امریکی وزیر خارجہ جان کیری نے سعودی عرب کے شاہ عبداللہ اور سعودی وزیر خارجہ شہزادہ سعود الفیصل بن عبدالعزیز آل سعود سے ملاقات کی۔
امریکی وزیر خارجہ جان کیری اسرائیل کا دورہ مکمل کرکے سعودی عرب پہنچ گئے، جہاں انہوں نے سعودی عرب کے شاہ عبداللہ سے ملاقات کی، ملاقات میں انہوں نے مشرقی وسطی میں قائم امن کے حوالے سےتبادلہ خیال کیا۔
امریکی وزیر خارجہ جان کیری کا دورہ اسرائیل اور فلسطین کے درمیان امن معاہدہ کرانے کی کوششوں کا حصہ ہے۔
جنوبی سوڈان کے سیاسی بحران کے خاتمے کے لیے کی جانے والی کوششیں تاحال کامیاب نہ ہوسکیں، باغیوں کے حملے میں ایک جنرل مارا گیا۔
غیر ملکی میڈیا کے مطابق جنوبی سوڈان کے متحارب گروہوں کے مابین ایتھوپیا کے دارلحکومت ادیس ابابا میں ہونے والے مذاکرات تیسرے دن میں داخل ہوگئے ہیں، تاہم فریقین اب تک جنگ بندی کے معاہدے تک نہیں پہنچ سکے۔
صدر سلوا کیر اور اپوزیشن رہنما ریک مچار نے تصدیق کی ہے کہ ادیس ابابا میں مذاکرات کار فائر بندی کے کسی سمجھوتے تک پہنچنے کی کوشش کریں گے، باغی رہنما نے مذاکرات کامیاب بنانے کے لئے ملک میں نافذ ہنگامی صورتحال اٹھانے اور سیاسی قیدیوں کی رہائی کا مطالبہ کیا ہے۔
دوسری جانب جنوبی سوڈان میں باغیوں کے حملے میں ایک جنرل کے مارے جانے کی اطلاعات ہیں، جنوبی سوڈان میں خانہ جنگی میں ہزار سے زائد افراد ہلاک اور لاکھوں بے گھر ہوچکے ہیں۔
ٹریڈ ڈویلپمنٹ اتھارٹی (ٹی ڈی اے پی)نے نائیجیریا اور سوڈان کو کی جانے والی ٹیکسٹائل برآمدات کے فروغ کیلئے”ٹیکسٹائل تجارتی وفد“بھیجنے کا فیصلہ کیا ہے، وفد میں شرکت کیلئے درخواستیں جمع کروانے کی آخری تاریخ 20 جنوری 2014ء مقررکی گئی ہے-
اتھارٹی کی جانب سے جاری تفصیلات کے مطابق تجارتی وفد میں ہوم ٹیکسٹائل، ریڈی میڈ گارمنٹس، خواتین اوربچوں کی پتلونیں و دیگر ملبوسات، ٹینٹ اور شامیانے,کارپٹس اور ٹیکسٹائل کی دیگر مصنوعات تیار اور برآمد کرنے والے ادارے شرکت کرسکتے ہیں۔
وفد میں شرکت اور درخواست جمع کروانے کا طریقہ کار کے بارے میں مزید معلومات اتھارٹی کی ویب سائٹ سے بھی حاصل کی جاسکتی ہیں۔
عراق کے دارالحکومت بغداد کے تجارتی علاقوں میں کار بم دھماکے میں اننیس افراد جاں بحق جبکہ متعدد زخمی ہوگئے۔
پولیس ذرائع کا کہنا ہے کہ بغداد میں سڑک کے کنارے اور کام میں نصب کئے گئے بم دھماکے بغداد کے تجارتی علاقے میں کئے گئے، دھماکے سے عمارتوں اور گاڑیوں کو نقصان پہنچا۔
اسپتال ذرائع کا کہنا ہے کہ زخمیوں میں بعض کی حالت نازک ہے، عراق میں دوہزار آٹھ سے تشدد کی لہر جاری ہے، تاہم حالیہ چند مہینوں کے دوران تیزی آ گئی ہے، دوہزارتیرہ میں آٹھ ہزار سے زائد افراد تشدد کے واقعات میں ہلاک ہوگئے تھے۔
امریکی ائیرلائن کے طیارے میں بم کی اطلاع پر طیارے کو ہنگامی بنیادوں پر کنساس ائیرپورٹ پر لینڈنگ کرالیا گیا جبکہ تمام مسافر محفوظ رہے۔
امریکی میڈیا کے مطابق حکام کے مطابق امریکی ائیر لائن کا طیارہ نیو یارک سے سان فرانسسکو جارہا تھا، طیارے میں بم کی موجودگی کی اطلاع پر کنساس ائیرپورٹ پر ہنگامی لینڈنگ کروائی گئی جبکہ ائیرپورٹ پر ایمرجنسی بھی نافذ کی گئی۔
ائیرپورٹ حکام کے مطابق فلائٹ میں سوار عملے اور مسافروں کو اتار لیا گیا ہے، بم ڈسپوزل اسکواڈ طیارے کی تلاشی لے رہا ہے۔
افریقی تارکین وطن کی ایک بڑی تعداد نے اسرائیل میں زیرحراست افراد کی رہائی کے لئے اسرائیلی حکومت کے خلاف ریلی میں شرکت کی۔
مظاہرین کا مطالبہ تھا کہ اسرائیلی حکومت فوری طورپر نئے قوانین منسوخ کرے، تمام قیدیوں کو رہا اور تارکین وطن کوانسانی صحت کے حقوق، کام کرنے کی اجازت کے ساتھ ساتھ تمام انسانی بنیادی حقوق دے۔
اسرائیلی حکام کا کہنا ہے کہ دو ہزار چھ سے مصر کے راستے غیر قانونی طور افریقی ممالک سےساٹھ ہزار سے زائد افراد اسرائیل میں غیر قانونی طور پر موجود ہیں۔
انسانی حقوق کے گروپوں کا کہنا ہے کہ اسرائیلی پارلیمنٹ کی طرف منظور کئے گئے نئے قانون کے بعد سے تقریبا تین سو افراد کو گرفتار کیا جاچکا ہے۔
تھائی لینڈ کے دارالحکومت بنکاک میں ایک بار پھر ہزاروں لوگوں نے وزیر اعظم ینگ لک شیناواترا کے استعفے کا مطالبہ کرنے سڑکوں پر نکل آئے۔
تھائی لینڈ میں حکومت مخالف مظاہرے زور پکڑتے جارہے ہیں، مظاہرین انتخابات کے عمل کو روکنے کا اعادہ دے چکے ہیں، مظاہرین کا کہنا ہے کہ فروری میں ہونے والے انتخابات میں شیناواترا کی حکومت دوبارہ اقتدار حاصل کرسکتی ہے۔
حکومت نے پارلیمان کو تحلیل کرکے ملک میں انتخابات کا اعلان کرچکی ہے۔ جسے مظاہرین نے مسترد کرچکے ہیں۔
سعودی وزیر خارجہ شہزادہ سعود الفیصل آج پاکستان پہنچ رہے ہیں، وہ اسلام اآباد میں وزیراعظم نواز شریف سے ملاقات میں اہم امور پر بات چیت کریں گے، دیگر امور سمیت سابق صدر پرویز مشرف کے حوالے سے بات چیت بھی خارج از امکان نہیں ہے۔
سعودی عرب پاکستان کو خصوصی اہمیت دیتا ہے، اس نے کئی مشکلوں میں پاکستان کا ساتھ بھی دیا ہے، جنگِ خلیج کے موقع پر پاکستان کو تیل کی فراہمی انہیں اقدامات کا سلسلہ تھی لیکن اب یہ امداد بند کی جاچکی ہے، امداد و تعاون کے ساتھ ساتھ سعودی عرب سیاسی معاملات میں بھی پاکستان سے معاونت کرتا رہا ہے۔
ضیا الحق کے دور میں ذوالفقار علی بھٹو کی سزائے موت ختم کرنے کی اپیل بھی اس وقت کے سعودی فرماں روا شاہ خالد نے کی تھی جبکہ نواز شریف کو طیارہ سازش کیس میں سزا سنائے جانے کے بعد سعودی عرب ہی تھا، جس نے شریف خاندان کی جنرل پرویز مشرف سے ڈیل کے بعد اپنے ملک میں پناہ دی۔
اب شاید جنرل ریٹائرڈ پرویز مشرف کی جان چھڑانے کی باری ہے، جو غداری کیس میں عدالت جانے سے گریزاں ہیں، ہوسکتا ہے سعودی وزیر خارجہ کی پاکستان آمد دیگر معاملات پر افہام و تفہیم کے ساتھ جنرل ریٹائرڈ پرویز مشرف کی گلو خلاصی بھی ثابت ہو۔
وزارت داخلہ میں درخواست مسترد ہونے پر جنرل ریٹائرڈ پرویز مشرف کی اہلیہ نے اسلام آباد کورٹ جانے کا فیصلہ کرلیا، پرویز مشرف کا نام ای سی ایل سے نکلوانے کیلئے صہبا مشرف آج عدالت میں دراخوست دائر کریں گی۔
وزارت داخلہ کی جانب سے پرویز مشرف کا نام ای سی ایل سے نکالنے کی درخواست مسترد ہونے کے بعد صہبا مشرف پیر کو اسلام آباد ہائیکورٹ میں درخواست دائر کررہی ہیں۔
سابق آرمی چیف کی اہلیہ صہباء مشرف نے درخواست میں موقف اختیار کیا ہے کہ پرویز مشرف پاکستان کے سابق صدر اور آرمی چیف رہے ہیں اور باعزت پاکستانی شہری ہیں، ان کا نام ای سی ایل سے نکالا جائے۔
اس سے پہلے وزارت داخلہ نے واضح طور پر صہباء مشرف کو عدالت سے رجوع کرنے کی ہدایت کی تھی، جس پر صہبا مشرف کے وکلاء الیاس صدیقی اور بیرسٹر شاہجہاں درانی پیر کو اسلام آباد ہائی کورٹ میں دراخوست دائر کریں گے۔
سیکریٹری تعلیم سندھ نے کہا ہے کہ صوبے کے سرکاری اور نجی اسکولز آٹھ جنوری کو ہی کھلیں گے، آج سے کھلنے والے اسکولوں کیخلاف کاروائی کیجائے گی۔
چیرمین آل پرائیوٹ اسکولز مینجمنٹ نے کہا ہے کہ سندھ کے نجی اسکولز آٹھ جنوری کو ہی کھلیں گے، واضح رہے کہ صوبے کے سرکاری و نجی تعلیمی ادارے سردیوں کی تعطیلات کی وجہ سے بند تھے اور انھیں یکم جنوری دو ہزار چودہ کو کھلنا تھا۔
تاہم ملک بھر کی طرح کراچی اور اندرون سندھ میں شدید سردی کی لہر اور والدین کی جانب سے تعطیلات میں توسیع کی اپیل پر حکومت اور ایسوسی ایشنز نے ان تعطیلات میں ایک ہفتے کی توسیع کردی تھی، جس کے بعد اب اسکول آٹھ جنوری کو کھلیں گے۔
