دبئی: پاکستان کرکٹ بورڈ کے چیئرمین نجم سیٹھی نے کہا ہے کہ پی ایس ایل کی کل ہونے والی رنگا رنگ افتتاحی تقریب میں فنکاروں کی پرفارمنس کو شائقین کرکٹ مدتوں یاد رکھیں گے، معروف صوفی گلوکارہ پہلی بار تقریب میں اپنی آواز کے سر بکھیریں گی۔
تفصیلات کے مطابق دبئی میں فنکاروں کے ہمراہ پریس کانفرنس کرتے ہوئے چیئر مین پی سی بی کا کہنا تھا کہ پی ایس ایل کی افتتاحی تقریب میں معروف صوفی گائیک عابدہ پروین بھی پہلی بار اپنی سر بکھیریں گی جن کی آواز پر نہ صرف پاکستانی بلکہ غیر ملکی بھی جھوم اٹھتے ہیں۔
اُن کا کہنا تھا کہ سپرلیگ کے تیسرے ایڈیشن کی افتتاحی تقریب رنگا رنگ ہوگی اور اسے شائقین کرکٹ مدتوں یاد رکھیں گے کیونکہ نامور فنکار اور گلوکار اپنی آواز کا جادو جگائیں گے۔
واضح رہے کہ پاکستان سپر لیگ کی افتتاحی تقریب دبئی اسٹیڈیم میں جمعرات کے روز منعقد کی جائے گی جس میں نامور صوفی گلوکارہ عابدہ پروین سمیت دیگر نامور گلوکار اپنے فن کا مظاہرہ کریں گے۔
نجم سیٹھی کے ہمراہ پریس کانفرنس کرنے والے گلوکار علی ظفر نے کہا کہ پی ایس ایل ہماری اپنی لیگ ہے، میں افتتاحی تقریب میں 30 میٹر تک ہوا میں اڑنے کا مظاہرہ کروں گا اور پی ایس ایل سیزن کے تیسرے گانے پر پرفارم کروں گا‘۔
کراچی کنگز کا نغمہ گانے والے سنگر شہزاد رائے نے کہا کہ کرکٹ کے ذریعے قوم میں انقلاب لایا گیا، پی ایس ایل کا فائنل کراچی میں ہوگا جس کے لیے تیاری کرنی ہے۔
شہزاد رائے کا کہنا تھا کہ کرکٹ کی وجہ سے ہمارے معاشرے میں جذبہ اور تبدیلی آئی جو بہت اچھی روایت ہے، پی ایس ایل نے ہماری سوسائٹی میں اہم کردار ادا کیا۔
اُن کا کہنا تھا کہ جمعرات کے روز عابدہ پروین کے ساتھ مل کر پرفارم کریں گے، اس بار افتتاحی تقریب صوفی موسیقی کے رنگوں سے بھری ہوگی۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
ممبئی: بھارتی دورے پر آئے کینیڈین وزیراعظم جسٹن ٹروڈو کو معتصب بھارتی حکومت مسلسل نظراندازہ کر رہی ہے، البتہ انھیں کروڑوں دلوں پر راج کرنے والے خانز کی خصوصی توجہ میسر ہے۔
تفصیلات کے مطابق گذشتہ دنوں کینیڈا کے ہر دل عزیز اور بین المذاہب ہم آہنگی کے لیے کوشاں نوجوان وزیراعظم کی تصاویر وائرل ہوگئیں، جن میں وہ مسٹرپرفیکٹ عامر خان اور کنگ خان شاہ رخ خان کے ساتھ دکھائی دے رہے ہیں۔
ملاقاتوں میں جسٹن ٹروڈو کے اہل خانہ بھی موجود تھے۔ کینیڈین وزیر اعظم نے شیروانی پہن رکھی تھی۔ ان کی بیگم نے ساڑھی، جب کہ بچوں نے بھی مشرقی لباس زیب تن کر رکھے تھے۔ ان رنگا رنگ تصاویر میں جسٹن ٹروڈو بولی وڈ کی معروف ہستیوں کے ساتھ خوشگوار موڈ میں نظر آرہے ہیں۔
تقریب کے بعد جسٹن ٹروڈو نے کنگ خان کے ساتھ اپنی تصویر ٹویٹ کی، جس میں انھوں نے کہا کہ ’آج ہم نے کینیڈین فلم انڈسٹری اور بولی وڈ کے درمیان نئے اور مضبوط رشتے کا جشن منایا اور اس کام کے لیے شاہ رخ سے بہتر بھلا کون ہوسکتا ہے، آپ سے ملنا شان دار رہا۔‘
تقریب میں انھوں نے کنگ خان اور مسٹر پرفیکٹ کے علاوہ فرحان اختر، مادھون اور انوپم کھیر سے بھی ملاقات کی، جن کی تصویروں پر میڈیا پر زبردست ردعمل آیا۔
کینیڈین وزیر اعظم کو بھارتی سپراسٹارز اور عوام کی جانب سے ملنے والے پذیرائی ان معنوں میں اہم ہے کہ انھیں انتہاپسندی کی شکار بھارتی حکومت کی جانب سے مسلسل نظر انداز کیا جارہا ہے.
یاد رہے کہ وزیراعظم جسٹس ٹروڈو اپنے اہل خانہ کے ہمراہ 7 روزہ سرکاری دورے پر پیر کے روز بھارت پہنچے تو مودی حکومت نے ان کے دورے کو کوئی اہمیت نہیں دی، جس کا سبب ان کی مسلمان، سکھ اور دیگر اقلیتوں کے لیے ہمدردیاں اور پالیسیاں ہیں، البتہ بولی وڈ خانز نے حکومت کی انتہاپسندانہ سوچ کو رد کرتے ہوئے ہر دل عزیز کینیڈین وزیر اعظم سے خصوصی ملاقاتیں کیں.
واضح رہے کہ گذشتہ دنوں بھارت پہنچنے والے اسرائیلی وزیراعظم نیتن یاہو کا نہ صرف پرتپاک استقبال کیا گیا تھا، بلکہ بھارتی وزیر اعظم ہر جگہ اُن کے ساتھ ساتھ نظر آئے. بگ بی سمیت کئی اداکاروں کی ان سے ملاقات کا اہتمام کیا گیا، جن کے ساتھ لی جانے والی بگ بی کی سیلفی پر خاصی تنقید کی گئی.
یاد رہے کہ خانز نے اسرائیلی وزیراعظم کے لیے منعقد تقریب میں شرکت سے اجتناب برتا تھا.
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
لاہور : قومی احتساب بیورو نے سابق ڈی جی ایل ڈی اے احد چیمہ کو بدعنوانی کے الزام میں گرفتار کرلیا، احد چیمہ نیب میں طلبی کے باوجود تیسری بار پیش نہیں ہوئے تھے۔
تفصیلات کے مطابق نیب لاہور نے آشیانہ ہاؤسنگ اسکیم میں بدعنوانی میں سابق ڈی جی ایل ڈی اے احد چیمہ کو گرفتارکرلیا ہے، ملزم کی گرفتاری گلبرگ میں پنجاب پاورکمپنی کےدفترسے کی گئی۔
اس حوالے سے ذرائع کا کہنا ہے کہ احد چیمہ دو بار نیب میں طلبی پر پیش ہوئے، تاہم جب انہیں تیسری بار طلب کیا گیا تو پیش نہ ہونے پر نیب نے کارروائی کرتے ہوئے انہیں حراست میں لے لیا۔
اے آر وائی نیوز کے نمائندے اظہر اقبال نے بتایا ہے کہ احد چیمہ کو گرفتار کرکے نیب ٹھوکر نیاز بیگ کے دفتر میں منتقل کردیا گیا ہے جہاں ان سے مزید تفتیش کی جارہی ہے۔
انہوں نے بتایا کہ نیب نے تیسری پیشی میں ان سے دستاویزات سمیت آنے کو کہا تھا جس پر وہ پیشش ہی نہیں ہوئے آشیانہ ہاؤسنگ اسکیم کیس میں نیب نے وزیر اعلیٰ پنجاب شہباز شریف اور ان کے پرنسپل سیکیرٹری فواد حسن فواد اور دیگر افسران کو بھی طلب کیا گیا گیا تھا۔
نمائندے کے مطابق احد چیمہ پنجاب حکومت کے طاقتور افسر شمار کیے جاتے ہیں، یہ اس وقت ڈی جی ایل ڈی اے تھے جب آشیانہ ہاؤسنگ اسکیم میں بڑے پیمانے پر اربوں روپے کی کرپشن کی گئی، جس کی نیب تحقیقات کر رہا ہے۔
مزید پڑھیں: آشیانہ ہاؤسنگ اسکینڈل، چیف انجینئر ایل ڈی اے کی طلبی
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
دبئی : آسمان کی بلندیوں کو چھونے والا پُر تعیش لگژری ہوٹل ’جیوورا‘ کا افتتاح کردیا گیا ہے، یہ دنیا کا سب سے بلند ترین ہوٹل ہے جو اپنی طرز تعمیر، دلکش ڈیزائن اور خوبصورتی کے باعث لوگوں کی توجہ کا مرکز بن گیا ہے۔
دنیا کا بلند ترین لگژی ہوٹل شیخ زید روڈ پر فلک بوس عمارت کی صورت پر موجود ہے جہاں یہ ہوٹل جاہ و جلال کی عظمت دکھائی دیتی ہے وہیں اس میں روایتی تہذیب کا جمالیاتی رنگ بھی نمایاں ہے جس کے باعث یہ ہوٹل سیاحوں کی اولین پسند بن گیا ہے یہی وجہ ہے اس کی دلکشی نے پہلے ہی روز دنیا بھر کے سیکڑوں سیاحوں کو اپنی طرف متوجہ کرلیا۔
ذرائع کے مطابق دبئی کے سینے پر فلک کو چھوتا یہ ہوٹل 528 کمروں پر مشتمل 75 منزلہ عمارت ہے جس کی اونچائی 356 میٹر ہے اور جس میں 232 ڈیلکس کمرے اور 265 سنگل بیڈ رومز کے ساتھ ساتھ سوئمنگ پول، ہیلتھ کلب، اسنوکر کلب، جم اور دیگر جدید سہولیات سے آراستہ ہے جب کہ اس ہوٹل کی خاص بات 5 ریسٹورنٹس کی موجودگی ہے جہاں مقامی اور بین الاقوامی کھانوں کی تمام اقسام موجود ہیں۔
واضح رہے کہ اس سے قبل دنیا کا بلند ترین لگژری ہوٹل جے ڈبلیو میرٹ مارکوئس دبئی ٹاور تھا جس کی اونچائی 355 میٹر ہے۔
پشاور: خیبرپختونخواہ اسمبلی نے صوبے میں جہیز پر پابندی اور شادی میں نمود و نمائش و فضول اخرابات پر پابندی کے قانون کی منظوری دے دی، قانون کے مطابق شوہر کی طرف سے دیا جانے والا تحفہ بیوی کی ملکیت ہوگا۔
تفصیلات کے مطابق خیبرپختونخواہ اسمبلی کا اجلاس ہوا جس میں شادی میں فضول اخراجات اور جہیز پر پابندی کی قرار داد پیش کی گئی، ایوان میں حاضر تمام نمائندوں نے قرارداد کی حمایت کی جس کے بعد قانون کو متفقہ طور پر منظور کرلیا گیا۔
کے پی کے اسمبلی کی منظوری کے بعد اب صوبے میں جہیز دینے، شادی میں نمود و نمائش اور فضول اخراجات پر پابندی ہوگی جبکہ دلہن کے گھر والے اُسے ایک لاکھ سے زیادہ مالیت کا تحفہ نہیں دے سکیں گے۔
قانون کے مطابق شادی میں اونچی آواز میں گانے بجانے کے عمل کو قابلِ سزا قرار دیا جائے گا جبکہ مہندی اور نکاح میں مہمانوں کی تواضع صرف مشروبات سے کی جاسکتے گی۔
قرار داد کے مطابق شادی میں برقی قمقمے استعمال کرنے پر پابندی ہوگی جبکہ تقریبات کو رات 11 سے پہلے ختم کرنا ہوگا، بارات ، ولیمے میں چاول، سالن روٹی اور میٹھے کے علاوہ سلاد رکھنے کی اجازت ہوگی۔
قانون کے مطابق جہیز مانگنے پر 3 لاکھ روپے جرمانہ یا تین ماہ قید جبکہ خلاف ورزی کرنے پر 2 لاکھ روپے جرمانہ یا 2 ماہ کی قید ہوگی جبکہ منظوری کے بعد شوہر کی طرف سے دیا جانے والا تحفہ بیوی کی ملکیت ہوگا اور واپس مانگنے پر شوہر کو 2 لاکھ روپے جرمانہ یا 3 ماہ کی قید ہوگی۔
واضح رہے کہ گزشتہ برس بھی خیبرپختونخواہ اسمبلی نے جہیز کی لعنت کے خلاف بل منظور کیا تھا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
اسلام آباد: سپریم کورٹ کی جانب سے انتخابی اصلاحات ایکٹ کیس 2017 کے فیصلے پر ن لیگ کے رہنمائوں کی جانب سے سخت ردعمل سامنے آیا ہے.
تفصیلات کے مطابق آج سپریم کورٹ کی جانب سے انتخابی اصلاحات ایکٹ کیس 2017 کا فیصلہ سنایا گیا، جس کے تحت سابق وزیر اعظم نواز شریف مسلم لیگ (ن) کی صدارت کے لیے نااہل قرار پائے اور 28 جولائی کے بعد ان کے تمام فیصلوں کو کالعدم قرار دے دیا گیا.
اس عدالتی فیصلے پر وزیر قانون پنجاب رانا ثنا اللہ نے موقف اختیار کیا کہ فیصلےکی تفصیل دیکھے بغیرکوئی جامع تبصرہ نہیں کیا جاسکتا، قانون سازی صرف اور صرف پارلیمنٹ کاحق ہے، اس پر ہمارا موقف حتمی ہے. انھوں نے مزید کہا کہ سینیٹ کے الیکشن کو کسی قسم کا خطرہ نہیں.سینیٹ الیکشن کے لئے پارٹی ٹکٹس منسوخ ہوئےامیدوارآزاد حیثیت سے لڑسکتے ہیں.
وزیر مملکت طلال چوہدری نے اپنا موقف دیتے ہوئے کہا کہ پارٹی کا نام مسلم لیگ نواز ہے، پارٹی صدرنوازشریف کی مرضی کا ہوگا، نوازشریف جوفیصلہ کریں گے، اس پرہم مہرلگائیں گے. انھوں نے کہ اس وقت ملک ایسی فیصلوں کا متحمل نہیں ہوسکتا. نیا پارٹی صدر کا انتخاب بھی نواز شریف ہی کریں گے۔
مسلم لیگ کے سینئر رہنما عابد شیر علی نے فیصلے کے بعد ٹویٹ کیا، جس میں انھوں نے سخت موقف اختیار کرتے ہوئے کہا، "نامنظور، نا منظور، نا منظور، احتجاج، احتجاج، احتجاج.” انھوں نے مزید کہا کہ "میری پارٹی میرا لیڈر،میاں نوازشریف.”
شاہد خاقان عباسی کا نواز شریف سے رابطہ
عدلیہ فیصلے کے بعد ن لیگ شدید بحران کا شکار نظر آتی ہے. ان مشکلات سے نمٹنے کے لیے اعلیٰ عہدے دار سر جوڑ کر بیٹھ گئے ہیں.
ذرایع کے مطابق وزیر اعظم شاہد خاقان عباسی نے نواز شریف کوٹیلی فون کیا ہے۔ وزیر اعظم اور نواز شریف نے سپریم کورٹ کے فیصلے کے بعد کی صورتحال پر تبادلہ خیال کیا. دوران گفتگو پارٹی صدارت اور مستقبل کی حکمت عملی پر بھی بات چیت ہوئی.
اسلام آباد: سپریم کورٹ کی جانب سے جاری ہونے والے فیصلے پر پاکستان عوامی تحریک کے سربراہ نے کہا ہے کہ جب نااہل شخص کا وزیرداخلہ اپنا ہوگا تو اُس کا نام ای سی ایل میں کون ڈالے گا، عدالتی فیصلہ پاکستان میں آئین و قانون کی فتح ہے۔
تفصیلات کے مطابق سپریم کورٹ نے قومی اسمبلی اور سینیٹ سےمنظور ہونے والی آئین میں موجود انتخابی شق 203 کو کالعدم قرار دیتے ہوئے نوازشریف کو پارٹی صدارت کے لیے نااہل قرار دیا۔
اپوزیشن جماعتوں نے عدالتی فیصلوں کو مثبت قرار دیا، اس ضمن میں درخواست گزار شیخ رشید احمد کا کہنا ہے کہ یہ کیسے ممکن تھا کہ نااہل شخص وزیر بنانے کا اہل ہوجائے، جب ایسے شخص کا اپنا وزیر داخلہ ہوگا تو ای سی ایل میں نام کیسے ڈالا جائے گا۔
اُن کا کہنا تھا کہ عدالتی فیصلہ پاکستان میں آئین و قانون کی فتح ہے، ایل این جی اور حدیبیہ کیس میں فتح ہمارا ہی مقدر بنے گی، نوازشریف نے جو گڑھا کھودا اُس میں خود ہی گر گئے۔
تحریک انصاف کے وائس چیئرمین شاہ محمود قریشی نے کہا کہ نوازشریف کو اداروں سے ٹکراؤ نہ کرنے کا مشورہ دیا مگر وہ باز نہ آئے، اگر آئین سے متصادم قانون بنایا جائے گا تو وہ چلینج ہوسکتا ہے۔
شاہ محمود قریشی کا کہنا تھا کہ اپوزیشن نے انتخابی اصلاحات کی شق میں ترمیم کی مخالفت کی تھی اور شدید احتجاج بھی کیا تھا، مسلم لیگ ن کو پہلے ہی خدشہ تھا کہ فیصلہ اُن کے حق میں نہیں آئے گا اس لیے محاذ آرائی کی کیفیت پیدا کی گئی۔ تحریک انصاف کے وائس چیئرمین کا مزید کہنا تھا کہ سینیٹ الیکشن وقت پر ہوتے دکھائی نہیں دے رہے۔
تحریک انصاف کے وکیل اور رہنما بابر اعوان کا کہنا تھا کہ سپریم کورٹ کی جانب سے جاری ہونے والے فیصلے کے دور رس نتائج سامنے آئیں گے، ملکی تاریخ میں پہلی بار نوازشریف 2 بار نااہل ہوئے۔
اُن کا کہنا تھا کہ کیوں نکالا کے بعد کیوں نکالا ٹو ہوگیا، مسلم لیگ ن کو سینیٹ الیکشن کے لیے دوبارہ صف بندی کرنی ہوگی کیونکہ ایوان بالا کے نمائندوں کو نوازشریف نے ٹکٹ تقسیم کیے جبکہ لودھراں کا ٹکٹ بھی نااہل شخص نے دیا تھا۔
ایم کیو ایم پاکستان کے سربراہ ڈاکٹر فاروق ستار کا کہنا تھا کہ عدلیہ کے فیصلوں کا احترام کرتے ہوئے ہمیں محاذ آرائی سے گریز کرنا چاہیے۔
پیپلزپارٹی کے رہنما مولا بخش چانڈیو کا کہنا تھا کہ عدلیہ کے فیصلوں کو پیروں تلے روندنے کی کوشش کی جائے گی تو اس طرح کی صورتحال سامنے آئے گی، میاں صاحب سمجھتے ہیں کہ میں نہیں تو کچھ بھی نہیں وہ صرف اپنی ذات کی بات کرتے ہیں۔
جماعت اسلامی کے امیر سینیٹر سراج الحق کا کہنا تھا کہ 28 جولائی کے بعد مسلم لیگ ن نے جو کیا آج کا فیصلہ اُس کا نتیجہ ہے، حکمراں جماعت نے پارلیمنٹ کو مورچے کے طور پر استعمال کیا۔
واضح رہے کہ انتخابی شق میں ترمیم کے خلاف شیخ رشید احمد سمیت 16 درخواست گزاروں نے سپریم کورٹ میں پٹیشن دائر کی تھی جبکہ ان کے وکیل بیرسٹر فروغ نسیم تھے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
ممبئی: بالی ووڈ اداکارہ پریانکا چوپڑا جزیرے پر سیر و تفریح کے لیے پہنچیں اور انہوں نے اپنی تصاویر سوشل میڈیا پر شیئر کیں جو انٹرنیٹ پر وائرل ہوگئیں۔
تفصیلات کے مطابق بالی ووڈ اداکارہ ہالی ووڈ شو ’کوانٹیکو 3‘ کے لیے امریکا میں موجود ہیں انہوں نے گزشتہ ہفتے طویل مصروفیات کے بعد فراغت کا وقت ملتے ہی جزیرے کا رخ کیا۔
اداکارہ نے سماجی رابطے کی ویب سائٹ پر اپنی مختلف تصاویر شیئر کیں اور بتایا کہ وہ چھٹیاں گزارنے کے لیے خوبصورت مقام پر موجود ہیں۔
واضح رہے کہ پریانکا چوپڑا سن 2000 میں عالمی حسینہ قرار پائی تھیں جس کے بعد انہیں دنیا بھر میں پذیرائی ملی اور انہوں نے بالی ووڈ انڈسٹری میں قدم رکھا۔
اداکارہ نے شوبز انڈسٹری میں اپنی صلاحیتوں کا لوہا منوایا تو انہیں ہالی ووڈ کے فلم ڈائریکٹر نے اُن سے رابطہ کیا اور وہ گزشتہ برس ’ہاؤس آف کارڈ‘ میں رابن ورتھ کے ساتھ مرکزی کردار ادا کرتی نظر آئیں تھیں۔
پریانکا نے فلم میں اپنا کردار احسن طریقے سے نبھایا جس کے باعث مداحوں نے نہ صرف اسے پسند کیا بلکہ باکس آفس پر بھی فلم نے کامیابی کے جھنڈے لہرائے تھے۔
خیال رہے کہ برطانوی جریدے فوربز میگزین میں بالی ووڈ اداکارہ پریانکا چوپڑا کا نام زیادہ کمانے والے اداکاروں کی فہرست میں آٹھویں نمبر جبکہ جرمنی سے شائع ہونے والی 100 بااثر خواتین کی فہرست میں اُن کا درجہ 97ویں نمبر آیا تھا۔
بھارتی اداکارہ پریانکا چوپڑا یونیسیف کی خیر سگالی سفیر بھی ہیں وہ دنیا بھر میں تعلیم کے فروغ کے لیے کام سرگرم ہیں اور چند روز قبل شام سے اردن ہجرت کرنے والے مہاجرین کے کیمپس میں متاثرہ بچوں سے ملاقاتیں بھی کیں تھیں۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
اسلام آباد :سپریم کورٹ نے انتخابی اصلاحات 2017 کافیصلہ سنا دیا ہے جس کی رو سے نوازشریف ن لیگ کی صدارت کے لئے بھی نااہل ہوچکے ہیں اور ان کے بحیثیت پارٹی صدر تمام فیصلے بھی کالعدم قرار پا گئے جس میں سینیٹ کے ٹکٹ بھی شامل ہیں۔
تفصیلات کے مطابق سپریم کورٹ میں انتخابی اصلاحات کیس کی سماعت بعد چیف جسٹس نے فیصلہ سنا دیا، فیصلے کے تحت سابق وزیر اعظم نوازشریف پارٹی صدارت سے نا اہل قرارپا گئے ہیں۔
سپریم کورٹ نے تاریخ کے اہم انتخابی اصلاحات کیس کا فیصلہ سناتے ہوئے پولیٹیکل پارٹیز ایکٹ2017 کی شق203 میں ترمیم کالعدم قرار دے دی، فیصلے میں کہا گیا ہے کہ نااہل شخص پارٹی کا سربراہ نہیں بن سکتا، اٹھائیس جولائی کے بعد نوازشریف کے کیے گئے فیصلے کالعدم تصور کیے جائیں۔
چیف جسٹس آف پاکستان جسٹس ثاقب نثار کی سربراہی میں 3 رکنی بینچ نے انتخابی اصلاحات ایکٹ میں ترمیم کے خلاف دائر درخواستوں پر سماعت کی تھی۔
چیف جسٹس نے فیصلہ سناتے ہوئے سب سے پہلے ریمارکس دیئے کہ طاقت کا سرچشمہ اللہ تعالیٰ ہے، آئین کے آرٹیکل 62 اور 63 پر پورا اترنے والا ہی پارٹی صدر بن سکتا ہے، سپریم کورٹ نے الیکشن کمیشن کو نوازشریف کا نام بطور پارٹی صدر ہٹانے کا حکم بھی جاری کردیا ہے۔
واضح رہے کہ سپریم کورٹ کی جانب سے 28 جولائی 2017 کو وزیراعظم کو نااہل قرار دیئے جانے کے فیصلے کے بعد نہ صرف یہ کہ نواز شریف وزیراعظم کے عہدے سے برطرف ہوگئے تھے بلکہ انتخابی اصلاحات کی شق نمبر کے تحت پارٹی کی صدارت کرنے کے بھی اہل نہیں رہے تھے جس کے باعث مسلم لیگ (ن) کے رہنما سردار یعقوب کو صدر منتخب کرلیا گیا تھا۔
نااہل شخص کو پارٹی صدر بنوانے کے لیے مسلم لیگ (ن) نے اپنی عددی اکثریت کا فائدہ اُٹھاتے ہوئے 2 اکتوبر 2017 کو قومی اسمبلی سے انتخابی اصلاحات ترمیمی بل شق نمبر 203منظور کروا یا تھا جس کے بعد نواز شریف کو دوبارہ مسلم لیگ (ن) کا صدر منتخب کرلیا گیا تھا۔
خیال رہے کہ سابق فوجی صدر پرویز مشرف کے دور میں پولیٹیکل پارٹی آرڈر سال 2002 میں یہ واضح طور پر کہا گیا تھا کہ کوئی بھی ایسا شخص پارٹی کا سربراہ نہیں بن سکتا جب تک وہ رکن قومی اسمبلی بننے کی اہلیت نہ رکھتا ہو۔
کیس کی سماعت اور چیف جسٹس کے ریمارکس
قبل ازیں سپریم کورٹ میں انتخابی اصلاحات کیس کی سماعت ہوئی، جس میں چیف جسٹس نے ریمارکس دیتے ہوئے کہا تھا کہ ہم فریق نہیں ہیں، ہم کسی کو وضاحت دینے کے پابند نہیں. ہم نے کسی رکن پارلیمنٹ کو چور ڈاکو نہیں کہا عدالتی کارروائی سے متعلق تمام ریکارڈنگ موجود ہے۔
چیف جسٹس کا کہنا تھا کہ دوسرے ملکوں میں بھی انٹرا پارٹی الیکشن ہوتے ہیں، ہمارے ہاں مختلف صورتحال ہے، پارٹی سربراہ کے گرد ساری چیزیں گھوم رہی ہوتی ہیں۔
اس موقع پر بیرسٹرفروغ نسیم نے دلائل دیتے ہوئے کہا کہ اخلاقی اقدار بنیادی نکتہ ہے، سیاسی جماعت کے سربراہ کے خلاف عدالت کا فیصلہ موجود ہے۔
دوران سماعت بابر اعوان ایڈووکیٹ نے دلائل دیتے ہوئے کہا کہ سینیٹ انتخابات کے لیے ٹکٹ نااہل شخص نے جاری کئے ہیں، لطیف کھوسہ کا کہنا تھا کہ بنیادی حقوق کے تحفظ کا اختیار عدالت کو عوام نے دیا۔
سپریم کورٹ کا تحریری فیصلہ جاری
سپریم کورٹ نے انتخابی اصلاحات کیس کا تحریری فیصلہ جاری کردیا ہے، مذکورہ تحریری فیصلہ پانچ صفحات پر مشتمل ہے جسے چیف جسٹس کی سربراہی میں3رکنی بینچ نےجاری کیا ہے۔
فیصلے کے مطابق آئین کے آرٹیکل62،63کے تحت نااہل شخص پارٹی کی صدارت کا اہل نہیں ہوسکتا، نااہلیت آرٹیکل62، 63کے تحت قابلیت بحال ہونے تک برقرار رہے گی۔
فیصلے میں مزید کہا گیا ہے کہ نااہل شخص کے تمام اقدامات اوراحکامات کالعدم تصور ہوں گے، اس کے علاوہ نااہل شخص کی جانب سےبحیثیت سربراہ جاری دستاویزات بھی کالعدم قرار دے دی گئیں ہیں۔
تحریری فیصلے میں کہا گیا ہے کہ اس شخص کے اقدامات اور احکامات سے متعلق ایسا تصورکیا جائے گا کہ جیسے یہ کام ہوئے ہی نہیں ہیں۔
فیصلے میں الیکشن کمیشن کو اپنے ریکارڈ سے نوازشریف کا نام بطور پارٹی صدر ہٹانے کی ہدایت کی گئی ہے۔
انتخابی اصلاحات کیس2017 کا پس منظر
آئینی طور پر نااہل شخص کسی سیاسی جماعت کے عہدے کا اہل نہیں ہوسکتا، پاناما کیس کے فیصلے کے بعد نواز شریف وزیراعظم کے عہدے کے ساتھ پارٹی صدر کے لئے نااہل ہوگئے۔
سابق نااہل وزیراعظم کو دوبارہ پارٹی صدر بنانے کے لیے مسلم لیگ (ن) نے اکتوبر2017 میں انتخابی اصلاحات ایکٹ2017 کی شق203میں ترمیم کی۔ پارلیمنٹ سے نئے بل کی منظوری کے بعد نواز شریف3اکتوبر کو پارٹی صدر منتخب ہوگئے۔
میاں نواز شریف کے پارٹی صدر بننے اور پارلیمنٹ سے انتخابی اصلاحات ترمیمی بل کی منظوری کے بعد تحریک انصاف، عوامی مسلم لیگ اور پیپلز پارٹی کی جانب سے سپریم کورٹ میں اس کیخلاف درخواستیں دائر کی گئیں تھیں۔
یکم جنوری 2018 کو عدالت نے درخواستوں کو قابل سماعت قرار دیا، بعد ازاں چیف جسٹس آف پاکستان جسٹس میاں ثاقب نثار کی سربراہی میں جسٹس عمر عطا بندیال اور جسٹس اعجاز الاحسن کی سربراہی میں تین رکنی بینچ تشکیل دیا گیا۔
کیس کی سماعت کے دوران عوامی مسلم لیگ کی جانب سے فروغ نسیم، تحریک انصاف کی جانب سے بابر اعوان اور پیپلز پارٹی کی جانب سے لطیف کھوسہ بطور وکیل پیش ہوئے۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
اسلام آباد: سربراہ جے یو آئی (ف) مولانا فضل الرحمان نے کہا ہے کہ ملک کی سیاسی صورتحال سے چین کے اعتماد کود ھچکا لگا ہے، ایک دوسرے پر گند ڈالنے کی سیاست کوعالمی ترجیحات کے تناظرمیں دیکھنا چاہیے.
ان خیالات کا اظہار سربراہ جے یو آئی (ف) مولانا فضل الرحمان نے اسلام آباد میں ایک تقریب سے خطاب کرتے ہوئے کیا.
ان کا کہنا تھا کہ اداروں کے تصادم میں ملک کی تباہی ہے، سوال یہ ہے کیا کہ ادارے ہمیشہ پارلیمنٹ کے خلاف استعمال ہوں گے. فیصلوں سے عداوت کی بونہیں آنی چاہیے.
ان کا کہنا تھا کہ پارلیمنٹ ہو، یا کوئی اور ادارہ، سب کواپنی آئینی حدود میں رہنا چاہیے، فیصلوں سےعداوت کی بونہیں آنی چاہیے. یہاں کسی ادارے کے خلاف تجزیہ دیں، تو آپ کوغدارکہہ دیا جاتا ہے. کیا ہمیشہ سیاست دانوں کی تضحیک کی جائے گی.
انھوں نے کہا کہ اس وقت بیرونی محاذ پر ہمیں کئی چیلنجز درپیش ہیں. آج امریکا بھارت کے ساتھ ہے، ہمارے ساتھ نہیں، آج امریکا بھارت کے ذریعے چین کو کاؤنٹرکرنا چاہتا ہے. افغانستان بھارت کی لابی میں ہے. ان حالات میں پاکستان کو سوچ سمجھ کر قدم اٹھانے ہوں گے.
مولانا فضل الرحمان کا کہنا تھا کہ ایرانی صدر بھارت کے سال میں دو دورے کر چکے ہیں، ایران بھارت کو برادر ملک کہہ رہا ہے. ہمیں سفارتی محاذ پر مربوط اقدامات کرنے ہوں گے.
سربراہ جے یو آئی کا کہنا تھا کہ ملک کی سیاسی صورتحال سے چین کے اعتماد کود ھچکا لگا ہے، امریکا نے بھارت سے گٹھ جوڑ کر لیا ہے۔ کیا ادارے ہمیشہ پارلیمنٹ کے خلاف استعمال ہوں گے، تصادم میں ملک کی تباہی ہے۔ سیاست کوعالمی ترجیحات کے تناظرمیں دیکھنا ہوگا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
