برینڈن میک کلم کا کہنا تھا کہ سیزن میں عمدہ کارکردگی دکھانے کی کوشش کریں گے، فخرزمان ہماری ٹیم کے نائب کپتان ہوں گے. ملتان سلطان کے کپتان شعیب ملک کا کہنا تھا کہ پی ایس ایل نے نئےنوجوان کھلاڑیوں کے لئے کرکٹ کےدروازے کھولے.

کراچی کنگز کے نوجوان کپتان آل رائونڈر عماد وسیم کا کہنا تھا کہ کراچی کنگز کی کپتانی میرے لئے اعزاز کی بات ہے. شاہد آفریدی اورمیں پی ایس ایل ٹرافی کراچی لے کر جائیں گے.

معروف اداکارعدنان صدیقی کراچی کنگزکی حمایت میں میدان میں آگئے

بوم بوم شاہد آفریدی کا کہنا تھا کہ پی ایس ایل ہمارا اپنا برانڈ ہے اسےسپورٹ کریں. انھوں‌نے تمام فرنچائز کا شکریہ ادا کیا.

یاد رہے کہ پی ایس ایل تھری کی افتتاحی تقریب 22 فروری کو دبئی انٹرنیشنل کرکٹ اسٹیڈیم میں ہوگی، ایونٹ کا افتتاحی میچ پشاور زلمی اور ملتان سلطانز کے درمیان کھیلا جائے گا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

ہر بات پر صرف ایک ہی دھمکی، احسن اقبال کا ٹوئٹ

کی طرف
ویب ڈیسک
-
0
Ahsan Iqbal

اسلام آباد : وزیر داخلہ احسن اقبال کا پی ٹی آئی چیئرمین عمران خان کے بیان پر کہنا ہے کہ خان صاحب سڑکوں پہ نکلنے کے علاوہ کر کیاسکتے ہیں ؟ ہر بات پر صرف ایک ہی دھمکی۔

تفصیلات کے مطابق وفاقی وزیر داخلہ احسن اقبال نے سماجی رابطے کی ویب سائٹ ٹوئٹر پر تحریک انصاف کے سربراہ کے بیان پر ردعمل کا اظہار کرتے ہوئے کہا کہ ہر بات پر صرف ایک ہی دھمکی، خان صاحب سڑکوں پہ نکلنے کے علاوہ کر کیاسکتے ہیں ؟

یاد رہے کہ پاکستان تحریک انصاف کے سربراہ عمران خان کا کہنا تھا کہ جمہوریت اور عدلیہ کوبچانے کیلئے عوام کوسڑکوں پرلاؤں گا، جتنا صفائی پیش کرنے کا موقع نوازشریف کو ملا اتنا کسی کو نہیں ملا۔

انکا کہنا تھا کہ سپریم کورٹ نے نوازشریف کو کئی مواقع دیئے، نوازشریف عدلیہ مخالف بیانات دے کر توہین عدالت کررہا ہے، 1997میں نوازشریف اور ن لیگ نے سپریم کورٹ پر حملہ کیا تھا، مافیا کی طرح نوازشریف نے پیسے دے کر کوئٹہ بینچ ججز سے فیصلہ لیا تھا ، نوازشریف کو 300ارب روپے کے جواب دینے ہیں۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

چار سال میں ہمیں سکون سے حکومت نہیں کرنی دی گئی، خواجہ سعد رفیق

کی طرف
ویب ڈیسک
-
0

لاہور : وفاقی وزیر ریلوے خواجہ سعد رفیق نے کہا ہے کہ چار سال میں سکون سے حکومت نہیں کرنی دی گئی، نوازشریف نے سپریم کورٹ کے خلاف کوئی بات نہیں کی، نواز شریف آج سے نہیں 1990 سے نشانے پرہیں، یہ پاکستان ہے فرانس یا امریکا نہیں، اخلاقیات کا درس نہ دیا جائے۔

تفصیلات کے مطابق جاتی عمرہ رائیونڈ میں نواز شریف زیرصدارت اجلاس کے بعد میڈیا سے گفتگو کرتے ہوئے وزیر ریلوے خواجہ سعد رفیق کا کہنا تھا کہ ملک الیکشن کی طرف بڑھ رہا ہے، ہمارے سامنے 2018 کا الیکشن ہے، نواز شریف چند دنوں تک سنٹرل ورکنگ کمیٹی کا اجلاس بلائیں گے، جس میں آئندہ انتخابات کے لئے بورڈ اور سیل بھی تشکیل دیئے جائیں گے۔

سعد رفیق کا کہنا تھا کہ صدر نواز شریف کے سوا کسی کے نام پر غوروخوض نہیں کیا گیا وہی سپریم لیڈر ہیں۔ قانون سازی سوچ سمجھ کر کی ہے۔ انہوں نے تاکید سے کہا کہ وہی قانون جسے 73 کے بعد بھٹو نے بنایا تھا اور مشرف نے نکالا تھا۔

وفاقی وزیر ریلوے نے کہا کہ نوازشریف آج سے نہیں 1990 سے نشانے پرہیں، یہ پاکستان ہے فرانس یا امریکانہیں، اخلاقیات کا درس نہ دیا جائے، ہمیں اخلاقیات سکھانے والے خود بھی عمل کریں۔

انکا کہنا تھا کہ پارلیمنٹ ،سیاسی قیادت پرغیراخلاقی جملےکسےگئےتو جواب بھی آئیگا، عدالتوں نے نظریہ ضرورت کے تحت غیرقانونی فیصلے دئیے ، امید ہے عدالتیں پارلیمنٹ کے قانون کیخلاف فیصلےنہیں دیں گی۔

مزید پڑھیں:   نواز شریف فیصلوں سے فارغ ہونے والے نہیں،خواجہ سعد رفیق

خواجہ سعد رفیق نے کہا کہ نوازشریف نے سپریم کورٹ کے خلاف کوئی بات نہیں کی، فیصلوں پر رائے دینے کا حق ہے۔ ایسے ریمارکس دیئے جائیں گے جو اخلاقی طور پر جائز نہیں، ان پر شکوہ شکایت تو کر سکتے ہیں۔

ان کا کہنا تھا کہ چار سال میں سکون سے حکومت نہیں کرنی دی گئی، پہلی بار ایسا نہیں ہوا، عدلیہ اور پارلیمنٹ میں جنگ نہیں ہوگی، پارلیمنٹ کا احترام کرنا ہو گا، باقی اداروں کا احترام تو کریں لیکن ایک کا نہیں۔

وفاقی وزیر ریلوے نے کہا کہ پاکستان فرانس یا برطانیہ نہیں۔ بار بار مارشل لاء لگایا گیا۔ نظریہ ضرورت کے تحت فیصلے کئے گئے۔ پھانسی دی گئی، اس پر آج تک کوئی بات نہیں کی گئی، ون وے پروپیگنڈہ کرنے والوں کا بھی احتساب کریں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

کراچی کنگز کے فاسٹ بولر عثمان شنواری نے شعیب اختر کو اپنا رول ماڈل قرار دے دیا

کی طرف
ویب ڈیسک
-
0
Karachi kings

کراچی: کراچی کنگز کے پیسر، باصلاحیت کھلاڑی عثمان خان شنواری نے دنیا کے تیز تر بولر شعیب اختر کو اپنا رول ماڈل قرار دے دیا۔

ان خیالات کا اظہار انھوں نے اے آر وائی اسپورٹس کو خصوصی انٹرویو دیتے ہوئے کیا۔ ان کا کہنا تھا کہ رفتار کے میدان میں وہ عظیم شعیب اختر کی پیروی کرتے ہیں۔ یاد رہے کہ شعیب اختر کو سو میل فی گھنٹے کی رفتار سے بولنگ کا انوکھا اعزاز حاصل ہے۔

عثمان شنواری گذشتہ برس نومبر میں سری لنکا کے خلاف سیریز میں بیک انجری کا شکار ہوگئے تھے، جس کی وجہ سے چھ ماہ کرکٹ سے دور رہے، مگر اب وہ دوبارہ اپنی صلاحیتوں کا مظاہرہ کرنے کے لیے پر تول رہے ہیں۔ بائیں ہاتھ کے تیر رفتار بولر نے اپنی فٹنس حاصل کرلی ہے اور وہ کراچی کنگز کی جیت میں کلیدی کردار ادا کرنے کے لیے پر عزم ہیں۔

اے آروائی اسپورٹس سے بات چیت کرتے ہوئے انھوں کہا،’میں سخت محنت کر رہا ہوں، کوشش ہے، خود کو زیادہ سے زیادہ بہتر بناﺅں، جب کپتان اور کوچ مجھے کھیلانے کا فیصلے کریں گے، میں بھرپور ایکشن میں نظر آﺅں گا۔‘

23 سالہ پیسر عماد آل رائونڈر وسیم کی کپتانی میں کھیلنے کے لیے پرجوش ہیں۔ وہ ان کے ساتھ قومی ٹیم میں بھی کھیل چکے ہیں اور امید رکھتے ہیں کہ یہ تجربہ متاثر کن رہے گا۔ ’میں پہلے بھی ان کے خلاف اور ان کے ساتھ کھیل چکا ہوں، تو ان کے ساتھ کھیل کر مزہ آئے گا، وہ ایک جارح کپتان ہیں، امید ہے کہ نتائج مثبت رہیں گے۔‘

معروف اداکارعدنان صدیقی کراچی کنگزکی حمایت میں میدان میں آگئے

کراچی کنگز کے تمام نوجوانوں کھلاڑیوں کی طرح وہ بھی لیجنڈ کھلاڑی شاہد خان آفریدی کے ساتھ کھیلنے کے لیے پرجوش ہیں۔ انھیں خوشی ہے کہ وہ کراچی کنگز کا حصہ ہیں۔عثمان کے بہ قول،’شاہد بھائی لیجنڈ ہیں۔ ان کی ٹیم میں موجودگی ہی سے دوسری ٹیم دباﺅ میں آجاتی ہے۔ تو ہمیں خوشی ہے کہ وہ کراچی کنگز کی نمائندگی کر رہے ہیں۔‘

انھیں اس بات کی بھی خوشی ہے کہ پی ایس ایل تھری کا فائنل کراچی میں ہورہا ہے اور انھیں یقین ہے کہ اگر کراچی کی ٹیم فائنل میں پہنچی تو عوام کی بڑی تعداد اسٹیڈیم کا رخ کرے گی۔

پی ایس ایل 3: کس میں کتنا ہے دم، ایونٹ میں شریک ٹیموں کا ماہرانہ تجزیہ

شنواری کہتے ہیں،’یہ کراچی والوں کے لیے اچھی خبر ہے کہ میگا ایونٹ کا فائنل کراچی میں ہوگا۔ اگر کراچی کنگر فائنل تو پہنچی، تو یہ سونے پر سہاگہ ہوگا اور مجھے امید ہے کہ ہم اچھا پرفام کریں گے۔‘

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

نوازشریف نے پہلے عدلیہ کو آزاد کرایا تھا،اب پاکستان میں عدل بحال کرائیں گے،مریم اورنگزیب

کی طرف
ویب ڈیسک
-
0

اسلام آباد : وزیر مملکت برائے اطلاعات و نشریات مریم اورنگزیب کا کہنا ہے کہ نوازشریف نے پہلے عدلیہ کو آزاد کرایا تھا،اب پاکستان میں عدل بحال کرائیں گے۔

تفصیلات کے مطابق وزیر مملکت برائے اطلاعات و نشریات مریم اورنگزیب نے میڈیا سے گفتگو کرتے ہوئے کہا کہ پاکستان کے عوام کی آواز کو سنا جائے ، نوازشریف نے پہلے عدلیہ کو آزاد کرایا تھا، اب نوازشریف پاکستان میں عدل بحال کرائیں گے۔

مریم اورنگزیب کا کہنا تھا کہ پارلیمان کی عزت کرنا تمام سیاسی جماعتوں پرفرض ہے۔

یاد رہے مریم اورنگزیب نے ن لیگ کے حریفوں پر تنقید کرتے ہوئے کہا تھا کہ ہ عوام کا نواز شریف سے پیار دیکھ کر عمران خان پریشان ہیں، عمران خان کوئی شرم ہوتی ہے کوئی حیا ہوتی ہےتبدیلی کے نعرے لگانے والوں کی حقیقت کھل کر سامنے آگئی، عوام انہیں جان چکی ہے۔

مزید پڑھیں : پاکستان عوام کا نواز شریف سے پیار دیکھ کر عمران خان پریشان ہیں، مریم اورنگزیب

ان کا مزید کہنا تھا کہ عوام نوازشریف کو دوبارہ منتخب کریں گے اور وہ ووٹ کے تقدس کا احترام کرتے ہوئے عوام سے کیا وعدہ پورا کریں گے، عمران خان چار سال میں خیبر پختونخواہ کے عوام کو ایک منصوبہ بھی نہ دے سکے، عام انتخابات میں عوام کا مینڈیٹ مسلم لیگ (ن) کا مقدر بنے گا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

عدلیہ کے ریمارکس کے باعث انتظامیہ مفلوج اور سیاستدان چور بن کر رہ گئے ہیں، رانا ثناء اللہ

کی طرف
ویب ڈیسک
-
0

لاہور : صوبائی وزیر قانون رانا ثناء اللہ خاں نے کہا ہے کہ پارلیمنٹ کی طرح صوبائی اسمبلی پنجاب میں بھی عدلیہ کے ریمارکس پر بحث کرائی جائے گی اور اس سلسلے میں تحریک التوائے کار ،اور تحریک استحقاق پیش ہوں گی، عدلیہ کے ریمارکس کے باعث انتظامیہ مفلوج اور سیاستدان چور بن کر رہ گئے ہیں۔

تفصیلات کے مطابق پنجاب اسمبلی کے احاطے میں میڈیا سے گفتگو کرتے ہوئے صوبائی وزیر قانون رانا ثناء اللہ خاں نے وزیراعظم کی جانب سے پارلیمنٹ میں ججز کے ریمارکس پر بحث کی حمایت کرتے ہوئے اعلان کیا کہ یہ بحث صوبائی اسمبلی میں بھی ہوگی کیونکہ ان ریمارکس کے باعث انتظامیہ مفلوج اور سیاستدانوں کے حوالے سے بددیانتی اور چور ہونے کا تاثر قوی ہوتا جارہا ہے ۔

صوبائی وزیر کا کہنا تھا کہ ان ریمارکس کا سلسلہ کہیں سے بھی شروع ہوا ہو اب اسے مناسب طریقے سے ختم ہونا چاہیے آئین میں ججز کو نکالنے کا مروجہ نظام موجود ہے، اسی طرح وزیراعظم کو بھی تکنیکی بنیادوں کی بجائے عدم اعتماد سے نکالا جائے۔

راناثنااللہ نےعدالتی احاطےمیں قتل کی واردات پر کہا کہ عدلیہ سے سب کو یکساں ریلیف ملنا چائیے، کسی میں جرات ہے کہ وہ وکلا کی تلاشی لے سکے۔ انتظامیہ کو کام نہیں کرنے دیا جارہا ، سیشن کورٹ میں وکلاء کے درمیان فائرنگ کے نتیجے میں دو افراد کا قتل بھی اسی انتظامی مفلوج پن کا حصہ ہے ۔

انکا کہنا تھا کہ عابد باکسر کو کسی اور ادارے نے دبئی سے پاکستان منتقل کیا ہو تو وہ اس حوالے سے کچھ نہیں کہہ سکتے لیکن لاہور پولیس نے تصدیق کی ہے کہ وہ ان کے پاس نہیں۔

مزید پڑھیں :  پاکستان کے استحکام کا کریڈٹ ذوالفقار علی بھٹو اور نواز شریف کو جاتا ہے، رانا ثناءاللہ

یاد رہے چند روز قبل وزیر قانون پنجاب رانا ثناءاللہ کا کہنا تھا  کہ کسی کو پارلیمنٹ کا اختیار سلب کرنے کا حق نہیں، پاکستان کے استحکام کا کریڈٹ ذوالفقار علی بھٹو اور نواز شریف کو جاتا ہے، ایک کے گلے میں پھندا ڈال کر لٹکا دیا گیا اور دوسرے کو رسہ ڈال کر نیب کے سامنے گھسیٹا جا رہا ہے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

جمہوریت اور عدلیہ کوبچانے کیلئے عوام کوسڑکوں پرلاؤں گا، عمران خان

کی طرف
ویب ڈیسک
-
0

پشاور : پاکستان تحریک انصاف کے سربراہ عمران خان کا کہنا ہے کہ جمہوریت اور عدلیہ کوبچانے کیلئے عوام کوسڑکوں پرلاؤں گا، جتنا صفائی پیش کرنے کا موقع نوازشریف کو ملا اتنا کسی کو نہیں ملا۔

تفصیلات کے مطابق پشاور میں پی ٹی آئی چیئرمین عمران خان نے میڈیا سے گفتگو کرتے ہوئے کہا کہ سینیٹ الیکشن کیلئے بہت پیسہ چل رہا ہے، انہیں ڈر ہے کہ نوازشریف کیخلاف فیصلہ آنےوالاہے، امید ہے سینیٹ الیکشن میں ہمارے امیدوار نہیں بکیں گے۔

عمران خان کا کہنا تھا کہ نوازشریف سپریم کورٹ کیخلاف پارلیمنٹ کو استعمال کررہاہے، جتنا صفائی پیش کرنے کا موقع نوازشریف کو ملا اتنا کسی کو نہیں ملا، سپریم کورٹ نے نوازشریف کو کئی مواقع دیئے، نوازشریف عدلیہ مخالف بیانات دے کر توہین عدالت کررہا ہے۔

سربراہ پی ٹی آئی نے کہا کہ جمہوریت اور عدلیہ کوبچانے کیلئے عوام کوسڑکوں پرلاؤں گا، سارے ایم پی ایزساتھ ہیں،امیدہےسینیٹ میں 6سیٹیں لیں گے، پی ٹی آئی حکومت آئی تو کرپشن سے بچنے کیلئےسینیٹ الیکشن براہ راست کرائیں گے۔

انکا مزید کہنا تھا کہ 1997میں نوازشریف اور ن لیگ نے سپریم کورٹ پر حملہ کیا تھا، مافیا کی طرح نوازشریف نے پیسے دے کر کوئٹہ بینچ ججز سے فیصلہ لیا تھا ، نوازشریف کو 300ارب روپے کے جواب دینے ہیں۔

مزید پڑھیں : عمران خان نے ارباب نیاز اسٹیڈیم توسیعی منصوبے کا سنگ بنیاد رکھ دیا

اس سے قبل پی ٹی آئی چیئرمین عمران خان نے ارباب نیاز اسٹیڈیم توسیعی منصوبے کا سنگ بنیاد رکھتے ہوئے کہا تھا کہ کرکٹ اکیڈمی بن رہی ہے، اسکول بوائز کی بھی تربیت ہوگی۔

ان کا کہنا تھا کہ پختونخواہ میں 100 گراؤنڈز بنا چکے ہیں۔ 20 کروڑ عوام کے لیے آسٹریلیا سے بھی کم گراؤنڈ ہیں۔ ٹیلنٹ کو نکھارنے کے لیے مزید گراؤنڈز بنانے ہوں گے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

نومولود بچوں کی شرح اموات پاکستان میں سب سے زیادہ

کی طرف
ویب ڈیسک
-
0

اسلام آباد: عالمی ادارہ اطفال یونیسف کا کہنا ہے کہ نومولود بچوں کی شرح اموات پاکستان میں سب سے زیادہ ہے۔ نومولود کی اموات کی فہرست میں جنوبی ایشیا کے صرف 2 ملک پاکستان اور افغانستان ہیں۔

تفصیلات کے مطابق اقوام متحدہ کے ادارہ اطفال یونیسف نے نومولود بچوں کی شرح اموات کے حوالے سے رپورٹ جاری کی ہے۔

یونیسف کی رپورٹ کے مطابق نومولود بچوں کی اموات کی فہرست میں جنوبی ایشیا کے صرف 2 ممالک پاکستان اور افغانستان شامل ہیں۔

رپورٹ میں کہا گیا ہے کہ پاکستان میں سنہ 2016 میں 22 بچوں میں سے ایک پیدائش کے پہلے ماہ جاں بحق ہوا۔ پاکستان کو نوزائیدہ بچوں کی اموات کے معاملے پر شدید چیلنجز کا سامنا ہے۔

رپورٹ میں بتایا گیا کہ افغانستان میں نومولود بچوں کی شرح اموات 25 میں سے ایک ہے۔ اسی طرح سینٹرل افریقی ری پبلک میں شرح 24 میں ایک رہی۔

یاد رہے کہ اس سے قبل ایک پاکستانی غیر سرکاری تنظیم کی جانب سے جاری کردہ رپورٹ میں بھی بتایا گیا تھا کہ پاکستان میں بچوں کی بڑی تعداد غذائی کمی اور نقص نمو کا شکار ہے اور اس حوالے سے پاکستان دنیا کا تیسرا بڑا ملک بن چکا ہے۔

رپورٹ کے مطابق غذائی کمی کا شکار بچوں کی شرح سندھ میں 70.8 فیصد، پنجاب میں 65.5 فیصد، اور خیبر پختونخواہ میں 67.4 فیصد ہے۔

ایسے بچوں کی شرح سب سے زیادہ صوبہ بلوچستان میں ہے جہاں 83.4 فیصد بچے مناسب اور مکمل غذا سے محروم ہیں۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

زینب قتل کیس ،مجرم عمران کی فیصلے کیخلاف ہائیکورٹ میں اپیل دائر

کی طرف
عابد خان
-
0

لاہور : زینب کے قاتل عمران نے انسداد دہشت گردی کے فیصلے کے خلاف لاہور ہائیکورٹ سے رجوع کر لیا۔

تفصیلات کے مطابق زینب قتل کیس میں بڑی پیش رفت سامنے آئی ہے، زینب کے قاتل عمران نے انسداد دہشت گردی کے فیصلے کے خلاف لاہور ہائیکورٹ سے رجوع کرلیا۔

مجرم عمران کی سزا کے خلاف اپیل جیل انتظامیہ نے ہائیکورٹ میں دائر کی ہے، اپیل میں مجرم عمران نے خود کو بے گناہ ظاہر کیا ہے۔

اپیل میں مؤقف اختیار کیا گیا کہ انسداد دہشت گردی عدالت کا فیصلہ بڑی جلدی میں کیا گیا، ٹرائل کے دوران قانونی تقاضے پورے نہیں کئے گئے۔ انسداد دہشت گردی عدالت کا فیصلہ کالعدم قرار دیا جائے۔

لاہور کوٹ لکھپت جیل میں انسداد دہشت گردی کی خصوصی عدالت کے جج سجاد احمد نے ننھی زینب کے قتل کیس میں جرم ثابت ہونے پر فیصلہ سناتے ہوئے قاتل عمران کو4 بارسزائے موت کا حکم دے دیا۔

مزید پڑھیں : زینب کےدرندہ صفت قاتل عمران کو 4 بارسزائےموت کا حکم

خصوصی عدالت نے مجرم عمران کو ایک بارعمر قید ،7سال قید، 32لاکھ جرمانے کی بھی سزا کا حکم دیا ، قاتل عمران کو مختلف دفعات میں الگ الگ سزائیں سنائی گئیں ہیں۔

عدالت نے عمران کو اغوا اورزیادتی کا جرم ثابت ہونے پر2 بارپھانسی سنائی جبکہ مجرم کو بدفعلی پرعمرقید اورلاش مسخ کرنے پر7سال قید سنائی۔

خیال رہے کہ زینب قتل کیس پاکستان کی تاریخ کا سب سے مختصرٹرائل تھا، چالان جمع ہونے کے سات روز میں ٹرائل مکمل کیا گیا۔

یاد رہے کہ پنجاب کے شہرقصور سے اغوا کی جانے والی 7 سالہ ننھی زینب کو زیادتی کے بعد قتل کردیا تھا تھا، زینب کی لاش گزشتہ ماہ 9 جنوری کو ایک کچرا کنڈی سے ملی تھی۔

زینب کے قتل کے بعد ملک بھرمیں غم وغصے کی لہر دوڑ گئی تھی اور قصور میں مظاہروں کے دوران پولیس کی فائرنگ سے 2 افراد جان کی بازی ہار گئے تھے۔

بعدازاں چیف جسٹس نے زینب قتل کیس کا ازخود نوٹس لیتے ہوئے 21 جنوری کو سپریم کورٹ لاہور رجسٹری میں ہونے والی سماعت کے دوران کیس کی تحقیقات کے لیے 72 گھنٹوں کی مہلت دی تھی۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

معروف اداکارعدنان صدیقی کراچی کنگزکی حمایت میں میدان میں آگئے

کی طرف
ویب ڈیسک
-
0
Adnan Siddiqui

کراچی: معروف اداکارعدنان صدیقی نے کراچی کنگز اوراے آر وائی ڈیجیٹل کے سی ای او سلمان اقبال کے لیے نیک تمناؤں کا اظہار کرتے ہوئے کہا کہ پی ایس ایل میں کراچی کنگز کے شیر ڈھاریں گے۔

تفصیلات کے مطابق پاکستان کے معروف اداکارعدنان صدیقی نے سوشل میڈیا کی ویب سائٹ فیس بک پر اپنے پیغام میں دلوں کے بادشاہ کراچی کنگز کا حصہ بننے پرخوشی کا اظہار کیا۔

عدنان صدیقی نے اے آر وائی ڈیجیٹل کے سی ای او اور کراچی کنگز کے مالک سلمان اقبال کا بالخصوص شکریہ ادا کیا۔

معروف اداکار نے پی ایس ایل میں کھیلنے والی تمام ٹیموں اورخاص کرکراچی کنگز کے لیے نیک خواہشات کا اظہار کرتے ہوئے کہا کہ لڑکوں جاؤ اور ہمارے لیے کپ اٹھاؤ، خوشی کو دوبالا بلکہ سہہ بالا کردو کیونکہ بین الاقوامی کرکٹرز کراچی آرہے ہیں۔

انہوں نے کہا کہ کرکٹ ایک ایسا کھیل ہے جو ہماری قوم کو متحد کرتا ہے اور پی ایس ایل پاکستان کرکٹ کے لیے گیم چینجر ہے، اس کے ذریعے نیا ٹیلنٹ سامنے آرہا ہے۔

عدنان صدیقی نے کہا کہ پاکستان سپرلیگ کا تھرڈ ایڈیشن پورے آب وتاب سے شروع ہونے کو ہے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

1...24,29724,29824,299...30,726صفحہ%موجودہ صفحہ%کا%کل صفحات

سوشل میڈیا

اے آر وائی ڈیجیٹل نیٹ ورک

انٹرایکٹو

کارپوریٹ

کاپی رائٹ © 2025