گریم سوان نے انٹرنیشنل کرکٹ سے اچانک ریٹائرمنٹ لے لی۔ آسٹریلیا کیخلاف جوابی ایشیز سیریز انگلش ٹیم پہلے ہی ہار چکی ہے۔اب انکے تجربہ کار اسپنر گریم سوان نے اچانک کرکٹ سے ریٹائرمنٹ کا اعلان کرکے اپنی ٹیم کو ایک اور صدمہ دے دیا ہے۔

انگلش کرکٹ ٹیم کے تجربہ کار اسپنر گریم سوان نے ایشیز سیریز کے دوران ہی اچانک انٹرنیشنل اور فرسٹ کلاس کرکٹ سے ریٹائرمنٹ کا اعلان کردیا ہے۔ انگلینڈ کو ایشیزسیریز میں شکست ہو چکی ہے اورچوتیس سالہ اسپنرگریم سوان نے اعلان کیا ہے کہ وہ سیریز کے باقی میچوں میں حصہ نہیں لین گے۔ وہ سیریز کے دوران سات وکٹیں حاصل کرسکے۔

گریم سوان نے انگلینڈ کے لیے ساٹھ ٹیسٹ میچ کھیلتے ہوئے دو سو پچپن وکٹیں حاصل کیں ۔۔۔اناسی ون ڈے میچز میں وہ ایک سو چار کھلاڑیوں کو اپنا شکار بناسکے۔

پاکستان اور سری لنکا کے درمیان ون ڈے سیریز اب ایک ایک سے برابر ہوچکی ہے۔ سیریز کا تیسرا میچ آج شارجہ میں کھیلا جائیگا۔ دو میچوں میں پاکستانی بلے بازوں نے پرفارم کیا مگر بولرز جلد وکٹیں حاصل نہ کرسکے۔

متحدہ عرب امارات میں جاری سیریز کے دوسرے ون ڈے میں سری لنکا نے کامیابی حاصل کرکے قومی ٹیم کی برتری کا خاتمہ کردیا ہے۔ ابتدائی دو میچوں میں کانٹے کے مقابلے دیکھنے کو ملے۔ پاکستان نے پہلا میچ بڑی مشکل سے بچایا تھا مگر دوسرے مقابلے میں لنکن لائنز کے ٹیل اینڈرز بھی آخری دم تک ڈٹے رہے اور میچ جیت کے سیریز برابر کرڈالی۔

پاکستانی بلے بازوں نے کنڈیشنز کا فائدہ اٹھانا اب شروع کردیا ہے۔ مگر بولرز سری لنکن ٹیل اینڈرز کے سامنے بھی بے بس ہورہے ہیں جو کہ حیران کن بات ہے۔ تیسرے مقابلے کیلئے پاکستانی ٹیم کو ہوم ورک کرنا ہوگا۔

بیٹسمینو ں کو بڑا اسکور کرنے کی ضرورت ہے جبکہ بولرز کو کم رنز دیکر جلد وکٹیں حاصل کرنا ہونگی۔ شائقین کو بھی معلوم ہے کہ سری لنکا کے خلاف فتح سمیٹنا قومی ٹیم کے لئے اتنا آسان نہیں ہوگا۔

لیکن گرین شرٹس کو بھی منصوبہ بندی اور جارحانہ حکمت عملی کے ساتھ میدان میں اترنا ہوگا۔