کراچی : ڈی جی محکمہ موسمیات غلام رسول نے کہا ہے کہ آج رات تک بارش جاری رہے گی، کل سے بارش کاسلسلہ کمزور پڑجائے گا، کراچی کے مختلف علاقوں میں پچیس سے ساٹھ ملی میٹرتک بارش ہوئی۔
غلام رسول کا کہنا تھا کہ کراچی میں رواں ماہ ایک سے دو بارشیں مزید متوقع ہیں۔
آئندہ چوبیس گھنٹوں میں زیریں سندھ، بالائی پنجاب ( راولپنڈی، گوجرانوالہ، لاہور، فیصل آباد، سرگودھا ڈویژن)، اسلام آباد اور کشمیر میں کہیں کہیں جبکہ خیبرپختونخوا، فاٹا اور جنوبی پنجاب (ملتان، بہاولپور، ڈی جی خان ڈویژن)، مشرقی بلوچستان (ژوب، قلات، سبی، نصیر آباد ڈویژن)، بالائی سندھ گلگت بلتستان میں چند مقامات پر تیز ہواؤں اورگرج چمک کیساتھ بارش کا امکان ہے، اس دوران چند مقامات پر موسلادھار بارش کا بھی امکان ہے۔
گزشتہ روز سے کراچی میں شروع ہونے والا سلسلہ اب تک جاری ہے، کہیں ہلکی اور کہیں تیز بارش ہورہی ہے، جس سے موسم خوشگوار ہونے پر شہری بھی خوب لطف اندوز ہورہے ہیں تاہم کچھ علاقوں میں بجلی کی فراہمی معطل ہے۔
مختلف علاقوں میں موسلادھاربارش سے نشیبی علاقے اورسڑکیں زیرآب آگئیں، سڑکوں پرپانی جمع ہونے سے ٹریفک کی روانی معطل اورلوگوں کو پریشانی کا سامنا جبکہ کرنٹ لگنے سے 11 افراد جان کی بازی ہار گئے۔
