کراچی میں تائی کوانڈو کھیل کو فروغ دینے کے لئے انٹر اسکول چیمپئین شپ کا انعقاد کیا گیا۔ ویمنز اسپورٹس کمپلیکس میں ہونے والی انٹر اسکول تائی کوانڈو چیمپئین شپ میں کراچی کے بیس اسکولوں کے بچوں نے شرکت کی۔

ایونٹ میں تین سال سے پندرہ سال تک کے بچوں اور بچیوں کے درمیان مقابلے کرائے گئے۔چھوٹے بچے بے خوف خطر حریف کھلاڑیوں پر حملہ بھی کرتے اور خود کو محفوظ رکھنے کے لئے بچاؤ بھی کرتے رہے۔

گرتے چوٹ بھی کھاتے لیکن مقابلہ جاری رکھتے۔بچے کہتےہیں فٹ رہنے کے لئے تائی کوانڈو اچھا کھیل ہے۔  ماں باپ بھی تائی کوانڈو میں اپنے بچوں کی دلچسپی سے محظوظ ہوئے۔

کہتے ہیں اس کھیل سے انہیں خود کا بچاؤ کرنے میں مدد ملتی ہے۔  ایونٹ میں بچوں کی کارکردگی کو دیکھ کر کہا جاسکتا ہے کہ پاکستان میں ٹیلنٹ کی کوئی کمی نہیں

ارجنٹائن میں ہونے والی ڈاکار ریلی کا ساتواں مرحلہ اسپین کے کارلوس سینز نے جیت لیا۔ نینی روما کی مجموعی برتری برقرار ہے۔ ارجنٹائن کے گرد ونواح میں ہونے والی ریس کا ساتواں مرحلہ پانچ سو تینتیس کلو میٹر پر محیط تھا۔

ایونٹ کے شرکا  نے بولیویا میں ساتویں مرحلے کا اختتام کیا۔ اسپین کے کارلوس سینز نے تمام حریفوں کو پیچھے چھوڑتے ہوئے ریس اپنے نام کی۔ اسپینش ڈرائیور نے مقررہ فاصلہ چار گھنٹے تینتالیس منٹ اور اٹھائیس سیکنڈز میں سب سے پہلے طے کیا۔

سینز کے ہم وطن نینی روما کو ستائیس گھنٹے کے ساتھ مجموعی برتری حاصل ہے۔ موٹربائیک ریس میں اسپین کے یوآن بریڈا فاتح رہے۔ مارک کوما مجموعی طور پر لیڈ کررہے ہیں۔ ریلی کا آٹھواں مرحلہ چلی میں ہوگا۔

سہ ملکی ویمنز کرکٹ ٹورنامنٹ میں پاکستان نے جنوبی افریقہ کو چار وکٹوں سے شکست دے دی۔
دوحہ میں کھیلے جانے والے میچ میں جنوبی افریقی ویمنز ٹیم نے ٹاس جیت کر پہلے بیٹنگ کا فیصلہ کیا۔ پاکستان کی نپی تلی بولنگ کے سامنے حریف ٹیم بڑا اسکور کرنے میں کامیاب نہ ہوسکی۔

جنوبی افریقہ نے مقررہ اوورز میں آٹھ وکٹوں پر ایک سو پچیس رنزبنائے۔ ندا ڈار نے چارکھلاڑیوں کو آؤٹ کیا۔ جواب میں پاکستان ویمنز نے مطلوبہ ہدف آخری اوور میں چھ وکٹوں کے نقصان پر حاصل کرلیا۔ بسمعہ معروف ساٹھ رنز بناکر نمایاں رہیں۔ یہ ایونٹ میں پاکستان کی مسلسل دوسری کامیابی ہے۔

سال کے پہلے گرینڈ سلم آسٹریلین اوپن ٹینس ٹورنامنٹ کا آغاز ہوگیا۔ سابق عالمی نمبر ایک امریکہ کی وینس ولیمز پہلے راؤنڈ میں اپ سیٹ شکست کے بعد ایونٹ سے باہر ہوگئیں۔ میلبورن میں شروع ہونے والے سال کے پہلے گرینڈ سلم میں دنیا کے بہترین کھلاڑی ایکشن میں ہیں۔

ایونٹ کا آغاز پہلے بڑے اپ سیٹ کے ساتھ ہوگیا۔ امریکہ کی وینس ولیمز کو روسی کھلاڑی نے ابتدائی مرحلے میں شکست دے کر ایونٹ سے باہر کردیا۔ روس کی کیترینا ماکاروا نے ایک سیٹ کے خسارے میں جانے کے باوجود وینس ولیمز کو زیر کیا۔

سات مرتبہ کی گرینڈ سلم ونر وینس کو دو چھ، چھ چار اور چھ چار کے اسکور کے ساتھ ناکامی کا سامنا کرنا پڑا۔ گزشتہ سال بھی آسٹریلین اوپن کے چوتھے راؤنڈ میں وینس کو روسی کھلاڑی نے مات دی تھی۔

دبئی ٹیسٹ میں سری لنکا نے پاکستان کو نو وکٹوں سے شکست دے کر سیریز میں ایک صفر کی برتری حاصل کر لی۔ سیریز کا تیسرا اور آخری میچ سولہ جنوری کو شارجہ میں کھیلا جائے گا۔     کھیل کے فیصلہ کن روز سب کی نگاہیں پاکستانی وکٹ کیپر سرفرازاحمد پرمرکوز تھیں جو سنھبل کر کھیل رہے تھے۔

مگر وہ اسکور میں مزید چار رنز کا اضافہ کرکے چوہتر رنز پر پویلین لوٹ گئے۔ وکٹ کیپر کے آؤٹ ہوتے ہی دیگر کھلاڑیوں کی ہمت ٹوٹ گئی اور ٹیم تین سو انسٹھ رنز پر آؤٹ ہوگئی۔ سرفرازاحمد کے ساتھ مصباح الحق ستانوے،یونس خان ستتر رنز بناکر نمایاں رہے۔

سورنگا لکمل نے چار وکٹیں حاصل کی۔ سری لنکا کو جیت کیلئے ایک سو سینتس رنز کا ہدف ملا۔ جو اوپنرز کی عمدہ کارکردگی کی بدولت باآسانی حاصل کرلیا گیا۔ کوشل سلوا نے اٹھاون رنز بنائے۔ کورونارتنے نے باسٹھ رنز کی ناقابل شکست اننگز کھیلی۔

اے آر وائی ڈیجیٹل نیٹ ورک کے سینئر وائس پریذیڈنٹ آپریشنز طارق وصی نے سری لنکن بیٹسمین کوشل سلوا کو آروائی گولڈ بار پیش کیا ۔ سیریز میں سری لنکا کو ایک صفر کی سبقت حاصل ہے۔ آخری معرکہ سولہ جنوری سے شارجہ میں شروع ہوگا۔