چکوال: پنجاب کے شہر چکوال میں منوال پیپر ملز میں زہریلی گیس سے 4 مزدور جاں بحق ہو گئے۔
ریسکیو حکام کے مطابق چکوال میں واقع منوال پیپر ملز کے اندر چار مزدور صفائی کرتے ہوئے 8 فٹ گہرے ٹینک میں گر گئے، جس سے وہ جاں بحق ہو گئے۔
جاں بحق ہونے والے مزدوروں کے نام عامر، ذیشان، محمد ثاقب اور جمشید بتائے گئے ہیں، حادثے کے بعد پولیس اور انتظامیہ نے پیپرز مل کو سیل کر دیا ہے۔
پیپرز مل کے مالک کی گرفتاری کے لیے بھی چھاپے مارے جا رہے ہیں۔
راولپنڈی: تھانہ چونترہ کی حدود اڈیالہ میں سسرالیوں نے مبینہ طور پر بہو کو جلا کر قتل کر دیا۔
تفصیلات کے مطابق چکوال کی رہائشی خاتون راضیہ کو مبینہ طور پر سسرالیوں نے جلا کر قتل کر دیا، خاتون کے والد کی مدعیت میں پولیس نے خاوند اور ساس کے خلاف مقدمہ درج کر لیا۔
مقدمے کے متن کے مطابق چکوال کی رہائشی خاتون راضیہ کی شادی 9 سال قبل تصدق حسین سے ہوئی تھی، ملزم تصدق نے اپنی ماں نسیم اختر کے ساتھ مل کر اپنی بیوی راضیہ بتول کو قتل کر دیا، راضیہ کے والد کا کہنا تھا کہ ملزمان مقتولہ سے گھریلو معاملات پر لڑائی جھگڑا کرتے تھے۔
پولیس حکام کا کہنا ہے کہ مقتولہ کا پوسٹ مارٹم کیا جا چکا ہے اور اب رپورٹ کا انتظار ہے، اس واقعے کی تمام پہلوؤں سے تحقیقات جاری ہیں، پوسٹ مارٹم رپورٹ و دیگر شواہد کی روشنی میں ملزمان کو گرفتار کیا جائے گا۔
تاہم دوسری طرف مقتول خاتون کے لواحقین نے کہا ہے کہ انھیں پولیس کی تفتیش پر تحفظات ہیں، کیوں کہ 3 روز گزرنے کے باوجود تحقیقات آگے نہیں بڑھی ہیں۔
پاکستان کرکٹ ٹیم کو پھر دھچکا لگا ہے اور ٹیم کا اہم ترین کھلاڑی مستند بلے باز زخمی ہوکر نیوزی لینڈ کے خلاف سیریز سے باہر ہوگیا ہے۔
پاکستان کرکٹ ٹیم کو پہلے ہی وکٹ کیپر بیٹر اعظم خان کے زخمی ہونے کے بعد سیریز سے باہر ہونے کا دھچکا لگا تھا کہ ایک اور مستند بلے باز وکٹ کیپر محمد رضوان بھی ان فٹ ہو کر نیوزی لینڈ کے خلاف سیریز سے باہر ہو گئے ہیں۔
رپورٹ کے مطابق اسٹار وکٹ کیپر بیٹر گزشتہ روز نیوزی لینڈ کے خلاف تیسرے ٹی ٹوئنٹی میچ میں ہمسٹرنگ انجری کا شکار ہوئے جس کے بعد وہ سیریز کے بقیہ دو میچز نہیں کھیل سکیں گے۔
اس میچ میں پاکستانی ٹیم نے پہلے بیٹنگ کی، اسٹار بیٹر 22 کے انفرادی اسکور پر تھے جب وہ ہمسٹرنگ انجری کا شکار ہو کر مزید بیٹنگ جاری نہ رکھ سکے اور میدان سے باہر چلے گئے۔
میڈیا رپورٹس کے مطابق ٹیم ڈاکٹر نے معائنے کے بعد محمد رضوان کو مکمل آرام کا مشورہ دیا ہے اور احتیاطاً میڈیکل ٹیم نے انہیں کھیلنے سے روک دیا ہے، چنانچہ اب وکٹ کیپر بیٹر پانچ میچوں کی سیریز کے باقی میچوں کے لیے ٹیم کو دستیاب نہیں ہوں گے۔
واضح رہے کہ پانچ میچوں کی سیریز کا پہلا میچ بارش کی نذر ہوا۔ دونوں ٹیموں نے ایک ایک میچ جیتا ہوا ہے اور پاکستان کو سیریز جیتنے کے لیے اگلے دونوں میچز میں لازمی جیتنا ہوں گے۔
بھارتی فلم ڈائریکٹر اور اسکرین رائٹرسندیپ ریڈی وانگا کی بلاک بسٹر فلم ’اینیمل‘ کے سیکوئل سے متعلق اہم تفصیلات سامنے آگئیں۔
سندیپ ریڈی وانگا کی ہدایتکاری میں بننے والی سُپر ہٹ فلم ‘انیمل’ باکس آفس پر کامیاب رہی، اس فلم میں بالی ووڈ رنبیر کپور، رشمیکا مندانا، ترپتی ڈمری اور بوبی دیول مرکزی کردار میں تھے جبکہ انیل کپور نے رنبیر کپور کے والد کا کردار ادا کیا تھا۔
انیمل کی ریکارڈ توڑ کامیابی کے بعد سندیپ ریڈی وانگا نے فلم کا سیکوئل ’انیمل پارک‘ بنانے کا اعلان کیا تھا جس کے بعد مداح کافی پُرجوش نظر آئے لیکن اب فلمساز نے اس سے متعلق بڑا اعلان کردیا ہے۔
بھارتی میڈیا رپورٹ کے مطابق ڈائریکٹرسندیپ ریڈی وانگا نے ایک ایوارڈ شو میں شرکت کی جہان انہوں نے فلم اینیمل کا سیکوئل بنانے کا اعلان کردیا ہے جس کی شوٹنگ کا باقاعدہ آغاز سال 2026 میں کیا جائے گا۔
دوران تقریب میزبان کی جانب سے اداکار رنبیر کپورکی فلم ’اینیمل‘ کے سیکوئل ’اینیمل پارک‘ کے بارے میں کچھ تفصیلات بتانے کو کہا گیا جس پر جواب دیتے ہوئے سندیپ کا کہنا تھا کہ فلم 2026 میں فلور پر جائے گی۔
انہوں نے مزید کہا کہ اینیمل کا سیکویل اینیمل پارک اس سے بڑی اور اور پرجوش ہوگی۔
اسلام آباد: ماری پیٹرولیم نے ماری فیلڈ کے کنویں شوال 1 سے تیل کے ذخائر دریافت کر لیے۔
ایم ڈی ایم پی سی ایل کے مطابق کنویں شوال 1 پر کام کا آغاز 27 جنوری 2024 سے شروع کیا گیا تھا، کنویں کو 1136 میٹر کی گہرائی تک کامیابی سے کھودا گیا۔
ماری پیٹرولیم کمپنی لمیٹڈ کے منیجنگ ڈائریکٹر کا کہنا تھا کہ تیل کی یہ دریافت جیو سائنس دانوں اور انجینئرز کے لیے قابل ذکر کامیابی ہے، کمپنی کی جانب سے جاری اعلامیے میں کہا گیا ہے کہ تیل اور گیس کی یہ دریافت سندھ کے ضلع گھوٹکی کے شہر ڈھرکی سے ہوئی ہے۔
اعلامیے کے مطابق ابتدائی طور پر نئی دریافت سے یومیہ 25 لاکھ مکعب فٹ گیس ملے گی، اور یومیہ 1040 بیرل خام تیل حاصل ہوگا۔
اے آر وائی نیوز کے مطابق پاکستان پیٹرولیم کمپنی کے سندھ بلوچستان کے متعدد گیس اور خام تیل کے کنوؤں سے پیداوار میں اضافہ ہوا ہے، بتایا جا رہا ہے کہ مختلف تکنیکوں کے ذریعے تیل و گیس کے کنوؤں سے پیداوار میں اضافہ کیا گیا ہے۔ پی پی ایل کا کہنا ہے کہ اکتوبر 2023 سے مارچ 2024 کے دوران تکنیکی مہارتوں اور ٹیکنالوجی کے استعمال سے گیس کی یومیہ پیداوار میں 17 ایم ایم سی ایف ڈی، جب کہ خام تیل کی یومیہ پیداوار میں 530 ایم ایم سی ایف ڈی اضافہ ہوا۔
پی پی ایل نے پاکستان اسٹاک ایکسچینج کو لکھے مراسلے میں کہا کہ دھی فیلڈ سے خام تیل کی پیداوار میں 450 بیرل یومیہ، ہالا بلاک ادھی فیلڈ سے 5 ایم ایم سی ایف ڈی گیس کا اضافہ، سوئی گیس فیلڈ سے گیس کی پیداوار میں 7 ایم ایم سی ایف ڈی اضافہ، اور گمبٹ ساؤتھ فیلڈ سے گیس کی پیداوار میں 5، خام تیل کی پیداوار میں 80 بیرل یومیہ اضافہ ہوا۔
ایران کے صدر سید ابراہیم رئیسی وزیراعظم ہاؤس پہنچے جہاں شہباز شریف نے ان کا پُرتپاک استقبال کیا جب کہ انہیں گارڈ آف آنر بھی پیش کیا گیا۔
اے آر وائی نیوز کے مطابق ایران کے صدر سید ابراہیم رئیسی جو آج تین روزہ دورے پر پاکستان پہنچے ہیں ان کی پی ایم ہاؤس آمد پر وزیراعظم شہباز شریف نے ان کا پُرتپاک استقبال کیا۔ اس موقع پر ایک پروقار تقریب میں ایرانی صدر کو گارڈ آف آنر بھی پیش کیا گیا۔
سید ابراہیم رئیسی نے وزیراعظم ہاؤس میں گارڈ آف آنر کا معائنہ کیا۔ معزز مہمان کی آمد پر ایوان میں ایران اور پاکستان کے قومی ترانے بجائے گئے جس کے بعد وزیراعظم نے ایرانی صدر کا وفاقی کابینہ کے ارکان سے تعارف کرایا۔
بعد ازاں ایرانی صدر سید ابراہیم رئیسی نے یوم ارض کے موقع پر وزیراعظم ہاؤس میں پودا بھی لگایا۔
وزیراعظم ہاؤس میں اسلام آباد کی ایک شاہراہ کو ایران ایونیو کا نام دینے کی تقریب بھی ہوگی جس میں وزیراعظم اور ایرانی صدر شرکت کریں گے۔
وزیراعظم شہباز شریف ایرانی صدر کے اعزاز میں ظہرانہ بھی دیں گے جب کہ دونوں رہنما مشترکہ نیوز کانفرنس کریں گے۔
واضح رہے کہ ایران کے صدر ابراہیم رئیسی تین روزہ دورے پر آج پاکستان پہنچے ہیں۔ ایرانی صدر کے ہمراہ ان کی اہلیہ اور اعلیٰ سطح وفد بھی شامل ہے۔ عام انتخابات کے بعد کسی بھی سربراہ مملکت کا پاکستان کا یہ پہلا دورہ ہے۔
ایرانی صدر اپنے دورہ پاکستان میں صدر مملکت آصف علی زرداری، آرمی چیف جنرل عاصم منیر سے بھی ملاقات کریں گے۔ اس کے علاوہ وہ چیئرمین سینیٹ اور اسپیکر قومی اسمبلی سے بھی ملیں گے۔
ابراہیم رئیسی کل (منگل) کراچی کا دورہ کریں گے جب کہ وہ لاہور بھی جائیں گے۔
ترجمان دفتر خارجہ کے مطابق دونوں ممالک کے پاس پاکستان ایران تعلقات کو مزید مضبوط بنانے، تجارت، رابطے، توانائی، زراعت اور عوام سے عوام کے رابطوں سمیت مختلف شعبوں میں تعاون بڑھانے کا وسیع ایجنڈا ہوگا۔
مصری ماہی گیر ابو عصام نے اپنی اہلیہ کے ہمراہ اپنی زندگی کے 40 سال دریائے نیل میں کشتی پر گزار دیئے۔
مصری میڈیا سے بات کرتے ہوئے ابو عصام نے بتایا کہ اگر ہم ضرورت سے زیادہ دریا سے باہر رہے تو مچھلیوں کی طرح مر جائیں گے۔
اُنہوں نے کہا کہ دریا کے بیچ میں رہنا اب ہمیں اچھا لگتا ہے، ہم صرف ضرورت کے تحت ہی دریا سے باہر جاتے ہیں، زندگی کے چالیس سال دریائے نیل میں اس کشتی کے اندر گزر چکے ہیں، بقیہ زندگی بھی ادھر ہی گزارنے کا ارادہ ہے۔
ابو عصام کی اہلیہ نے کہا کہ اچھے اور برے دنوں میں اپنے شوہر کے ساتھ ہوں۔ انہیں دریا میں زندگی گزارتے، سوتے اور کھانا تیار کرتے ہوئے اچھا محسوس ہوتا ہے۔
ابو عصام کا مصری میڈیا سے بات کرتے ہوئے کہنا تھا کہ وہ یا ان کی اہلیہ دریا سے مچھلیاں پکڑ کر صرف انہیں بیچنے کے لیے خشکی پر جاتے ہیں۔
ابو عصام کے مطابق میری اور اہلیہ کی دیرینہ خواہش ہے کہ ہم مرنے سے پہلے عمرہ ادا کرنے کے لئے سعودی عرب جائیں۔
دنیا کی سب سے بڑی جمہوریت ہونے کا دعویٰ کرنے والی مودی سرکار کی اصلیت دی گارڈین کی رپورٹ میں آشکار ہو گئی۔
بھارت میں انتخابات کا سلسلہ شروع ہو چکا ہے، جمہوریت کا تقاضا ہے کہ مخالفین کے مابین منصفانہ اور برابری کی بنیاد پر مقابلہ اور تمام شہریوں کے ساتھ مساوی سلوک ہو، تاہم مودی کا بھارت دونوں خصوصیات سے محروم ہے۔
بھارتی ووٹرز کے مطابق مودی کے زیر اقتدار کرپشن اور دولت کی غیر مساوی تقسیم میں سنگین حد تک اضافہ ہوا ہے، بھارتی انتخابات سے متعلق دی گارڈین کی رپورٹ میں لکھا گیا ہے کہ بھارت کے عوام کو اپنا مینڈیٹ مودی کو دینے سے پہلے سوچ لینا چاہیے۔
دی گارڈین کے مطابق مودی سرکار ایک جانب دنیا کی سب سے بڑی جمہوریت ہونے کا دعویٰ کر رہی ہے، تو دوسری جانب انتخابات سے پہلے ہی جیت کا اعلان کرتی نظر آتی ہے، اپوزیشن جماعت کے اکاوٴنٹس منجمد ہونا، تمام اہم اپوزیشن لیڈروں کی گرفتاری، استغاثہ کا بطور ہتھیار استعمال اور بی جے پی کو 1.25 بلین کی امداد حاصل ہونا کوئی اتفاق نہیں ہو سکتا۔
مختلف سرویز سے پتا چلتا ہے کہ بھارتی عوام بے روزگاری، مہنگائی اور آمدنی اور مالی عدم تحفظ کے متعلق شدید پریشانی کا شکار ہیں، مودی سرکار ان تمام مسائل کے بارے میں نہایت ناقص ریکارڈ کی حامل ہے۔
ہندوستان 200 ملین سے زائد مسلمانوں کا گھر ہے لیکن مودی انھیں نظر انداز کرتے ہوئے محض ہندو انتہا پسندوں کو ترجیح دیتا ہے، جن کی جانب سے مسلمانوں کو امتیازی سلوک اور تشدد کا نشانہ بھی بنایا جاتا ہے، مودی جنوبی ہندوستان میں مقبولیت سے محروم ہے کیوں کہ وہاں علاقائی و ثقافتی شناخت کو ہندومت پر ترجیح دی جاتی ہے۔
جن علاقوں میں مودی کی مقبولیت کم ہو وہاں تشدد اور دہشت گردی سے ہندومت کے قوانین نافذ کروائے جاتے ہیں، اروند کیجریوال کی گرفتاری مودی کے اپنے آپ میں اعتماد کی کمی کا ثبوت ہے، مودی کے پاس عدم تحفظ محسوس کرنے کی بہت وجوہ ہیں۔
پاکستان کرکٹ ٹیم نے نیوزی لینڈ کے خلاف تیسرا ٹی ٹوئنٹی میچ گنوا دیا لیکن کپتان بابر اعظم نے اس میچ میں ایک اور عالمی ریکارڈ اپنے قبضے میں لے لیا۔
گزشتہ روز پنڈی کرکٹ اسٹیڈیم میں نیوزی لینڈ کے خلاف کھیلے گئے تیسرے ٹی ٹوئنٹی میچ میں جب قومی کپتان بیٹنگ کے لیے میدان میں آئے تو انہیں بطور کپتان ٹی ٹوئنٹی کرکٹ میں سب سے زیادہ رنز بنانے کا ریکارڈ اپنے نام کرنے کے لیے 28 رنز درکار تھے۔
بابر اعظم نے اس میچ میں 37 رنز کی اننگ کھیلی تاہم جب انہوں نے انفرادی 28 واں رنز بنایا تو بحیثیت کپتان ٹی ٹوئنٹی میچز میں سب سے زیادہ رنز بنانے والے کرکٹر کا اعزاز اپنے نام کر چکے تھے۔
اس سے قبل یہ اعزاز آسٹریلوی کپتان ایرون فنچ کے پاس تھا جنہوں نے 76 اننگز میں 2236 رنز بنائے تھے جب کہ بابر اعظم نے یہ ریکارڈ اپنی 67 ویں اننگ میں توڑا۔
قومی کپتان اب تک 105 ٹی ٹوئنٹی اننگز میں 3749 رنز بنا کر پاکستان کی جانب سے اس فارمیٹ میں ٹاپ جب کہ دنیا کے تیسرے سب سے زیادہ رنز بنانے والے کھلاڑی کا اعزاز اپنے پاس رکھتے ہیں۔
دنیا میں ٹی ٹوئنٹی میں سب سے زیادہ رنز بنانے کا اعزاز ویرات کوہلی کے پاس ہے جنہوں نے 4037 رنز بنا رکھے ہیں جب کہ بھارتی کپتان روہت شرما اس فہرست میں 3974 رنز بنا کر دوسرے نمبر پر ہیں۔
نسیم شاہ نے اہم سنگ میل عبور کر لیا
بابر اعظم کو کوہلی کا ریکارڈ توڑنے کے لیے مزید 289 رنز کی ضرورت ہے۔
مسلم لیگ ن پنجاب کے صدر اور سابق وفاقی وزیر رانا ثنا اللہ کا کہنا ہے حسن نقوی صرف ن لیگ کی وجہ سے نہیں بلکہ کچھ اور وجوہات پر بھی وزیر بنے ہیں۔
اے آروائی نیوز کو خصوصی انٹرویو میں مسلم لیگ ن پنجاب کے صدر اور سابق وفاقی وزیر رانا ثنا اللہ نے کہا کہ ہم اس تاثر کو ختم کرنے میں ناکام رہے کہ نگراں حکومت ن لیگ کی نہیں جس کا سیاسی نقصان ہوا، محسن نقوی صرف ن لیگ کی وجہ سے نہیں بلکہ کچھ اور وجوہات پر بھی وزیر بنے ہیں۔
انہوں نے کہا کہ ایسی ترمیم ہونی چاہیے کہ نگراں حکومتی شخصیت کسی بھی منتخب حکومت کا حصہ نہ ہو ورنہ اس طرح تو ہر نگراں حکومت اپنی سیٹ پکی کرنے کے لیے ایسے اقدامات کرے گی۔
سابق وفاقی وزیر رانا ثنا اللہ نے کہا کہ پارٹی میٹنگ میں میری رائے تھی اتحادی حکومت نہیں بنانی چاہیے، یہ بات بھی درست نہیں کہ اس الیکشن سلیکشن ہوئی ہے، یہ سب سازشی تھیوریاں ہیں کسی کو ٹارگٹ نہیں کیا گیا۔
انہوں نے کہا کہ چاہوں تو اپنی شکست پر 10 باتیں نکال سکتا ہوں لیکن میں نے اپنی شکست کو تسلیم کیا، جاوید لطیف الیکشن سے متعلق غلط کہتے ہیں زیادتی کرتے ہیں، ایسا بالکل نہیں ہوا، اس الیکشن میں جتنا مجھے اپنے ہارنے کا یقین ہے اتنا ہی جاوید لطیف کی ہار کے صحیح ہونے کا ہے، جاوید لطیف کا گلہ ہے وہ ہار گئے لیکن رانا تنویر کیوں جیت گئے۔
صدر ن لیگ پنجاب نے کہا کہ رانا تنویر بھی ہار جاتے تو جاوید لطیف سکون میں ہوتے، میں انکا درد سمجھتا ہوں، ان کا دکھ رانا تنویر کے ڈی نوٹیفائی ہونے سے ختم ہونے والا ہے، جاوید لطیف کو وہ بات کرنی چاہیے جو دوسرا مان بھی لے۔
