بانی پی ٹی آئی کیخلاف وزیراعظم شہبازشریف کا ہرجانہ کیس میں عدالتی دائرہ اختیار کو چیلنج کر دیا گیا۔

تفصیلات کے مطابق بانی پی ٹی آئی نے ہرجانہ کیس میں عدالتی دائرہ اختیار کو سپریم کورٹ میں چیلنج کر دیا ہے۔ بانی پی ٹی آئی نے ہرجانہ کیس کی کارروئی اپیل پر فیصلے تک معطل کرنے کی استدعا کی ہے۔

درخواست میں کہا گیا ہے کہ قانون کے مطابق ڈسٹرکٹ اینڈسیشن عدالت ہی ہرجانہ کیس کی سماعت کر سکتی ہے ایڈیشنل سیشن جج کی عدالت کے دائرہ اختیار پر اعتراض کیا گیا، ایڈیشنل سیشن جج نے اعتراض مسترد کیا اور لاہور ہائیکورٹ نے فیصلہ برقرار رکھا۔

درخواست میں استدعا کی گئی ہے سپریم کورٹ لاہورہائیکورٹ اور ایڈیشنل سیشن جج کے احکامات کالعدم قرار دے اور اپیل پر فیصلے تک لاہورہائیکورٹ کا فیصلہ معطل کر کے کارروائی سے روکا جائے۔

بارش کے پانی کو ضائع ہونے سے بچانے اور استعمال میں لانے کیلیے ذخیرہ کرنے کے لیے کراچی میں 100 برس پرانے کنویں فعال کر دیے گئے ہیں۔

اے آر وائی نیوز کے مطابق ملک بھر میں پانی کی قلت ہے۔ کراچی شہر بھی اس کا شکار ہے۔ شہر قائد میں اکثریت پانی کے حصول کے لیے زیر زمین بورنگ پر انحصار کرتی ہے۔ یہ پانی انسانی صحت کے لیے مضر ہے، لیکن عوام اس کا استعمال کھانے پینے کے علاوہ دیگر امور میں کرتے ہیں۔

تاہم اب کراچی میں زیر زمین پانی کی سطح پر خطرناک حد تک نیچے چلی گئی ہے۔ زیر زمین پانی کی سطح کو بڑھانے کے لیے مختلف نجی اداروں اور شخصیات کی جانب سے بارش کا پانی ذخیرہ کر کے زیر زمین پانی کی سطح بڑھانے کی کوششیں کی جا رہی ہیں جب کہ اس کو دیگر کاموں میں بھی استعمال میں لایا جا رہا ہے۔

شہر قائد میں پانی کی قلت کے بعد بارش کے پانی کو ضائع ہونے سے بچانے اور مفید استعمال کے لیے اب کراچی میونسپل کارپوریشن کی جانب سے بھی بارش کا پانی ذخیرہ کرنے کے لیے اقدامات کیے گئے ہیں۔

اس سلسلے میں برنس گارڈ میں تقریباً ایک صدی قبل 1927 میں بنے ہوئے چار کنویں فعال کر دیے گئے ہیں۔

اس حوالے سے کے ایم سی ترجمان کا کہنا ہے کہ یہ کنویں فعال ہونے سے آئی آئی چندریگر روڈ، آرٹس کونسل اور سندھ سیکریٹریٹ کے اطراف بارش کا پانی جمع نہیں ہوگا۔ ذخیرہ کیا گیا یہ پانی پارکس میں استعمال کیا جائے گا۔

انہوں نے مزید بتایا کہ برنس گارڈن میں بارش کا پانی ذخیرہ کرنے کیلئے مزید ایک اور ٹینک بھی بنایا جارہا ہے۔ نئے ٹینک میں ایک لاکھ گیلن پانی ذخیرہ کیا جا سکے گا۔

واضح رہے کہ ناقص انتظامات کے باعث معمولی بارش بھی کراچی کے شہریوں کے لیے رحمت کے بجائے زحمت بن جاتی ہے۔ سڑکیں تالاب اور نشیبی علاقے زیر آب آنے سے عوام کو مشکلات کا سامنا کرنا پڑتا ہے۔

پیٹرولیم مصنوعات کی قیمتوں میں اضافے پر امیر جماعت اسلامی پاکستان حافظ نعیم الرحمان کا ردعمل آگیا۔

انہوں نے کہا کہ اشرافیہ کو نوازو، عوام کی کمر توڑو، یہ ہےحکومت کی پالیسی، عالمی مارکیٹ میں قیمتیں گریں توریلیف نہیں، تھوڑا بڑھیں تو بوجھ عوام پر۔۔

حافظ نعیم الرحمان نے کہا کہ معیشت کی ترقی کے حکومتی دعوے جھوٹے اور اشتہاری ہیں، پیٹرولیم مصنوعات کی قیمتوں میں حالیہ اضافہ مسترد کرتے ہیں۔

امیر جماعت اسلامی نے مطالبہ کیا کہ پیٹرولیم لیوی ختم کی جائے اور قیمتیں کم کی جائیں۔

حکومت عوام سے پٹرول کے فی لیٹر پر کتنا ٹیکس وصول کر رہی ہے؟

پاکستانی عوام نے حکومت کی جانب سے پیٹرولیم مصنوعات میں اضافے کو مسترد کردیا اور حکومت سے ریلیف فراہم کرنے کا مطالبہ کیا۔

پٹرول کی قیمت میں اضافے پر عوام نے کہا اتنا مہنگا پیٹرول کردیا، غریب عوام کہاں جائے؟ اشرافیہ کو نوازا جارہا ہے غریب کو مارا جارہا ہے۔

شہریوں کا کہنا ہے کہ حکومت کوچاہیے کہ عام آدمی کے لئے آسانیاں پیدا کرے، جینا مشکل ہوگیا ہے اور عوام بے بسی کی تصویر بن چکی ہیں۔