لاہور: وزیراعلٰی شہباز شریف نے سماج دشمن عناصر پر کڑی نظر رکھنے کی ہدایت کرتے ہوئے کہا ہے کہ پاک فوج ملک کی بقا کی جنگ لڑ رہی ہے، وزیراعلی پنجاب نے سیکورٹی انتظامات سے متعلق قانون نافذ کرنےوالےاداروں کی کارکردگی پر اطمینان ظاہر کرتے ہوئے کہا کہ صوبے کے عوام کی جان ومال کا تحفظ حکومت کی اولین ترجیح ہے۔
لاہور میں وزیراعلیٰ شہبازشریف کی زیرصدارت امن و امان کا جائزہ لینے سے متعلق اعلیٰ سطح کا اجلاس ہوا، اجلاس میں صوبے کی مجموعی صورتحال اور سیکیورٹی اقدامات کا جائزہ بھی لیا گیا۔ وزیر اعلی پنجاب شہباز شریف کو رائیاں پنڈ واقعے کی رپورٹ پیش کردی گئی، اجلاس میں پنڈ رائیاں میں دہشت گردوں کے خلاف آپریشن کے دوران شہید ہونے والے سکیورٹی ادارے کے اہلکار صابر حسین کی جرآت اور بہادری کو خراج عقیدت پیش کیا گیا اور شہید کے ایصال ثواب کیلئے دعا بھی کی گئی۔
وزیراعلٰی پنجاب نے کہا کہ شہید صابر حسین پوری قوم کا ہیرو ہے، ملک و قوم کے محفوظ اور پرامن مستقبل کیلئے اپنی جانیں قربان کرنے والوں کو سلام پیش کرتے ہیں، شہباز شریف نے شہید اہلکار کے ورثاء کیلے ایک کروڑ روپے اور زخمی اہلکاروں کیلئے دس دس لاکھ روپے امداد کا اعلان کیا۔
وزیراعلی پنجاب نے صوبے میں سیکورٹی انتظامات کے بارے میں قانون نافذ کرنے والےاداروں کی کارکردگی پر اطمینان ظاہر کیا، ان کا کہنا تھا کہ صوبے کے عوام کی جان ومال کاتحفظ حکومت کی اولین ترجیح ہے۔۔ شمالی وزیر ستان آپریشن کے حوالے سے بات کرتے ہوئے وزیر اعلی پنجاب نے زخمی ہونے والوں کی جلدصحتیابی کےلئےدعا بھی کی۔
وزیراعلیٰ نے صوبہ بھر میں سکیورٹی انتظامات کو مزید بہتر بنانے کی ہدایت کرتے ہوئے کہا کہ یوم شہادت حضرت علی کرم اللہ وجہہ کے موقع پر جلوسوں کی کڑی نگرانی کی جائے اور طے شدہ سکیورٹی پلان پر عملدرآمد یقینی بنایا جائے، پنجاب کے داخلی اور خارجی راستوں پر سخت چیکنگ کے ساتھ ڈیجیٹل ٹیکنالوجی سے مانیٹرنگ کو یقینی بنایا جائے۔ اجلاس کے دوران سیکرٹری داخلہ نے امن و امان کی صورتحال کے حوالے سے بریفنگ بھی دی۔
