نیویارک: پیٹرولیم مصنوعات کی قیمتوں میں مزید کمی متوقع ہے،عالمی منڈی میں خام تیل کی قیمت تین سال کی کم ترین سطح پر ٹریڈ کررہی ہے۔
اوپیک کی جانب خام تیل کی سپلائی میں کمی نہ کرنے کے اعلان کے باعث نیویارک مرکنٹائل ایکسچینج میں خام تیل دسمبر کے سودے پانچ سینٹ کمی کے بعد ستتر ڈالر سولہ سینٹس فی بیرل میں ہورہے ہیں۔
معاشی تجزیہ کاروں کے مطابق عالمی منڈیوں میں خام تیل کی قیمتوں میں کمی سےپاکستان سمیت تیل درآمد کرنے والےدیگر ممالک کو خاطر خواہ فائدہ ہوگا ۔
اسلام آباد: انڈونیشیا اور پاکستان کی باہمی تجارت میں بہتری لانے کے لئے دونوں ممالک کے مختلف شعبوں بے شمار مواقع موجود ہیں ، لہٰذا دونوں ممالک کے تاجروں کو چاہئے کہ وہ دوطرفہ تجارت کو فروغ دینے کے لئے باہمی روابط بڑھائیں۔
یہ بات انڈونیشیا سفارتخانے کے قونصلر زین العابدین اور تھرڈ سیکریٹری اٹو راکیم گنی نے اسلام آباد چیمبر آف کامرس اینڈ انڈسٹری کے دورہ کے موقع پر کہی۔
انہوں نے کہا کہ پاکستان اور انڈونیشیا آزاد تجارت کے سمجھوتے سے پوری طرح استفادہ کریں ، پاکستانی گندم، باسمتی چاول اور کینوں انڈونیشیا میں کافی مشہور ہیں جبکہ ماربل، گرینائٹ، پھل، سبزیاںاور آم کی بھی انڈونیشیا کی مارکیٹ میں بہتر مانگ ہے،
پاکستانی تاجر برادری کو چاہئے کہ وہ ایسے تجارتی میلوں میں شرکت کر کے انڈونیشیا میں موجود کاروباری مواقع سے استفادہ کریں، انہوں نے یقین دلایا کہ انڈونیشیا کا سفارتخانہ آئی سی سی آئی کے ساتھ مل کر دونوں ممالک کے درمیان تجارتی تعلقات کو مزید مستحکم کرنے کے لئے اپنا مثبت کردار ادا کرے گا۔
اس موقع پر اسلام آباد چیمبر آف کامرس اینڈ انڈسٹری کے سینئر نائب صدر محمد شکیل منیر اور نائب صدر اشفاق حسین چٹھہ نے کہا کہ انڈونیشیا صارفین کی ایک بڑی مارکیٹ ہے اور پاکستانی تاجر برادری انڈونیشیا کے ساتھ تجارتی تعلقات کو فروغ دینا چاہتی ہے۔
کراچی : شہرِ قائد سمیت ملک کے بیشتر شہروں میں عاشورہ محرم کے موقع پر لگائی گئی موٹر سائیکل کی ڈبل سواری پر پابندی اٹھالی گئی جبکہ موبائل فون سروس بحال کردی گئی ہیں، تاہم اسلام آباد میں موٹر سائیکل کی ڈبل سواری پر پابندی آج رات بارہ بجے تک برقرار رہیگی ۔
وزارتِ داخلہ کی جانب سے محرم الحرام کےدوران سیکیورٹی خدشات کے پیشِ نظر عاشورہ پر کراچی ،لاہور، کوئٹہ سمیت ملک کے حساس شہروں میں موٹرسائیکل کی ڈبل سواری پرپابندی عائدکی گئی تھی۔ تاہم اسلام آباد میں ڈبل سواری پر پابندی سیکیورٹی تحفظات کے پیش نظر آج رات بارہ بجے تک برقرار رہیگی۔
عاشورہ محرم کے جلوس پر امن طور پر اپنی منزلوں پر پہنچنے کے بعدآٹھ محرم الحرام سے ڈبل سواری پر لگائی گئی پابندی ختم کردی گئی۔ عاشورہ پر کسی قسم کی دہشت گردی سے بچنے کے لئے مختلف شہروں میں موبائل فون سروس بھی بند کر دی گئی تھی، جسے بحال کردیا گیا ہے۔
کراچی: سعودی عرب کی سول ایوی ایشن اتھارٹی نے حج آپریشن 2014 کے دوران غیر جانبدارانہ رپورٹنگ کرنے پر اے آروائی نیوز کو تعریفی اسناد سے نوازا ہے۔
سعودی عرب کے کنگ عبدالعزیز ایئرپورٹ پر کی جانے والی سینئر صحافی محمد صلاح الدین کی رپورٹنگ کو سعودی حکام نے بے حد سراہا ، اور اس کے اعتراف میں پاکستان کے تمام ٹی وی چینلز میں سے اے آروائی نیوز کو غیر جانبدارانہ اور شفاف قراردیتے ہوئے اسناد سے نواز ا ہے۔
واضح رہے کہ سعودی ایوی ایشن نے دنیا صحافت میں دوسری مرتبہ اے آروائی نیوز کو اس اعزاز سے نوازا ہے ، 2013 میں بھی اے آروائی نیوز کویہ تعریفی اسناد جاری کی گئی تھیں۔
اے آر وائی کے رپورٹر صلاح الدین نے اس موقع پر کہاکہ یہ بات ہمارے لئے انتہائی خوشی کی باعث ہے کہ سعودی حکومت نے اے آر وائی کی کاوشوں کو سراہا،اور ہمیں اس بات پر فخر ہے کہ اے آر وائی کی حج نشریات کو دنیا بھر میں دیکھا اور پسند کیا گیا۔
مکہ :خانہ کعبہ کی چابی نئے کلید بردار کے حوالے کر دی گئی ہے، غسلِ کعبہ کی تقریب 8نومبر کو ہوگی۔
گورنرمکہ المکرمہ شہزادہ مشعل بن عبداللہ خادم الحرمین الشریفین شاہ عبداللہ بن عبدالعزیز کی نیابت کرتے ہوئے غسل کعبہ کی رسم ادا کریں گے جبکہ خانہ کعبہ کا دروازہ الشیبی خاندان کے سربراہ نئے کلید بردار ڈاکٹر صالح العابدین کھولیں گے۔
غسلِ کعبہ کی تقریب میں اسلامی ممالک کے نمائندے اور علماء و مشائخ کے علاوہ شاہی خاندان کے ارکان بھی شرکت کرینگے۔
سماجی رابطوں کی ویب سائٹس کو شدت پسندوں نے اپنے نظریات کے ابلاغ کا موثر ذریعہ بنالیا ہے۔
شدت پسند بھی دور جدید کے تقاضوں کو اپنانے لگے ہیں، برطانوی خبر رساں ایجنسی کے مطابق دو لت اسلامیہ کے شدت پسند اپنے مؤقف اور نظریے کے فروغ کیلئے سماجی رابطوں کی ویب سائٹس کا بھرپور استعمال کر رہے ہیں ۔
رپورٹ کے مطابق ویب سائٹس کے ذریعے عوام کو ڈرانے اور اپنی جانب مائل کیا جارہا ہے۔
برطانوی سیکیورٹی اداروں نے اپیل کی ہے کہ ویب سائٹس شدت پسندوں کے نظریات کی روک تھام کیلئے سیکیورٹی اداروں سے تعاون بڑھائیں۔
متنی : پشاور کے علاقے متنی اور بڈھ بیر میں پولیس نے سرچ آپریشن کیا، سرچ آپریشن کے دوران پولیس نے مختلف مقدمات میں مطلوب تین اشتہاری ملزمان کو گرفتار کرلیا۔
پشاور میں بڑھتی ہوئی بدامنی اور دہشتگردی کے واقعات کے خلاف پولیس بھرپور ایکشن میں ہے، نواحی علاقوں متنی اور بڈھ بیر میں سرچ آپریشن کرکے مختلف مقدمات میں مطلوب تین اشتہاری ملزمان کو گرفتار کرلیا ۔۔ پولیس کا کہنا ہے کہ گرفتار ملزمان سے بھاری مقدار میں اسلحہ اور گولہ بارود بر آمد ہوا ہے۔
تھر : مٹھی اسپتال میں غذائی قلت کا شکار ایک اور معصوم پھول آج مرجھا گیا جبکہ عمرکوٹ میں پراسرار بیماری سے سولہ بچے متاثر ہوگئے۔
تھر کے تپتے صحرا میں موت کے سائے ہر گزرتے دن کے ساتھ گہرے ہوتے جارہے ہیں جبکہ حکام بالا کے دعوے کہیں پورے ہوتے دکھائی نہیں دے رہے، ذرائع کےمطابق مٹھی کےاسپتال میں زیرِ علاج غذائی قلت کا شکار دو سالہ ننھی بچی موت کے آغوش میں چلی گئی ۔
جس کے بعد تھر میں قحط سے جاں بحق بچوں کی تعداد سینتیس ہوگئی ہے۔
دوسری جانب عمر کوٹ میں انوکھی بیماری پنجے گاڑ رہی ہے، صحرائی گاوٴں جھمراڑی میں ایک سال سے پندرہ سال تک کی عمر کے سولہ بچے پُراسرار جسمانی معذوری کا شکار ہو گئے ہیں جو کہ انتظامیہ کی کارکردگی پر سوالیہ نشان ہے۔
اسلام آباد: وزیرِاعظم نواز شریف سے ڈی جی آئی ایس آئی لیفٹیننٹ جنرل ظہیرالاسلام نے الوداعی ملاقات کی۔
الوداعی ملاقات میں باہمی دلچسپی اور پیشہ وارانہ امور سمیت دیگر موضوعات پر تبادلہ خیال ہوا، ڈی جی آئی ایس آئی لیفٹیننٹ جنرل ظہیر الاسلام سات نومبر کو اپنے عہدے سے ریٹائرڈ ہورہے ہیں۔
جس کے بعد سابق ڈی جی رینجرز لیفٹیننٹ جنرل رضوان اختر ڈی جی آئی ایس آئی کے عہدے کا چارج سنبھالیں گے۔
اسلام آباد: چیف کمشنر سے محروم الیکشن کمیشن کا ادارہ سیکریٹری سے بھی محروم ہوگیا ہے، اشتیاق احمد کی مدت ملازمت مکمل ہونےکے باوجود کوئی نام تجویزنہیں کیا گیا۔
الیکشن کمیشن آف پاکستان انتہائی اہم ادارہ ہے، لیکن اہم ادارہ مستقل سربراہ سے تو محروم ہی ہے اور اب سیکریٹری کی نشست بھی خالی ہوگئی ہے، الیکشن کمیشن چیف الیکشن کمشنر کے بعد سیکریٹری کےعہدے پر بھی تعیناتی کا منتظر ہے۔
موجودہ سیکریٹری اشتیاق احمد کی مدت ملازمت مکمل ہوگئی لیکن اس عہدے کےلیے تاحال کسی کا نام سامنے نہیں آسکا، اشتیاق احمد کی مدتِ ملازمت میں دوبار توسیع کی گئی، اس کے باوجود حکومت کی جانب سے نئے سیکریٹری کے لئے نام فراہم نہیں کیا جاسکا۔
ذرائع کے مطابق الیکشن کمیشن نے سیکریٹری الیکشن کمیشن کے لیے اسٹیبلشمنٹ ڈویژن سے تین نام مانگے تھے، سیکریٹری کے علاوہ پنجاب اور خیبرپختونخوا کے الیکشن کمشنرز کی مدت ملازمت بھی ختم ہورہی ہے۔
