شادی دو افراد کے درمیان تعلق کا نام نہیں بلکہ دو خاندانوں کا ملاپ ہے جبکہ خوشگوار اورکامیاب ازدواجی زندگی کے لئے سسرال کو خوش کرنا لازمی ہوجاتا ہےاور اس کے لئے میاں بیوی کس طرح اپنے سسرال والوں کو خوش کریں، اس کے لیے ہم ایسے نسخے بتارہے  ہیں، جن پر عمل  کر کے نہ صرف آپ اپنے سسرال والوں کا دل جیت سکتے ہیں بلکہ  ایک خوشگوار زندگی کا لطف بھی اٹھا سکتے ہیں۔

تحائف خوشگوار تعلقات کا ذریعہ ہے، شادی دو خاندانوں کے درمیان تعلق قائم کرتی ہے اس لیے ضروری ہے کہ سسرال والوں کے ہر فرد کے ساتھ اچھے تعلقات قائم کیے جائیں، اس کے لیے خاندان کے ہر فرد کو تحائف دیجئے لیکن یاد رہے کہ تحفہ کم قیمت ہی کیوں نہ ہولیکن اہمیت رکھنے والا ہو اس سے خاندان میں آپ کی اہمیت بڑھے گی اور ہر کوئی آپ کا احترام کرے گا۔

ہر فرد سے خوش گوار انداز میں ملیں سسرال کے ہر فرد کے ساتھ ہاتھ ملائیں، کچھ تعریفی جملے کہیں اور یوں محسوس ہو کہ آپ اس شخص سے مل کر بہت خوش ہوئے ہیں اس سے آپ کی صحت پر تو کوئی اثر نہیں پڑے گا تاہم یہ آپ کے سسرال والوں سے تعلقات کو ضروربہتر بنا دے گا۔

سسرال والوں سے معمولات زندگی پر تبادلہ خیال کریں،  ضروری ہے کہ سسرال کو اپنے معمولات زندگی اور دیگر مصروفیات سے آگاہ کریں اور کوئی بات خفیہ نہ رکھیں۔ مثلاً آپ رات دیر سے گھر آتے ہیں، اپنی سوشل لائف، عادات، پسند نا پسند وغیرہ کو واضح کریں لیکن خیال رہے کہ ہر بات عام یا تھوڑے مزاح کے  انداز میں بتائیں تاکہ سامنے والا ناگواری کا احساس نہ کرے ۔

سسرال میں اپنی خاص صلاحیتوں کا ضرور مظاہرہ کریں، ہر انسان کے اندر کچھ ایسی صلاحتیں ہوتی ہیں، جن سے وہ کسی بھی فرد کو متاثر کرسکتا ہے جب کہ  اپنی ان ہی صلاحیتوں کا اظہار کرکے آپ اپنے سسرال والوں کا دل جیت لیں گے مثلاً اگر آپ کے پاس تخلیقی صلاحیتیں تو اس کا استعمال ضرور کریں تاہم کسی ایسی صلاحیت دکھانے کی کوشش نہ کریں جس پر آپ کو اعتماد نہ ہو۔