کندھکوٹ کے مختلف علاقوں میں کاروکاری کے الزام میں دو خواتین سمیت چار افراد قتل کردیے گئے، ذرائع کے مطابق آرڈی 109 تھانہ کی حدود میں گاؤں ببو جکھرانی میں ملزم الطاف نے اپنی اٹھارہ سالہ بیوی وڈیری اور اٹھارہ سالہ نوجوان دنگلو جکھرانی کو کاروکاری کے الزام میں فائرنگ کرکے قتل کیا اور فرار ہوگیا۔

 پولیس نے لاشیں تحویل میں لیکر پوسٹ مارٹم کے لئے اسپتال روانہ کردیں، جبکہ مذکورہ گاؤں کے قریب گاؤں ملاح جکھرانی مین ملزم ملاح جکھرانی نے اپنی بیوی 36 سالہ نور بخت اور 45 سالہ شخص کو فائرنگ کرکے قتل کردیا، ملزم واقعے کے بعد فرار ہوگیا، پولیس نے لاشوں کو پوسٹ مارٹم کیلئے روانہ کردیا تاہم پولیس نے کوئی ملزم گرفتار نہیں کیا اورنہ ہی کوئی مقدمہ درج کیا ہے ۔

 پیپلز پارٹی کے چئیر مین بلاول بھٹو زرداری نے  گڑھی خدا بخش  میں اپنی والدہ محترمہ بینظیر بھٹو،نانا ذولفقار علی بھٹو نانی نصرت بھٹو ، ماموں  مرتضیٰ اور شاہنواز بھٹو کے مزاروں ہر فاتحہ پڑھی  اور پھولوں کی چادریں چڑھائیں۔

 اس موقع پر ان کے ہمراہ پیپلز پارٹی لاڑکانہ ضلع کے متعدد عہدیداران موجود تھے۔ بلاول بھٹو کی مزار پر آمد سے قبل پولیس نے مزار کو عام افراد سے خالی کروا دیا تھا جب کے مزار پر حاضری کے دوران پولیس اور رینجرز کی بھاری نفری مزار پر تعینات رہی۔

 بعد ازاں وہ مزار پر آدھے گھنٹے سے زائد گذارنے کے بعد واپس نوڈیرو ہاوس پہنچ گئے۔

وزیراطلاعات سندھ شرجیل میمن کاکہناہے بی بی شہید کی برسی پر بلاول بھٹو اور آصف علی زرداری کا خطاب تاریخی تھا، خطاب حقائق پرمبنی تھا، تنقید کرنے والے حقیقت کا سامنا نہیں کرنا چاہتے۔

شرجیل میمن نےاپنے بیان میں کہاہے کہ جن جماعتوں میں دہشت گردوں کو دہشت گرد کہنے کی جرات نہیں وہ عوام کیلئے کیا کریں گے ، منافقت اور سیاست میں بڑا فرق ہے،رہنماؤں کا کام عوام کی ترجمانی ہوتا ہے دہشت گردوں کی نمائندگی نہیں۔

شرجیل میمن کاکہناہے کہ پیپلزپارٹی کی قیادت نے جمہوریت، عوام اور ملک کیلئے جان کے نذرانے دیئےجس کی مثال کی نہیں ملتی۔

شرجیل میمن نے کہا کہ بلاول بھٹو زرداری پاکستانی قوم کیلئے امید کی کرن ہیں۔