کراچی :اندرون سندھ اور کراچی میں باران رحمت اور خشک سالی کے خاتمے کیلئے نما ز استسقاء کا اہتمام کیا گیا ۔سائٹ ایسوی ایشن کے اراکین عہدیدار اور تاجروں سمیت شہریوں کی بڑی تعداد شریک ہوئی ،کراچی سمیت اندرون سندھ میں باران رحمت اور خشک سالی کے خاتمے کیلئے نما ز استسقاء کا اہتمام کیا گیا اور بارش کی دعائیں کی گئیں
کراچی میں سائٹ ایسوی ایشن کی جانب سے نما ز استسقاء اداکی گئی۔ سائٹ ایسوی ایشن کے اراکین ، عہدیدار اور تاجروں سمیت شہریوں کی بڑی تعداد نے نماز اداکی اور بارش کے لئے خصوصی دعائیں کی گئیں ۔
ٹور ڈی فرانس سائیکل ریس کا پندرہواں مرحلہ ناروے کے ایلگزینڈر کرسٹوف نے جیت لیا۔ اٹلی کے ونسینزو نیبالی کی مجموعی برتری برقرار ہے۔ ٹور ڈی فرانس سائیکل ریس کا پندرہواں مرحلہ دو سو بائیس کلو میٹر پر مشتمل تھا۔ ناروے کے ایلگزینڈر کرسٹوف نے آخری لمحات میں بازی جیت میں تبدیل کردی۔
ناروے کے رائڈر نے فنشنگ لائن سے سو میٹر پہلے ہی برق رفتاری کا مظاہرہ کیا اور تمام حریفوں کو پیچھے چھوڑتے ہوئے کامیابی حاصل کرلی۔ ایلگزینڈر نے چار گھنٹے چھپن منٹ اور بیالیس سیکنڈز میں مقررہ فاصلہ سب سے پہلے طے کیا۔
یہ ایونٹ میں ناروے رائڈر کی دوسرے کامیابی ہے۔ اٹلی کے ونسینزو نیبالی کو ریس لیڈر کی یلو جرسی حاصل ہے۔ اٹالین رائڈر چھیاسٹھ گھنٹے انچاس منٹ اور سینتیس سیکنڈز کے ساتھ لیڈ کررہے ہیں۔ ریس میں آج آرام کا دن ہے۔۔ ایونٹ کا اختتام ستائیس جولائی کو ہوگا۔
فیصل آباد :رکن صوبائی اسمبلی شعیب ادریس کی گرفتاری کے لیے آنے والی پولیس نے اسکے دو ساتھیوں کو گرفتارکرلیا ۔ایم پی اے کو عبوری ضمانت سے روکنے کے لئے عدالتوں میں پولیس نے بھاری نفری تعینات کردی۔ پنجاب اسمبلی کے رانا شعیب ادریس کو پولیس گرفتار کرنے آئی تھی تاہم رکن اسمبلی کے نہ ملنے پر اس کے دو ساتھیوں کو اپنے ہمراہ لے گئی۔
مقامی ایم پی اے پر الزام ہے کہ اس نے قتل اور دہشت گردی کے مقدمات میں ملوث اپنے رشتہ دار ذوالفقار، اللہ رکھا، شہزاد، علی رضا اور خاور علی کو پناہ دی تھی۔ پولیس نےایم پی اےکے ڈیرے پر چھاپہ مارکران پانچوں ملزمان کو گرفتار کیا جس کے بعد ایم پی اے شعیب ادریس نے اپنے پچاس ساٹھ ساتھیوں کے ہمراہ تھانے پر دھاوا بول دیا اور مبینہ طور پر توڑ پھوڑ کی.
، ایک سب انسپکٹر پر تشدد کیا اور ہتھکڑیوں میں جکڑے پانچوں گرفتار قیدیوں کو چھڑا کر لے گیا تھا جس کا مقدمہ ایم پی اے کے خلاف درج کر لیا گیا تھا ۔ایف آئی آر میں پولیس نے ایم پی اے کا نام درج کرنے سے گریز کرتے ہوئے اسے صرف سیاسی شخصیت لکھا جبکہ فرار ملزمان کی دوبارہ گرفتاری کے لیے چھاپے مارے جا رہے ہیں۔
پشاور :حیات آباد سے لاپتہ ہونے والا سری لنکن غیر ملکی باشندہ کا اغوا کاروں کی بجائے پولیس کی مبینہ قید میں رہنے کا انکشاف ۔اے آر وائی نیوز نے فوٹیج حاصل کرلی ،تفصیلات کے مطابق بیس روز سے پولیس آنکھ مچولی کھیل رہی ہے کبھی تھانوں میں چھپا تی ہے کبھی سلاخوں کے پیچھے کبھی تہ خانوں میں حیات آباد سے لاپتہ ہونے والا غیر ملکی باشندہ محمد زمان کی روداد اے آر وائی نیوز نے فلم بند کر لی۔
محمد زمان سری لنکا کا باشندہ ہے ،خیال کیا جارہا تھا کہ محمد زمان کو اغواء کیا گیا لیکن انکشاف ہوا کہ وہ پولیس کی قید میں ہے، ستائیس جون کو جب عدالت میں اسے پیش کیا گیا تو جرم ثابت نہ ہونے پر عدالت نے رہائی کے احکامات جاری کئے۔ اے آر وائی نیوز سے بات کرتے ہوئے محمد زمان نے کہا کہ اس پر کوئی جرم ثابت نہیں ہوا پھر بھی پولیس نے قید کر رکھا ہے۔غیر ملکی باشندے کی فوٹیج بننے کے بعد سری لنکن باشندے کو پولیس نے پھر غائب کردیا۔
کراچی :عدالتی احکامات کے باوجود چھ فیصد سے زائدغیرملکی مواد دکھانے پرجیوگروپ کے خلاف توہین عدالت کی درخواست سندھ ہائیکورٹ میں دائرکردی گئی۔ مٹھی کی عدالت نے بھی میرشکیل کے خلاف مقدمہ درج کرنے کا حکم دے دیا۔ جیوگروپ نے عدالتی احکامات ہوا میں اڑا دیئے اور عدالتی حکم اورحلف کے باوجود غیرملکی موادنشرکرنے میں کمی نہیں کی ۔
سندھ ہائیکورٹ میں جنگ اور جیوگروپ کے خلاف توہین عدالت کی پٹیشن دائر کردی گئی۔ درخواست گزار محفوظ یار خان نے موقف اختیارکیا ہے کہ جیوپیمرا قوانین کی خلاف ورزی کرتے ہوئےغیرملکی مواد چھ فیصد سے زیادہ نشرکرررہا ہے۔ درخواست میں سابق چیئرمین پیمرا پرویز راٹھور،میر شکیل الرحمان، میر ابراہیم الرحمان کو فریق بنایا گیاہے۔ پیمراقوانین کے مطابق مجموعی طور پر چینلز کو چھ فیصد غیرملکی اور چار فیصد انگلش مواد دکھانےکی اجازت ہے۔ دوسری جانب گستاخانہ نشریات دکھانےپرمٹھی کی عدالت نےبھی میر شکیل اور دیگرکیخلاف مقدمہ درج کرنے کا حکم دیاہے
میر پورآزاد کشمیر: مسافر بس حا دثہ کا شکار ہوگئی ، جاں بحق افراد کی تعدادسولہ تک پہنچ گئیں۔
میر پور سے سماہنی جانے والی مسافر بس حادثے کا شکار ہوگئی، بس میں ساٹھ کے قریب مسافر سوار تھے، حادثے کے بعد امدادی ٹیمیں جائے وقوعہ پر پہنچ گئیں، دشوار گزار راستوں کے باعث رضاکاروں کومشکلات کا سامنا کرنا پڑا، امدادی کارروائیاں جاری ہیں۔
ہلاک ہونیوالوں اور زخمیوں کو میر پور آزادکشمیر اور بھمبر کے اسپتالوں میں منتقل کیا جاچکا ہے، پولیس نے جائے وقوعہ پر پہنچ کر حادثے کی تحقیقات شروع کردی ہیں۔
ادھر وزیر اعلی پنجاب شہباز شریف نے قیمتی انسانی جانو ں کے ضیاع پر گہرے دکھ کا اظہار کیا ہے، امیر جماعت اسلامی سراج الحق نے بھی متاثرہ خاندانوں سے دلی ہمدردی اور تعزیت کا اظہار کیا۔
اسلام آباد: رواں مالی سال پاکستان آئی ایم ایف کو ایک ارب تیس کروڑ ڈالر قرض کی ادائیگی کی مد میں ادا کرے گا۔
وزارت خزانہ کے مطابق رواں مالی سال حکومت نے بجٹ کا بیالیس اعشاریہ ایک فیصد حصہ قرضوں کی ادائیگی کیلئے مختص کیا ہے جبکہ رواں مالی سال پاکستان کوایک ارب تیس کروڑ ڈالر آئی ایم ایف کو قرض کی مد میں ادا کرنا ہیں ۔
دوسری جانب حکومتی قرضوں کا حجم آئی ایم ایف کے مقرر کردہ ہدف سے تجاوز کر گیا ہے، تیس جون کو ختم ہونے والی سہماہی میں اسٹیٹ بینک سے قرضوں کا حجم تیئس سو اٹھائیس ارب روپے تھا، جو مقررہ ہدف سے اٹھاسی ارب روپے زائد ہے۔
اسلام آباد: سیکورٹیز اینڈ ایکسچینج کمیشن ( ایس ای سی پی ) نے انضباطی قوانین پورے نہ کرنے اور حسابات، اکاﺅنٹینٹ اور آڈٹ کے قواعد و ضوابط پورے نہ کرنے پر کراچی اور لاہور اسٹاک ایکسچینج کے کئی بروکروں کو شو کاز نوٹس جاری کئے اور جرمانے بھی عائد کئے گئے۔
ایس ای سی پی نے یونائیٹڈ بینک لمیٹڈ اور پاکستان پٹرولیم لمیٹڈ کے حصص کی اسٹاک مارکیٹ کے ذریعے فروخت کی بھی منظوری دی، ایس ای سی پی کے سیکورٹیز مارکیٹ ڈویژن نے پچھلے تین ماہ کے دوران اسٹاک بروکروں کی آن سائٹ انسپکشن اور آڈٹ کے نتیجے میں جرمانے کئے۔
مزید براں چھ لسٹڈ کمپنیوں کے ڈائریکٹرز کے خلاف کمپنیز آرڈیننس کے سکیشن 224 کے تحت سالانہ ریٹرن جمع کروانے میں تاخیر پر آرڈر جاری کئے گئے جبکہ 29 کمپنیوں کے ڈائریکٹرز کو انتباہ کے لیٹر جاری کئے گئے۔
ہیمبرگ : ارجنٹینا کے لیونارڈو مائر نے اسپین کے ڈیوڈ دفیررر کو اپ سیٹ شکست دیتے ہوئے ہیمبرگ ماسٹرز ٹینس ٹورنامنٹ جیت لیا۔
ارجنٹینا کے کھلاڑی نے کیرئیر کا پہلا اے ٹی پی ٹائٹل اپنے نام کیا ہے، حتمی معرکے میں میئر نے سنسنی خیز مقابلے کے بعد ٹاپ سیڈ اسپین کے ڈیوڈ فیررر کو تین سیٹ کے مقابلے کے بعد زیر کیا۔
فیررر پہلا سیٹ جیتنے کے باوجود میچ میں کامیابی حاصل نہ کرسکے، ارجنٹائن کھلاڑی نے آخری دونوں سیٹس میں عمدہ کھیل پیش کیا اور فیررر کو کم بیک کا کوئی موقع نہیں دیا۔
فیصلہ کن سیٹ ٹائی بریک تک کیا جس میں میئر نے میدان مارلیا، ارجنٹینا کھلاڑی کی فتح کا اسکور چھ چار، چھ ایک اور سات چھ رہا۔
ہوکنہم : جرمنی کے نیکو روزبرگ نے ہوم سرکٹ پر میدان مارلیا، روزبرگ کو چیمپئین شپ ٹیبل پر مجموعی برتری حاصل ہے۔
ہوکنہم سرکٹ پر ریس کا آغاز جرمنی کے روز برگ نے پول پوزیشن سے کیا اور سیزن میں ایک اور ریس اپنے نام کرلی، روزبرگ انیس سو چون کے بعد جرمن سرکٹ پر ریس جیتنے والے پہلے جرمن رائڈر ہیں۔
اس کامیابی کی بدولت جرمن ڈرائیور چیمپئین شپ ٹیبل پر ایک سو نوے پوائنٹس کے ساتھ لیڈ کر رہے ہیں۔
روزبرگ نے ریس کے آغاز سے ہی برتری کو قائم رکھا اور مقررہ فاصلہ ایک گھنٹہ تینتیس منٹ بیالیس اعشاریہ نو ایک چار سیکنڈز میں طے کیا، روزبرگ کے ٹیم میٹ سابق چیمپئین برطانیہ کے لوئس ہملٹن تیسرے نمبر پر رہے۔
