ڈی آئی خان: ٹانگ روڈ پر سرچ آپریشن کیلئے جانے والے پولیس قافلے پر حملے کے نتیجے میں کوئیک ری ایکشن فورس کا ڈرائیور اور کانسٹیبل زخمی ہوگئے۔
تفصیلات کے مطابق ڈیرہ اسماعیل خان کے ٹانک روڈ پر نامعلوم افراد نے سرچ آپریشن کیلئے جانے والے پولیس قافلے پر حملہ کردیا، ملزمان نے سڑک کنارے نصب آئی ای ڈی دھماکے کے بعد فائرنگ کی۔
پولیس کے مطابق اس حملے میں کیو آر ایف کا ڈرائیور اور ایک کانسٹیبل زخمی ہوا جسے فوری اسپتال منتقل کردیا گیا، جبکہ جوابی فائرنگ کے بعد حملہ آور فرار ہوگئے۔
پولیس نے بتایا کہ ڈی ایس پی کلاچی سرکل اور ایس ایچ او تھانہ پنیالہ بھی اسکواڈ میں شامل تھے، آئی ای ڈی حملے اور فائرنگ سے ایک گاڑی کو نقصان پہنچا۔
فلسطینی وزارت صحت کا کہنا ہے کہ گزشتہ 24 گھنٹوں کے دوران اسرائیلی بمباری کے نتیجے میں مزید 77 فلسطینی شہید ہوگئے۔
بین الاقوامی خبر رساں ادارے کی رپورٹ کے مطابق فلسطینی وزارت صحت کا کہنا تھا کہ 221 افراد حملوں میں زخمی بھی ہوئے۔
بیان کے مطابق 7 اکتوبر سے غزہ میں جاری اسرائیلی بربریت کا سلسلہ جاری ہے، جس کے نتیجے میں 36 ہزار 731 فلسطینی شہید ہوچکے ہیں، اسرائیلی حملوں میں مجموعی طور پر 83 ہزار 530 فلسطینی زخمی ہوئے۔
دوسری جانب اقوام متحدہ کے سربراہ نے اسرائیل سے بچوں کے خلاف مظالم بند کرنے کا مطالبہ کیا ہے۔
اقوام متحدہ کے سکریٹری جنرل انتونیو گوٹیرس بچوں کے خلاف مظالم پر اسرائیل کو مجرموں کی عالمی فہرست میں شامل کرنے کا مطالبہ کیا ہے۔
اقوام متحدہ میں اسرائیل کے ایلچی گیلاد اردان نے کہا کہ وہ اس شرمناک فیصلے سے بالکل حیران اور ناگوار ہیں۔ انہوں نے مزید کہا کہ اسرائیل کی فوج ”دنیا کی سب سے اخلاقی فوج”ہے۔
عالمی فہرست بچوں اور مسلح تصادم سے متعلق ایک رپورٹ میں شامل ہے جو 14 جون کو اقوام متحدہ کی سلامتی کونسل میں پیش کی جانی ہے۔
فلسطینی اتھارٹی نے اسرائیل کی فوج کو بچوں کو نقصان پہنچانے والے بلیک لسٹ میں شامل کرنے کے اقوام متحدہ کے اقدام کا خیر مقدم کیا ہے۔
پاکستانی کرکٹ ٹیم کے سابق کپتان محمد حفیظ نے امریکا کے ہاتھوں پاکستان کی شرمناک شکست پر رد عمل دیتے ہوئے کہا ہے کہ پاکستان ایک میچ نہیں ہارا بلکہ دو میچ ہارا ہے۔
ٹاک شو میں بات کرتے ہوئے سابق کپتان محمد حفیظ نے کہا کہ پہلے ہم نے 20 اوورز کا میچ ہارا، اس کے بعد ہم سپر اوور میں بھی ہارے ہیں، سابق کپتان نے کہا کہ مجھے حیرت ہے کہ آپ سپر اوور میں بھی ٹیم کو نہیں جتوا سکے۔
سابق کپتان کا پاکستان کی باؤلنگ پر تنقید کرتے ہوئے کہنا تھا کہ کونسا اچھا بالر ہے، آپ کو یہی نہیں پتہ؟ اس جگہ میں ہوتا تو میری پہلی آپشن ہوتی نسیم شاہ اور دوسری آپشن شاہین شاہ آفریدی ہوتی۔
محمد عامر سے متعلق سابق کپتان نے کہا کہ عامر پاکستان کی کرکٹ سے چار سال سے باہر تھے، خدارا انٹرنیشنل لیگ کی کرکٹ کو انٹر نیشنل کرکٹ سے نہ ملائیں، میں یہ بات بار بار سمجھانے کی کوشش کررہا ہوں۔
انہوں نے مزید کہا کہ میں نے پاکستان کے لئے 392 میچ کھیلے ہیں وہ میرا پرائیڈ ہے، میں نے دنیا کی لیگز کھیلی ہیں وہ میرا پرائیڈ نہیں ہے۔
اس سے قبل قومی ٹیم سابق وکٹ کیپر بیٹر کامران اکمل نے امریکا کیخلاف پاکستانی ٹیم کی شکست پر رد عمل دیتے ہوئے کہا تھا کہ کرکٹ چلانے والوں کو اب بھی شرم نہ آئی تو اللہ ہی حافظ ہے۔
سابق کرکٹر و سلیکشن کمیٹی کے رکن کامران اکمل نے اپنے یوٹیوب چینل پر گفتگو کرتے ہوئے کہا کہ ہم اگر انگلینڈ سے فائٹ کرکے ہارتے تو دکھ نہیں ہوتا، مگر اس ٹیم سے شکست کھائی جس نے زیادہ انٹرنیشنل میچز ہی نہیں کھیلے ہوئے۔
لاہور : قائم مقام گورنر پنجاب ملک احمد خان کے ہتک عزت بل کے مسودے پر دستخط کے بعد پنجاب میں ہتک عزت بل قانون بن گیا۔
تفصیلات کے مطابق قائم مقام گورنر پنجاب ملک احمد خان نے ہتک عزت بل کے مسودے پر دستخط کردیے اور بل پنجاب اسمبلی بھجوادیا۔
قائم مقام گورنر کے دستخط کے بعد پنجاب میں ہتک عزت بل قانون بن گیا۔
یاد رہے 20 مئی کو پنجاب اسمبلی میں ہتک عزت قانون 2024 کثرت رائے سے منظور کیا تھا جبکہ اپوزیشن نے کالا قانون قرار دیا اور احتجاج کرتے ہوئے بل کی کاپیاں پھاڑ دیں تھیں۔
بل کا اطلاق پرنٹ اور الیکٹرانک اور سوشل میڈیا پر ہو گا اور اس کے تحت جھوٹی اور غیر حقیقی خبروں پر ہتک عزت کا کیس ہو سکےگا، کسی شخص کی ذاتی زندگی،عوامی مقام کونقصان پہنچانے والی خبروں پر کارروائی ہوگی۔
بل کا یوٹیوب،ٹک ٹاک،ٹوئٹر، فیس بک، انسٹاگرام کےذریعےجعلی خبروں پربھی اطلاق ہوگا۔
مقدمات کیلئے خصوصی ٹریبونلز قائم ہوں گے، جو6ماہ میں فیصلہ کریں گے اور بل کےتحت 30لاکھ روپے کا ہرجانہ بھی ہو گا۔
آئینی عہدوں پر شخصیات کےخلاف الزام کی صورت میں ہائیکورٹ بینچ سماعت کرے گا جبکہ خواتین اور خواجہ سراؤں کیلئے کیس کیلئے قانونی معاونت حکومتی لیگل ٹیم دےگی۔
بالی ووڈ کی معروف اداکارہ دیپیکا پڈوکون نے اپنے شوہر و اداکار رنویر سنگھ کو سب سے زیادہ ہینڈسم مرد قرار دیدیا۔
بالی ووڈ کی معروف اداکارہ دیپیکا پڈوکون نے فوٹو اینڈ شیئرنگ ایپ انسٹاگرام اسٹوری پر اپنے شوہر رنویر سنگھ کے لیے ایک خوبصورت تعریفی پوسٹ کی۔
اداکارہ کا کہنا ہے کہ وہ ہر پانچ سیکنڈ بعد اپنے شوہر کو دیکھتی ہیں جو کہ بہت ہی پیارے ہیں، انکے مطابق انہوں نے اب تک جتنے مرد دیکھے ان میں رنویر سب سے زیادہ ہینڈسم ہیں۔
انھوں نے اپنی اسٹوری میں رنویر کو ٹیگ کرنے کے علاوہ اس میں پنک ہارٹ ایموجی بھی شامل کیا ہے۔
یاد رہے کہ اداکارہ دیپیکا پڈوکون اور اداکار رنویر سنگھ نے 29 فروری 2024 کو مداحوں کو اپنے ہاں جَلد ننھے مہمان کی آمد سے متعلق خوشخبری سنائی تھی۔
اس پوسٹ میں دیپیکا اور رنویر نے انکشاف کیا تھا کہ اُن کے ہاں ستمبر 2024ء میں پہلے بچے کی پیدائش متوقع ہے۔
اسلام آباد: ملک بھر میں آوارہ کتوں کے کاٹنے کے کیسز میں مسلسل اضافہ ہو رہا ہے، گزشتہ ہفتے ملک میں کتے کے کاٹے کے 7957 کیسز رپورٹ ہوئے ہیں۔
ذرائع این آئی ایچ کے مطابق پنجاب نے کتے کاٹے کے کیسز میں سندھ کو پیچھے چھوڑ دیا ہے، ملک میں کتے کے کاٹے کے سب سے زیادہ 5 ہزار 259 کیسز پنجاب سے رپورٹ ہوئے، جب کہ گزشتہ ہفتے سندھ میں 1 ہزار 886 شہری آوارہ کتوں کا نشانہ بنے۔
خیبر پختونخوا میں 635، بلوچستان میں 110، آزاد کشمیر میں 66، گلگت بلتستان میں سگ گزیدگی کا 1 کیس رپورٹ ہوا۔
رپورٹ کے مطابق سندھ میں سگ گزیدگی کے سب سے زیادہ 181 کیسز خیرپور سے رپورٹ ہوئے، قمبر میں 169، نوابشاہ میں 164، جیکب آباد میں 163 شہری آوارہ کتوں کا نشانہ بنے، کراچی ویسٹ میں 132، ملیر میں 48، ایسٹ 9، سنٹرل سے ایک سگ گزیدگی کیس رپورٹ ہوا۔
صوابی میں 183، سوات میں 87 شہری، مانسہرہ میں 50، اورکزئی میں 46، لکی مروت میں 44 شہری آوارہ کتوں آوارہ کتوں کے کاٹنے سے زخمی ہوئے۔
پاکستانی کرکٹ ٹیم کے سابق کپتان مصباح الحق نے امریکا کے ہاتھوں پاکستان کی شرمناک شکست پر رد عمل دیتے ہوئے کہا ہے کہ ہمیں نہیں لگا کہ میچ کہیں بھی ہمارے کنٹرول میں تھا۔
ٹاک شو میں بات کرتے ہوئے ہوئے سابق کپتان مصباح الحق نے کہا کہ ٹاس ہوا پھر بیٹنگ شروع ہوئی، کہیں پر ایسا نہیں تھا کہ میچ پاکستان کے ہاتھ میں ہے اور ہم میچ جیت سکتے ہیں، میرے خیال میں اس پر بہت ساری باتیں ہوسکتی ہیں۔
انہوں نے کہا کہ پچھلے 6 سے 7 مہینے میں جو کچھ ہوا ہے، میوزیکل چیئر جو چیئرمین شپ کی چلی، پھر کپتانی کی چلی، پھر بورڈ میں اپنے اپنے عہدوں کی چلی، ہر بندے نے کہا کہ میں لوٹ لوں جو کچھ میرے ہاتھ میں آجائے۔
انہوں نے کہا کہ وہی بیٹنگ آرڈر کے مسئلے، وہی اسپن باؤلنگ کے مسائل، پلاننگ کے مسائل، سارے کے سارے جتنے بھی مسائل تھے، وہ سب ہمارے سامنے آئے۔
مصباح الحق نے کہا کہ آپ کو کنڈیشنز کہہ رہی ہیں کہ آپ کو اسپنر کھلاناہے، مگر آپ نے اسپنر بھی نہیں کھلایا، کوئی پلان نہیں تھا، باؤلنگ میں کوئی پلاننگ نہیں تھی۔امریکا نے ہر چیز میں ہمیں مات دیدی۔
اس سے قبل قومی ٹیم سابق وکٹ کیپر بیٹر کامران اکمل نے امریکا کیخلاف پاکستانی ٹیم کی شکست پر رد عمل دیتے ہوئے کہا تھا کہ کرکٹ چلانے والوں کو اب بھی شرم نہ آئی تو اللہ ہی حافظ ہے۔
سابق کرکٹر و سلیکشن کمیٹی کے رکن کامران اکمل نے اپنے یوٹیوب چینل پر گفتگو کرتے ہوئے کہا کہ ہم اگر انگلینڈ سے فائٹ کرکے ہارتے تو دکھ نہیں ہوتا، مگر اس ٹیم سے شکست کھائی جس نے زیادہ انٹرنیشنل میچز ہی نہیں کھیلے ہوئے۔
نیویارک: قومی ٹیم آج نیویارک میں پاک بھارت ٹاکرے کیلئے بھرپور پریکٹس کرے گی۔ ٹیم گزشتہ روز ڈیلاس سے نیویارک پہنچی تھی۔
تفصیلات کے مطابق امریکا سے شرمناک شکست کھانے کے بعد قومی ٹیم کل بروز اتوار نیویارک میں بھارت سے مقابلہ کرے گی۔
نیویارک میں کل دو روایتی حریف آپس میں ٹکرائیں گے، میچ سے ایک روز قبل قومی کرکٹ ٹیم ڈیلس سے نیو یارک پہنچی ہے، کھلاڑیوں نے گزشتہ روز مکمل آرام کیا اور آج بھرپور پریکٹس سیشن ہوگا۔
پاکستان کرکٹ بورڈ کے سربراہ محسن نقوی بھی پاک بھارت ٹاکرا دیکھنے کے لئے نیوریاک میں موجود ہیں، وہ اہم میچ سے قبل قومی کرکٹرز سے ملاقات کریں گے اور ان کی حوصلہ افزائی کریں گے۔
واضح رہے کہ میگا ایونٹ میں امریکا سے اپ سیٹ شکست پر ڈریسنگ روم کا ماحول بھی افسردہ ہے۔جبکہ قومی ٹیم پر شدید تنقید کا سلسلہ بھی جاری ہے۔
ٹیم پر برہمی کا اظہار کرتے ہوئے ہیڈ کوچ گیری کرسٹن کا کہنا تھا کہ کسی نے بھی میچ پلان پر عمل نہیں کیا، قومی کپتان بابر اعظم نے بھی شکوہ کیا اور کہا کہ باؤلرز نے اچھی کارکردگی نہیں دکھائی جو ہار کا سبب بنی۔
ٹی ٹوئنٹی ورلڈ کپ کے پندرہویں میچ میں بنگلہ دیش نے سری لنکا کو سنسنی خیز مقابلے کے بعد 2 وکٹوں سے شکست دیدی۔
ڈیلاس میں کھیلے جارہے گروپ ڈی کے میچ میں بنگلا دیش نے سری لنکا کے خلاف ٹاس جیت کر پہلے فیلڈنگ کا فیصلہ کیا۔
سری لنکا نے پہلے بیٹنگ کرتے ہوئے بنگلہ دیش کو جیت کیلئے 125رنز کا ہدف دیا، میچ میں سری لنکن اوپنر پتہم نسانکا 28 گیندوں پر 47 رنز بنا کر ٹاپ اسکورر رہے۔ بنگلا دیش کی جانب سے مستفیض الرحمان اور رشاد حسین نے 3، 3 وکٹ حاصل کیے۔
سری لنکا کا 125 رنز کا ہدف بنگلادیش نے 8 وکٹوں پرحاصل کرلیا، توحید نے 40، لتن داس نے 36 رنز کی ذمہ دارانہ اننگز کھیلی۔
اس سے قبل افغانستان نے ٹی ٹوئنٹی ورلڈ کپ کے چودہویں میچ میں ایک اور اپ سیٹ کردیا، 160 رنز کے دفاع میں نیوزی لینڈ کی ٹیم کو 75 رنز پر آؤٹ کردیا۔
افغانستان کے خلاف نیوزی لینڈ نے ٹاس جیت کر پہلے بولنگ کا فیصلہ کیا تھا، افغان اوپنرز نے ٹی ٹوئنٹی ورلڈ کپ کے چودھویں میچ میں نیوزی لینڈ کے خلاف 103 رنز کا شاندار آغاز فراہم کیا۔
نیوزی لینڈ کی جانب سے ٹرینٹ بولٹ اور میٹ ہینری نے 2، 2 وکٹیں لیں جبکہ فرگوسن ایک وکٹ حاصل کر سکے۔
کراچی: سیکیورٹی گارڈکی فائرنگ سے جاں بحق ہونے والے کچرا چننے والے نوجوان صمد کے قتل کا مقدمہ مقتول کے والد کی مدعیت میں سرسید تھانے میں درج کرلیا گیا۔
اے آر وائی نیوز کے مطابق مقتول کے والد نے بتایا کہ بیٹے کے ساتھ گزشتہ روز کچرا چننے نارتھ کراچی سیکٹر الیون اے گیا تھا، نماز جمعہ کی ادائیگی کیلئے بیٹے کو اُسی مقام پر چھوڑ کر مسجد چلا گیا تھا۔
والد نے بتایا کہ نماز پڑھ کر آیا تو دیکھا بیٹے کے پیٹ میں گولی لگی ہوئی ہے اور وہ زمین پر گرا ہوا تھا، زخمی بیٹے نے بتایا سیکیورٹی گارڈ نے گولی ماری اور فرار ہوگیا۔ موقع پر موجود لوگوں نے بتایا کہ فائرنگ کرنیوالے گارڈ کا نام رمضان ہے۔
پولیس کے مطابق نجی سیکیورٹی کمپنی کے 3 ذمہ داروں کو حراست میں لے لیا ہے، سیکیورٹی کمپنی نے غیرتربیت یافتہ گارڈ بھرتی کیے ہوئے تھے، جبکہ فرار سیکیورٹی گارڈ مضان کی گرفتاری کیلئے چھاپے مارے جارہے ہیں۔
واضح رہے کہ گزشتہ روز کراچی میں گارڈ نے کچرا نہ اٹھانے پر لڑکے کو گولی مار دی تھی جس کے نتیجے میں وہ جاں بحق ہوگیا تھا۔
نارتھ کراچی میں گارڈ اور لڑکے میں کچرا اٹھانے پر بحث ہوئی جس پر طیش میں آکر گارڈ نے لڑکے کے پیٹ میں گولی ماردی۔
زخمی بچے کو طبی امداد کے لیے عباسی شہید اسپتال منتقل کیا گیا جہاں وہ دوران علاج دم توڑ گیا جبکہ ملزم گارڈ واردات کے بعد فرار ہوگیا۔
واضح رہے کہ چار دن قبل کراچی کے علاقے سخی حسن سرینا موبائل مارکیٹ میں سیکیورٹی گارڈ نے ٹک ٹاکر کو ویڈیو بنانے پر ایک نوجوان کو
گولی مار کر قتل کردیا تھا۔
