زبیر ملک کی قیادت میں پاکستانی تاجروں کا پینسٹھ رکنی وفدجنوبی ایشیاء کے کاروباری رہنماؤں کے پانچویں اجتماع میں شرکت کے لئے بھارت پہنچ گیا، ایف پی سی سی آئی کے صدر زبیر احمد ملک کی قیادت میں پاکستان سے کاروباری برادری کا پینسٹھ رکنی وفد بھارت پہنچ گیا۔

جہاں وہ سولہ جنوری سے جنوبی ایشیاء کے کاروباری رہنماؤں کے پانچویں اجتماع میں شرکت کریں گے۔پاکستانی وفد میں بزنس مین پینل کے صدر طارق سعید، ساک چیمبر کے نائب صدر افتخار علی ملک ، وفاقی چیمبر کے نامزد صدر زکریا عثمان اوردیگر تاجر رہنما شریک ہیں۔

اجلاس میں پاکستان وزیر تجارت خرم دستگیر خان سمیت افغانستان، بھوٹان، مالدیپ، سری لنکااور نیپال کے وزراء و اعلیٰ حکام شرکت اور علاقائی تعاون بڑھانے پر مزاکرات کرینگے جبکہ بھارت کے وزیر تجارت آنند شرما کل نئی دہلی میں اجتماع کا افتتاح کرینگے۔

اجلاس میں باہمی تعلقات اور تجارت بڑھانے کے لئے اہم فیصلے جبکہ پاکستان اور بھارت کے وزرائے تجارت کے مابین اہم ملاقات متوقع ہے۔زبیر احمد ملک کے مطابق کاروباری برادری جنوبی ایشیاء میں پائیدار امن اور تجارت میں اضافہ کے لئے قابل قدر کوششیں کر رہی ہے، مگر بعض سفارشات پر عمل درامد میں اتنی تاخیر ہو جاتی ہے کہ ساری کوشش کا مقصد ہی فوت ہو جاتا ہے۔

سیکورٹیز اینڈ ایکسچینج کمیشن (ایس ای سی پی )نے ملک میں گڈ گورننس کے فروغ اور لسٹڈ کمپنیوں کے لئے قوائد میں عمل درآمد آسان بنانے کے پیش نظر کوڈ آف کارپوریٹ گورننس میں ترامیم متعارف کرادی ہیں، ان ترامیم کے ذریعے لسٹڈ کمپنیوں کے لئے چیف فنانشل آفیسر اور کمپنیوں کے انٹرنل آڈٹ کے سربراہ کے تقرر کے لئے اہلیت کی شرائط میں نرمی کی گئی ہے۔

کوڈ میں ترمیم کے ذریعے لسٹڈ کمپنی کے چیف فنانشل آفیسر اور چیف آڈٹ آفیسر کے لئے فیلڈ میں متعلقہ تجربہ کی حد پانچ سال سے کم کر کے تین سال کر دی گئی ہے ، قواعد کے مطابق کسی میں کمپنی میں آڈٹ یا اکاونٹنگ ڈیپارمنٹ میں کام کرنے کا تجربہ ہی متعلقہ تجربہ میں شمار ہو گا۔

اس کے علاوہ لسٹڈ کمپنیوں میں آڈٹ کمیٹی کے لئے انڈیپنڈنٹ (آزاد) چیئرمین تعینات کرنے کی لازمی شرط میں بھی نرمی کر دی گئی ہے اور اب لسٹڈ کمپنیاں رضاکارنہ طور پر آڈٹ کمیٹی کے لئے خود مختار چئیرمین تعینات کرنے میں آزاد ہوں گی، اس طرح کمپنی کے نان ایگزیکٹو ڈائریکٹر کو چیئرمین آڈٹ کمیٹی تعینات کیا جا سکے گا، ان ترامیم سے فنانس اور آڈٹ کی فیلڈ میں نئے آنے والوں کے لئے بھی آسانی پیدا ہو گی۔

رواں مالی سال 2013-14ء کی پہلی ششماہی جولائی تا دسمبر 2013ء  کے دوران درآمدات میں کمی اور برآمدات میں اضافے کے نتیجے میں ملکی تجارتی خسارے میں گذشتہ سال کے مقابلے میں 8.75 فیصد کی ریکارڈ کمی ہوئی، ادارہ برائے شماریات پاکستان پی بی ایس کے اعداد و شمار کے مطابق گذشتہ مالی سال کے دوران جولائی تا دسمبر 2013-14ء کے دوران ملکی برآمدات میں 5.11 فیصد اضافہ ریکارڈ کیا گیا۔

ملکی برآمدات جولائی تا دسمبر 2013ء کے دوران 12ارب 2کروڑ 40لاکھ ڈالر سے تجاوز کر کے 12ارب 63کروڑ 90 لاکھ ڈالر تک پہنچ گئیں، جبکہ درآمدات اس عرصہ کے دوران 21ارب 92کروڑ سے کم ہوکر 21ارب 67کروڑ ڈالرہوگئیں ہیں ، اس طرح درآمدات میں 1.14 فیصد کمی ریکارڈ کی گئی ، جس کے نتیجے میں ملکی تجارتی خسارہ 9ارب 3کروڑ20لاکھ ڈالر رہا ،جبکہ گذشتہ مالی سال کی پہلی ششماہی کے دوران تجارتی خسارہ 9ارب 89کروڑ 80لاکھ ڈالر رہا۔

وزارت منصوبہ بندی و ترقی نے مالی سال 2013 – 14ء کی پہلی ششماہی کے دوران پی ایس ڈی پی کے تحت 166 ارب97 کروڑ روپے جاری کئے ، وزارت منصوبہ بندی کے جاری کردہ اعداد شمار کے مطابق جنوری کے پہلے ہفتے تک ادارہ برائے بحالی قدرتی آفات و زلزلہ متاثرین (ایرا) کے لئے 4ارب 53کروڑ روپے سے زائد جاری کئے۔

پاکستان اٹامک انرجی کمیشن کے لئے پی ایس ڈی پی میں33ارب 31کروڑ روپے سے زائد ، صحت کی سہولیات کیلئے 10ارب 50کروڑ روپے ، پانی اور بجلی ڈویژن کیلئے 16ارب 23کروڑ روپے ، فنانس کے لئے 2ارب 98کروڑ اور کیبنٹ ڈویژن کیلئے 95کروڑ روپے سے زائد جاری کئے گئے ، پہلی اور دوسری سہ ماہی کے دوران 20 فی صدجبکہ تیسری اور چوتھی سہ ماہی کے دوران 30فی صد بجٹ رکھا گیا ہے ۔

اسٹیٹ بینک نےکہا ہے کہ قومی سلامتی کو درپیش خطرات اور مخدوش امن وامان ملک کی معاشی ترقی میں رکاوٹ بنے ہوئے ہیں۔۔رواں مالی سال پاکستان کی معاشی شرح نمو تین سے چار فیصد اورمہنگائی میں اضافے کی شرح دس سے گیار فیصد کے درمیان رہے گی۔

اسٹیٹ بینک کی جاری کردہ سالانہ معاشی جائزہ رپورٹ میں کہا گیا ہےکہ مالی سال دوہزارتیرہ میں سرکاری اداروں میں بدانتظامی دورنہ ہوسکی۔ ٹیکس کا دائرہ نہ بڑھ سکا۔۔ہدف سے ہٹ کرسبسڈیز دینے پربھی قابونہ پایا جاسکا۔بجلی کی چوری اورضائع ہونےکے معاملات جوں کے توں رہے۔

نجی شعبہ کی بحالی اورمعیشت کو دستاویزی بنانے میں ناکامی کا منہ دیکھنا پڑا۔رپورٹ کےمطابق گذشتہ مالی سال میں پاکستان کی معاشی شرح نمو 3.6 فیصد رہی۔۔ مہنگائی میں اضافے کی شرح ڈبل ڈیجٹ سےکم ہوکر سنگل ڈیجٹ میں7.4 فیصد پرآگئی۔مالی سال2013 میں مسلسل تیسرے سال گردشی قرضہ ادا کرکے شعبہ توانائی کوسہولت دی گئی۔

بجٹ خسارہ مقررہ ہدف 4.7 فیصد کے بجائے آٹھ فیصد تک جا پہنچا۔۔ دوران سال حکومت نے940 ارب روپے بینکوں سےاور507 ارب روپے اضافی اسٹیٹ بینک سے قرض لیا۔۔جس سے پاکستان کا ملکی قرضہ 19 کھرب روپے بڑھ گیا جومالی سال 2012 سے 24.6 فیصد زیادہ ہے۔

اسٹیٹ بینک کےمطابق آئی ایم ایف کےنئے پروگرام اوردیگربین الاقوامی مالی ادارو ں سےمتوقع مالی امداد ملنےسےاس سال ملکی کرنسی مارکیٹس میں استحکام آنا چاہیئے۔