گورنر پنجاب چودھری محمد سرور نے کہا ہے کہ کالا باغ ڈیم سمیت کئی قومی معاملات سیاست کا شکار ہیں، کشکول توڑنے کیلئے ایک قوم بننا پڑے گا۔

لاہور میں میڈیا سے گفتگو کرتے ہوئے گورنر پنجاب کا کہنا تھا کہ بلدیاتی انتخابات ہونے چاہئیں، یہی بنیادی جمہوریت ہے، بدقسمتی سے کچھ قومی معاملات سیاست کا شکار ہوگئے ہیں۔

انہوں نے کہا کہ ایران نے گیس پائپ لائن کو اپنے ملک میں مکمل کرلیا ہے لیکن پاکستان میں یہ منصوبہ الجھا ہوا ہے، کشکول توڑنے اور آئی ایم ایف کے چنگل سے نکلنے کے لیے پہلے ہمیں ایک قوم بننا پڑے گا۔ ان کا کہنا تھا کہ جب تک سیلاب، زلزلے اور صاف پانی کے منصوبوں کے فنڈز ہڑپ کئے جاتے رہیں گے ۔

کوئی ہم پر اعتماد نہیں کریگا۔ گورنر پنجاب نے کہا کہ مغرب کا پاکستان میں اقلیتی حقوق سے متعلق نظریہ غلط فہمی کا شکار ہے، کرسمس کی تقریب گورنر ہاؤس میں ہوئی، آئندہ ہولی کی تقریب بھی ادھر ہی ہوگی۔

انہوں نے کہا کہ گورنر ہاؤس اور محکمہ تعلیم کے درمیان کوئی اختلافات نہیں، وزیر اعلی پنجاب سے میری مکمل ہم ہنگی ہے۔ انہوں نے کہا کہ وہ یونیورسٹیوں کے نئے کیمپس بننے میں پبلک پرائیویٹ پارٹنرشپ کے مخالف نہیں ہیں۔

لاہور میں واپڈا ملازمین نے مہنگائی، بیروزگاری، بجلی گیس کی بندش اور بجلی کی تقسیم کار کمپنیوں کی نجکاری کے خلاف احتجاجی مظاہرہ کیا۔ واپڈا پیغام یونین کی کال پر ہونےوالے احتجاجی مظاہرے کے بعد لاہور پریس کلب کے سامنے دھرنا بھی دیا گیا۔

شرکاءنے بینرز اور پلے کارڈ زاٹھا رکھے تھے جن پر مہنگائی کیخلاف نعرے درج تھے۔ ریلی سے خطاب کرتے ہوئے سیکرٹری جنرل پیغام یونین احسان احمد چوہدری کا کہنا تھا کہ اس سے پہلے بھی کئی قومی اداروں کی نجکاری کی گئی ،جس سے ہزاروں ملازمین بیروزگار ہوئے۔

مہنگائی کا یہ عالم ہے کہ بنیادی اشیاءبھی عوام کی پہنچ سے دور ہو گئی ہیں۔ اُنہوں نے مطالبہ کیا کہ بجلی کی تقسیم کار کمپنیوں کی نجکاری کے بجائے اِن کی اصلاح کی جائے تاکہ مزید ملازمین کوبیروز گار ہونے سے بچایا جا سکے۔