آسٹریلین اوپن ٹینس ٹورنامنٹ میں راجر فیڈر، رافیل نڈال، ویمنز سنگلز کی دفاعی چیمپیئن وکٹوریا آزارینکا اور ماریہ شراپوا نے دوسرے راؤنڈ میں جگہ بنالی ہے۔

میلبورن میں کھیلے جارہے سال کے پہلے گریم سلیم ایونٹ آسٹریلین اوپن کے مینز سنگلز میں سوئس ٹینس اسٹار راجر فیڈرر نے پہلے راؤنڈ میچ میں آسٹریلین کھلاڑی جیمز ڈک ورتھ کو اسٹریٹ سیٹس سے شکست دی ۔

تین سیٹس تک جاری مقابلے میں فیڈرر نے چھ چار، چھ چار اور چھ دو سے کامیابی حاصل کی۔ ہسپانوی کھلاڑی رافیل نڈال کیخلاف آسٹریلیا کے برنارڈ ٹومک انجری کے باعث دوسرے سیٹ میں ہمت ہار گئے۔ نڈال کو پہلے سیٹ میں چھ چار سے کامیابی ملی اور باآسانی دوسرے راؤنڈ میں پہنچ گئے۔

ویمنز سنگلز کی دفاعی چیمپیئن بیلاروس کی وکٹوریا آزارینکا نے سوئیڈش حریف جوہانا لارسن کو دلچسپ مقابلے کے بعد سات چھ اور چھ دو سے شکست دی، روسی ٹینس اسٹار ماریا شراپوا نے بیتانی میٹک سینڈز کو چھ تین او چھ چار سے ہرا کر ایونٹ کا فاتحانہ آغاز کیا ہے۔

پاکستان اور جنوبی افریقہ ویمنز کرکٹ ٹیم کے درمیان ٹرائی نیشن ون ڈے سیریز کا آخری راؤنڈ میچ آج دوحہ میں کھیلا جائیگا۔

دوحہ میں جاری ویمنز ٹرائی نیشن ون ڈے سیریز میں پاکستان کرکٹ ٹیم ناقابل شکست ہے، پاکستان نے تین میچز کھیلتے ہوئے آئرلینڈ اور جنوبی افریقہ کو شکست دی ہے۔

جنوبی افریقی ٹیم کو ایک میں شکست اور ایک میچ میں کامیابی ملی، دونوں ٹیمیں پہلے ہی سیریز کے فائنل کیلئے کوالیفائی کرچکی ہیں جو سترہ جنوری کو کھیلا جائیگا۔

ڈاکار ریلی دوہزارچودہ ارجنٹائن سے ہوتے ہوئے اب چلی میں داخل ہوچکی ہے۔ ریلی کا نواں مرحلہ فرانسیسی ڈرائیور اسٹیفن پیٹرہانسل کی کامیابی کیساتھ اختتام پذیر ہوا ہے۔

ڈاکار ریلی دوہزار چودہ کا نواں مرحلہ چلی کے شہر کالاما سے شروع ہوا اور ایکیوک کے مقام پر ختم ہوگیا۔ چار سو بائیس کلومیٹر پر محیط نویں مرحلے میں فرانس کے اسٹیفن پیٹرہانسل سرفہرست رہے۔ پیٹرہانسل نے مقررہ فاصلہ چار گھنٹے سترہ منٹ اور ترپن سیکنڈ میں طے کیا۔ قطر کے نصیرالعطیہ دو منٹ اور سترہ سیکنڈ کے فرق سے دوسرے نمبر پر آئے۔

ریلی میں مجموعی طور پر سبقت رکھنے والے اسپینش ڈرائیور نینی روما کا نمبر تیسرا رہا۔ بائیکس ایونٹ کا مرحلہ اسپین کے مارک کوما نے جیتا۔ اسپین سے ہی تعلق رکھنے والے بریڈا پورٹ کا نمبر دوسرا اور سابق ڈاکار ریلی چیمپیئن فرانس کے سائرل ڈیسپریس تیسرے نمر پر رہے۔ فرانسیسی ٹیم میں شامل ایلین ڈکلوس کو مشکلات درپیش رہیں اور وہ ایونٹ سے دستبردار ہوگئے۔

نیوزی لینڈ نے ٹی ٹوئنٹی سیریز کے دوسرے اور آخری میچ میں ویسٹ انڈیز کو چار وکٹوں سے شکست دے دی ، سیریز دو صفر سے نیوزی لینڈ کے نام رہی۔

ویلنگٹن میں کھیلے گئے ٹی ٹوئنٹی سیریز کے آخری میچ میں نیوزی لینڈ کیخلاف ویسٹ انڈیز نے پہلے کھیلتے ہوئے پانچ وکٹوں پر ایک سو انسٹھ رنز بنائے۔ ایندرے فلنچر چالیس اور دنیش رامدین پچپن رنز بناکر ٹاپ اسکورر رہے۔

مطلوبہ ہدف کے تعاقب میں نیوزی لینڈ کی ٹیم کو مشکلات درپیش رہیں، چھ وکٹوں کے نقصان پر کیوی ٹیم نے ہدف حاصل کرلیا۔ راس ٹیلر نے انتالیس رنز بنائے، لیوک رانچی نے اکیاون رنز کی اننگز کھیلی۔ جیسن ہولڈ،سنیل نرائن اور اندرے رسل نے دو،دو وکٹیں حاصل کیں۔