کراچی میں پر تشدد واقعات کا سلسلہ تھم نہ سکا، پاک کالونی اور سٹی اسٹیشن سے دو افراد کی تشدد زدہ لاشیں برآمد ہوئیں، اورنگی ٹاؤن نمبر چار سے نوزائیدہ بچے کی لاش بھی ملی۔

کراچی میں ٹارگٹڈ آپریشن کے باوجود دہشتگرد آزاد پھر رہے ہیں، پر تشدد کارروائیوں میں آج سٹی ریلوے اسٹیشن کے قریب سے ایک شخص کی لاش ملی، جسے تشدد کے بعد قتل کیا گیا۔

تھانہ پاک کالونی کے علاقے بسم اللہ ہوٹل کے قریب ایک شخص کی لاش برآمد کی گئی، گلستان جوہر بلاک سترہ سے لڑکی کی پھندا لگی لاش ملی، پولیس ابتدائی تفتیش میں اسے خود کشی قرار دے رہی ہے۔

اورنگی ٹاؤن نمبر چار میں بھی نوزائیدہ بچے کی لاش ملی ہے، ادھر لانڈھی میں اے این پی کے مقامی عہدیدار کے گھر پر نامعلوم افراد دستی بم پھینک کر فرار ہوگئے۔

دستی بم حملے میں ایک شخص زخمی بھی ہوا، رینجرز نے لانڈھی میں کارروائی کے دوران دو ملزمان کو حراست میں لے کر ان کے قبضے سے اسلحہ بر آمد کرلیا۔

کراچی پولیس کئی سالوں سے دہشت گردوں اورجرائم پیشہ افراد کے نشانے پر ہے، حالیہ ٹارگٹڈ آپریشن کے بعد ان حملوں میں شدت آگئی، ایڈیشنل آئی جی کا کہنا ہے کہ ایک سال میں پونے دو سو افسران اور اہلکار شہید ہوئے۔

کراچی پولیس چیف شاہد حیات کا کہنا ہے کہ پولیس دہشت گردوں کا تعاقب کر رہی ہے اور جواب میں وہ ان پر حملے کر رہے ہیں، اعداد وشمار کے مطابق چار سال کے دوران لگ بھگ تین سو افسران و اہلکار نشانہ بنے۔

انکا کہنا ہے کہ دہشت گردی اور جرائم کے قلع قمع پر کمر بستہ پولیس کے گزشتہ سال پانچ ستمبر سے اکیس دسمبر تک چھ سو ایک مقابلے ہوئے، جن میں چوراسی ملزمان مارے گئے۔

  انسانی حقوق کمیشن کی رپورٹ کے مطابق گذشتہ سال ایک سو انسٹھ مبینہ ملزمان پولیس مقابلے میں ہلاک کیے گئے، ان میں سے اٹھائیس کا تعلق کالعدم تنظیموں سے تھا۔

گذشتہ سال نومبرمیں شہید ایس پی چوہدری اسلم نے مبینہ مقابلے میں لشکر جھنگوی کراچی کے امیرگل حسن سمیت چھ شدت پسندوں کو ہلاک کرنے کا دعویٰ کیا تھا۔

دوسری جانب چوہدری اسلم پر حملے کی ذمے داری کالعدم طالبان نے قبول کرتے ہوئے الزام عائد کیا کہ وہ ان کے پچاس سے زائد کارکنوں کے ماورائے عدالت قتل میں ملوث تھے۔