وفاقی کی جانب سے اسلام آباد ہائیکورٹ میں چیئرمین پیمرا چوہدری رشید کی بحالی کے خلاف انٹراکورٹ اپیل دائر کردی گئی۔
انٹرا کورٹ اپیل چھبیس دسمبر کے عدالتی فیصلے کے خلاف دائرکی گئی، جسٹس ریاض احمد خان نے چیئرمین پیمرا کی بحالی کے احکامات جاری کیے تھے۔
انٹرا کورٹ اپیل میں موقف اختیار کیا گیا ہے کہ چیئرمین پیمرا کی تعیناتی پیمرا آرڈنینس کی سیشن دس کی خلاف ورزی ہے، چیئرمین کی بحالی کیلئے دائر درخواست میں عدالت سے حقائق چھپائے گئے۔
تحریک انصاف کے رہنما عمران خان کی ہدایت پر خیبر پختوخواں کی حکومت نے ہنگو میں اپنی جان کی بازی لگا کر کئی زندگیاں بچانے والے اعتزاز حسن کے ورثا کے لئے پچاس لاکھ روپے اور اس جانباز طالب علم کے نام سے صوبائی اسکول اور اسٹیڈیم کا نام منسوب کرنے بھی عندیا دیا ہے۔
اپنی جان کی بازی لگا کر خود کش بمبار کو روک کر اپنا اسکول اور اس میں موجود کئی طالبعلموں کی زندگیاں بچانے والا ہنگو کا رہائشی نڈر طالب علم اعتزاز حسن جسے پوری قوم سلام تو کر رہی ہے۔
محب وطن اور انسانیت کے لئے اپنی جان دینے والے اعتزاز کو خراج پیش کرنے پی ٹی آئی کے وزرا اسکے گھر گئے، والدین سے ملاقات کی اور انکے بیٹے کے کارنامے پر انہیں سلام پیش کیا۔
سہ ملکی ویمنز کرکٹ ٹورنامنٹ میں پاکستان نے جنوبی افریقہ کو چار وکٹوں سے شکست دے دی۔
دوحہ میں کھیلے جانے والے میچ میں جنوبی افریقی ویمنز ٹیم نے ٹاس جیت کر پہلے بیٹنگ کا فیصلہ کیا۔ پاکستان کی نپی تلی بولنگ کے سامنے حریف ٹیم بڑا اسکور کرنے میں کامیاب نہ ہوسکی۔
جنوبی افریقہ نے مقررہ اوورز میں آٹھ وکٹوں پر ایک سو پچیس رنزبنائے۔ ندا ڈار نے چارکھلاڑیوں کو آؤٹ کیا۔ جواب میں پاکستان ویمنز نے مطلوبہ ہدف آخری اوور میں چھ وکٹوں کے نقصان پر حاصل کرلیا۔ بسمعہ معروف ساٹھ رنز بناکر نمایاں رہیں۔ یہ ایونٹ میں پاکستان کی مسلسل دوسری کامیابی ہے۔
سال کے پہلے گرینڈ سلم آسٹریلین اوپن ٹینس ٹورنامنٹ کا آغاز ہوگیا۔ سابق عالمی نمبر ایک امریکہ کی وینس ولیمز پہلے راؤنڈ میں اپ سیٹ شکست کے بعد ایونٹ سے باہر ہوگئیں۔ میلبورن میں شروع ہونے والے سال کے پہلے گرینڈ سلم میں دنیا کے بہترین کھلاڑی ایکشن میں ہیں۔
ایونٹ کا آغاز پہلے بڑے اپ سیٹ کے ساتھ ہوگیا۔ امریکہ کی وینس ولیمز کو روسی کھلاڑی نے ابتدائی مرحلے میں شکست دے کر ایونٹ سے باہر کردیا۔ روس کی کیترینا ماکاروا نے ایک سیٹ کے خسارے میں جانے کے باوجود وینس ولیمز کو زیر کیا۔
سات مرتبہ کی گرینڈ سلم ونر وینس کو دو چھ، چھ چار اور چھ چار کے اسکور کے ساتھ ناکامی کا سامنا کرنا پڑا۔ گزشتہ سال بھی آسٹریلین اوپن کے چوتھے راؤنڈ میں وینس کو روسی کھلاڑی نے مات دی تھی۔
دبئی ٹیسٹ میں سری لنکا نے پاکستان کو نو وکٹوں سے شکست دے کر سیریز میں ایک صفر کی برتری حاصل کر لی۔ سیریز کا تیسرا اور آخری میچ سولہ جنوری کو شارجہ میں کھیلا جائے گا۔ کھیل کے فیصلہ کن روز سب کی نگاہیں پاکستانی وکٹ کیپر سرفرازاحمد پرمرکوز تھیں جو سنھبل کر کھیل رہے تھے۔
مگر وہ اسکور میں مزید چار رنز کا اضافہ کرکے چوہتر رنز پر پویلین لوٹ گئے۔ وکٹ کیپر کے آؤٹ ہوتے ہی دیگر کھلاڑیوں کی ہمت ٹوٹ گئی اور ٹیم تین سو انسٹھ رنز پر آؤٹ ہوگئی۔ سرفرازاحمد کے ساتھ مصباح الحق ستانوے،یونس خان ستتر رنز بناکر نمایاں رہے۔
سورنگا لکمل نے چار وکٹیں حاصل کی۔ سری لنکا کو جیت کیلئے ایک سو سینتس رنز کا ہدف ملا۔ جو اوپنرز کی عمدہ کارکردگی کی بدولت باآسانی حاصل کرلیا گیا۔ کوشل سلوا نے اٹھاون رنز بنائے۔ کورونارتنے نے باسٹھ رنز کی ناقابل شکست اننگز کھیلی۔
اے آر وائی ڈیجیٹل نیٹ ورک کے سینئر وائس پریذیڈنٹ آپریشنز طارق وصی نے سری لنکن بیٹسمین کوشل سلوا کو آروائی گولڈ بار پیش کیا ۔ سیریز میں سری لنکا کو ایک صفر کی سبقت حاصل ہے۔ آخری معرکہ سولہ جنوری سے شارجہ میں شروع ہوگا۔
مرید کے میں کالعدم تنظیم کے تین مبینہ دہشت گرد پکڑے گئے، ملزمان سے بھاری مقدار میں اسلحہ، دھماکا خیز مواد اور نقشے برآمد کرلئے گئے۔
لاہور میں قانون نافذ کرنے والے ادارے نے کارروائی کرتے ہوئے مریدکے سے تین مبینہ دہشتگردوں کو حراست میں لے لیا، ملزمان سے بھاری مقدار میں اسلحہ، دھماکہ خیز مواد اور نقشہ جات بھی برآمد ہوئے۔
ذرائع کا کہنا ہے کہ دہشت گردوں نے لاہور، گوجرانوالہ اور سیالکوٹ میں عید میلادالنبی کے موقع پر جلوسوں کو نشانہ بنانے کی منصوبہ بندی کررکھی تھی، ملزمان کو مزید تفتیش کے لئے نامعلوم مقامات پر منتقل کر دیا گیا۔
دل دہلا دینے والے واقعات اور جسم میں خوف کی لہر پیدا کر دینے والے مناظر سے بھرپور ہالی ووڈ کی نئی ہارر فلم " کلاوٴن" کا ٹریلر ریلیز کر دیا۔
فلم کی کہانی ایسے شخص کے گِرد گھومتی ہے، جو اپنے بیٹے کی چھٹی سالگرہ پر مسخرے کا روپ دھار کر اُسے خوشگوار حیرت میں مبتلا کر دیتا ہے لیکن صورتحال اس وقت خوفناک ہوجاتی ہے جب یہ شخص ہزار کوشش کے بعد بھی مسخرے کا لباس اپنے جسم سے الگ نہیں کرپاتا۔
اس سنسنی خیز فلم میں ہالی وڈ اداکار پیٹر اسٹورمر مرکزی کردار میں جلوہ گر ہورہے ہیں، فلم رواں سال سنیما گھروں کی زینت بنے گی۔
پاکستان تحریک انصاف نے پنجاب یوتھ فیسٹیول کے متوازی پیس اسپورٹس فیسٹیول کرانے کا اعلان کردیا ہے۔ پی ٹی آئی کی رکن پنجاب اسمبلی سعدیہ سہیل اور اسپورٹس ونگ کے صدر افتخار الٰہی نے لاہور میں پریس کانفرنس کرتے ہوئے کہا کہ اسپورٹس پیس فیسٹیول کے پہلے مرحلے میں آئندہ ماہ رن فار پیس میراتھن کرائی جائے گی۔
جس کے لئے لاہور کی ضلعی حکومت نے این او سی دینے سے انکار کردیا ہے۔ جس کے بعد یہ میراتھن کینٹ میں کروانے کے لئے کور کمانڈر لاہور کو درخواست بھیجی ہوئی ہے۔
انہوں نے کہا کہ پنجاب یوتھ فیسٹیول پر پنجاب حکومت کے خلاف کارروائی کے لئے الیکشن کمیشن میں جلد ریفرنس دائر کیا جائے گا۔
صوبائی حکومت یوتھ فیسٹیول کے لوگو پر شیر کا نشان لگا کر سرکاری خزانہ استعمال کرتے ہوئے سیاسی مہم چلارہی ہے۔
کشمور کے علاقے کندھ کوٹ میں چھ خواتین نے بچوں سمیت پولیس کی گرفتاری سے بچنے کے لئے دریائے سندھ میں چھلانگ لگادی، واقعے کے بعد ایک بچے کی لاش نکال لی گئی جبکہ دیگر کی تلاش تاحال جاری ہے۔
کندھ کوٹ میں کچے کے علاقہ امداد علی میں آج صبح 4 بجے کے قریب جیکب آباد اور کشمور پولیس نے مشترکہ آپریشن کیا، چار روز قبل تھل پولیس چوکی پر حملے میں پولیس اہلکاروں کی شہادت کے واقعے کے بعد پولیس نے ملزمان کی گرفتاری کے لئے آپریشن کیا۔
پولیس کے خوف سے چھ خواتین نے تین بچوں سمیت گرفتاری سے بچنے کے لئے دریائے سندھ میں چھلانگ لگا دی، مقامی غوطہ خوروں اور دیہاتیوں نے اپنی مدد آپ کے تحت 5 سالہ بچے آصف بنگلوار کی لاش نکال لی جبکہ چھ خواتین اور دو بچوں کی تلاش تاحال جا ری ہے۔
ربیع الاول امت مسلمہ کے لیے کلیدی اہمیت کا حامل مہینہ ہے، اس ماہ مبارک میں ہی حضورانور سرور کونین حضرت محمدﷺ کو دنیا کو اندھیروں سے نکالنے کیلئے بھیجا گیا۔
ماہ ربیع الاول امت مسلمہ کے لیے خاص اہمیت کا حامل ہے کیونکہ اس مہینے نبی آخرالزماں ﷺکی تشریف آوری ہوئی، جو انسان کامل، ہادی عالم اور وجہ تخلیق کائنات ہیں، پیغمبر اکرم صلی اللہ علیہ وآلہ وسلم پوری دنیا کے لئے نمونہ بن کر آئے، وہ ہر شعبے میں اس اوج کمال پر فائز ہیں کہ ان جیسا کوئی تھا اور نہ ہی آئندہ آئے گا۔
خیر البشر کی ذات اقدس اس کائنات کے لئے باعث رحمت تو ہے ہی لیکن انہیں ہر شعبے میں وہ معراج حاصل ہے، جس کی مثال ہی نہیں ملتی، عالم دین حضور پاک کی زندگی کا احاطہ کرنا تو انسان کے لئے شاید ممکن نہ ہو لیکن ہر شعبہ ہائے زندگی میں وہ عام انسان کے لئے بہترین عملی نمونہ نظر آئے۔
آپﷺ نے علم و نور کی ایسی شمعیں روشن کیں جس نے عرب جیسے علم و تہذیب سے عاری معاشرے میں جہالت کے اندھیروں کو ختم کر کے اسے دنیا کا تہذیب یافتہ معاشرہ بنا دیا، آپﷺ نے اپنی تعلیمات میں امن ،اخوت ،بھائی چارہ ،یکجہتی اور ایک دوسرے کو برداشت کا درس دیا۔
جہاں ایک طرف اس ماہ ہم آپﷺ کی ولادت کا جشن مناتے ہیں وہاں ہم پر لازم ہے کہ ہم آپ ﷺکی تعلیمات پر عمل کریں تبھی ہم آپﷺ سے محبت کا دعویٰ کرسکتے ہیں، آج کے اس پر فتن دور میں اگر ہم اپنے انفرادی اور اجتماعی مسائل کو بھول کر ملت اسلامیہ کے عظیم مفاد میں اکھٹے ہوجائیں اور آپﷺ کی تعلیمات کو اپنے لیے مشعل راہ بنالیں تو گھر کی دہلیز سے ریاست اور عالم اسلام کی مضبوطی تک تمام مسائل حل ہو جائیں گے۔
