وزیراعظم کے مراعاتی پیکیج اور ایف بی آر کی ٹیکس دہندگان کے لئے آگاہی اور سہولیات کی فراہمی سے متعلق بھرپورمہم کے نتیجے میں انکم ٹیکس گوشوارے جمع کرانے والوں کی تعداد میں خاطر خواہ اضافہ ہوا ہے .

رواں سال کے لئے فیڈرل بورڈ آف ریونیو کو 16 دسمبر 2013 تک 8 لاکھ انکم ٹیکس گوشوارے موصول ہوئے جبکہ گزشتہ سال کے اتنے ہی عرصے میں جمع کرائے گئے گوشواروں کی تعداد 7 لاکھ11 ہزار تھی ۔

ایف بی آر حکام کے مطابق رواں سال کے لئے جمع کرائے جانے والے ٹیکس گوشواروں کی تعداد میں مزید اضافہ متوقع ہے کیونکہ انکم ٹیکس گوشواروں کی ایک قابل ذکر تعداد ابھی اندراج کے مختلف مراحل میں ہے ۔

توقع کی جارہی ہے کہ جن ٹیکس دہندگان کو گوشوارے جمع کرانے کی مدت میں توسیع کی گئی ہے وہ بھی ایک یا دو ہفتوں میں اپنے گوشوارے جمع کرادیں گے ، اسی طرح وہ کمپنیاں جنہوں نے اپنے کھاتے 30 جون 2013 تک بند کئے ہیں انہیں 31 دسمبر 2013 تک گوشوارے جمع کرانے ہیں۔

توقع ہے کہ 31 دسمبر 2013 تک ان کمپنیوں کے 25 ہزار گوشواروں سمیت ایک لاکھ 25 ہزار مزیدگوشوارے جمع ہوں گے ۔

دسمبر کے چوتھے ہفتے کے دوران مہنگائی کی شرح میں 0.22فیصد کمی ریکارڈ کی گئی ، جبکہ کم آمدنی والے طبقے کے لئے بھی قیمتوں کے حساس اشاریئے میں 0.39 فیصد کمی ریکارڈ کی گئی ، پاکستان بیورو شماریات کے جاری کردہ اعداد و شمار کے مطابق 8 ہزار روپے تک کی ماہانہ آمدنی والے طبقے کیلئے 26 دسمبر کو ختم ہونے والے ہفتے کے دوران قیمتوں کا حساس اشاریہ 0.39 فیصد کمی سے 200.78 پوائنٹس سے کم ہو کر 200.00 پو ائنٹس تک پہنچ گیا ، جبکہ کمبائنڈ گروپ کیلئے قیمتوں کاحساس اشاریہ 0.22 فیصدکمی سے 209.7پوائنٹس سے کم ہو کر 209.27 پوائنٹس تک پہنچ گیا، اس ہفتے کے دورا ن زندہ مرغی ،کیلا، ادرک ، گندم اوربیف سمیت 8 اشیائے ضروریہ کی قیمتوں میں اضافہ ہوا، مونگ کی دال ، دال ماش ، مسور کی دال ، ٹماٹر،پیاز ، آلو ، چینی، گڑ، انڈے ، ایل پی جی ، اری چاول ، چائے ، آٹا ، ویجی ٹیبل گھی جبکہ اور سرخ مرچ سمیت 16 اشیائے ضروریہ کی قیمتوں میں کمی ریکارڈ کی گئی ، ادارہ شماریات کے مطابق پٹرول ،ڈیزل ،مٹی کاتیل،مٹن ، چنے کی دال، خوردنی تیل ، گیس کے نرخ ، بجلی کے نرخ ،تازہ دودھ ،دھی،دودھ پاؤڈر ، باسمتی چاول اور کھلا گھی سمیت 29 اشیائے کی قیمتوں میں استحکام رہا، ادارہ شماریات کے مطابق گزشتہ ہفتہ کے مقابلے میں آٹھ ہزار تا بارہ ہزارآمدنی ، بارہ ہزار تا اٹھارہ ہزار ، اٹھارہ ہزار تا پینتیس ہزار تک اور پینتیس ہزار روپے سے زائد آمدنی والے افراد کے گروپوں کیلئے قیمتوں کے حساس اعشاریے میں بالترتیب 0.32فیصد ، 0.28فیصد ، 0.22فیصد اور 0.15فیصدکمی ریکارڈ کی گئی

پاکستان اور بھارت کے درمیان دو طرفہ تجارت میں اضافے کے امکانات کا جائزہ لینے کے لیے ہندوستانی تاجروں کا ایک وفد فروری میں پاکستان کا دورہ کرے گا، انڈین فیڈریشن چیمبرآف کامرس اینڈ انڈسٹریزکے سیکریٹری جنرل ڈاکٹر دلدارسنگھ کے مطابق ہندوستانی وفد اپنے دورے کے دوران پاکستانی تاجروں اور حکام سے ملاقات کے علاوہ لاہور میں میڈ ان انڈیا نمائش کا انعقاد کرے گا، پاکستانی تاجروں کے ایک وفد سے ملاقات میں ڈاکٹر دلدار سنگھ نے پاکستانی وفد سے مطالبہ کیا کہ پاکستان اور ہندوستان کے درمیان دو طرفہ تجارت بڑھانے کے لیے ضروری ہے کہ رکاوٹوں کو دور کیا جائے، پاکستانی حکومت اس سلسلے میں یقین دہانی کرا چکی ہے مگر عملی اقدام نہیں کیے جا رہے، اس موقع پر سارک چیمبر آف کامرس اینڈ انڈسٹریز کے سینئر نائب صدر افتخار علی ملک نے زور دیا کہ تاجر برادری دونوں ممالک کے درمیان حالات سازگار کرنے کے لیے اپنا کردار ادا کرے، جس سے دو طرفہ تجارت میں اضافہ ہوگا اور کاروباری سرگرمیوں کو فروغ ملے گا

گورنر پنجاب محمد سرور نے کہا ہے کہ پاکستان کو یورپی یونین سے جی ایس ٹی پلس درجہ حاصل کرنے میں مشکلات کا سامنا کرنا پڑا۔ پاکستان کی سیاسی جماعتیں یورپی سیاسی پارٹیوں سے تعلقات بہتر بنائیں۔

کراچی میں آل پاکستان ٹیکسٹائل ملزایسوسی ایشن کے ساتھ میٹنگ کے دوران گورنر پنجاب کا کہنا تھا کہ فوکل گروپ بنا کر جی ایس پی پلس کے 27کنونشنل معیارات پرعمل کرنا ہمارا اولین ترجیح ہونا چاہئے، ذاتی طور پر جی ایس پی درجہ حصول کے لئے سو سے زائد یورپی ممبران کو پاکستان کے حق میں قائل کیا ۔.

اس موقع پر سابق چیئر مین اپٹماگوہرایوب کا کہنا تھا کہ ٹیکسٹائل انڈسٹری چند سالوں میں ملک کوخسارے سےنکالنے سمیت روزگارپھیلانے کا اہم زریعہ بنے گی،انہوں نے بتایا کہ ٹیکسٹائل برامدات کو تیراارب ڈالرسے چھبیس ارب ڈالر بڑھانے کا عزم رکھتے ہیں۔

ٓپاکستان نےآئی ایم ایف کو چودہ کروڑ ستر لاکھ ڈالر کا مزید قرض واپس کردیا۔ سستا ہوتا ڈالر ادائیگیوں کے دباؤ کے باعث جمعے کو مہنگا ہوگیا۔ پاکستان نے بین الاقوامی مالیاتی فنڈ کو 14 کروڑ 70 لاکھ ڈالر مالیت کی ایک اور قسط کامیابی سے ادا کردی ہے۔

اسٹیٹ بینک کے مطابق پاکستان نے آئی ایم ایف کو ایس بی اے قرض کی 25 ویں قسط ادا کی ہے۔۔پاکستان جولائی 2011 سے اب تک ایس بی اے پروگرام قرض کے 5 ارب 40 کروڑ ڈالر آئی ایم ایف کو ادا کرچکا ہے۔

ستمبر 2015 تک اسٹینڈ بائی ارینجمنٹ پروگرام کے مزید 2 ارب 10 کروڑ ڈالر پاکستان نے آئی ایم ایف کو ادا کرنا ہیں۔ ادھرادائیگیوں کے دباؤ کے باعث بے قدر ہوتے ڈالر کی قدر میں جمعے کو پھراضافہ دیکھا گیا۔

کرنسی ڈیلرز کے مطابق انٹربینک مارکیٹ میں روپے کے مقابلے میں امریکی ڈالر 14 پیسے مہنگا ہوکر105 روپے52 پیسےکا ہوگیا۔ اسی طرح اُوپن کرنسی مارکیٹ میں ڈالر کی قدر 25 پیسے بڑھکر 105 روپے 25 پیسے ہوگئی ۔