سنی اتحاد کونسل نے مخصوص نشستوں کے حصول کے لیے پشاور ہائیکورٹ سے رجوع کرتے ہوئے درخواست دائر کر دی ہے۔

اے آر وائی نیوز کے مطابق پی ٹی آئی کے حمایت یافتہ آزاد امیدواروں کی سنی اتحاد کونسل میں شمولیت کے بعد یہ جماعت خیبرپختونخوا اسمبلی میں سنگل لارجسٹ پارٹی جب کہ قومی اور پنجاب اسمبلی میں دوسری بڑی جماعت کے طور پر سامنے آئی ہے تاہم الیکشن کمیشن نے اس جماعت کو عام انتخابات میں جیتی ہوئی نشستوں کے تناسب سے مخصوص نشستیں دینے سے انکار کر دیا اور اس کی نشستیں دیگر جماعتوں کو الاٹ کر دی گئیں۔

سنی اتحاد کونسل نے اب مخصوص نشستوں کے لیے ایک بار پھر قانون کا دروازہ کھٹکھٹا لیا ہے اور پشاور ہائیکورٹ سے رجوع کرتے ہوئے ان نشستوں کے حصول کے لیے درخواست دائر  کر دی ہے جس میں الیکشن کمیشن کو فریق بنایا گیا ہے۔

درخواست میں موقف اختیار کیا گیا ہے کہ پی ٹی آئی کے حمایت یافتہ منتخب آزاد اراکین سنی اتحاد کونسل میں شامل ہوگئے ہیں اور اب ہم سنی اتحاد کونسل کا حصہ ہیں۔

درخواست میں کہا گیا ہے کہ مخصوص نشستیں الیکشن میں حاصل کردہ عام نشستوں کے تناسب سے دی جاتی ہیں جب کہ الیکشن کے بعد بھی مخصوص نشستوں کی لسٹ دی جا سکتی ہے۔

الیکشن کمیشن نے سنی اتحاد کونسل کی مخصوص نشستوں کی درخواست مسترد کردی

درخواست گزاروں نے عدالت عالیہ سے درخواست کو آج ہی سماعت کے لیے مقرر کرنے کی استدعا کی ہے۔

مخصوص نشستوں کی الاٹمنٹ مکمل ہونے کے بعد پنجاب اسمبلی میں حکمران جماعت مسلم لیگ کی نشستوں کی تعداد 224 ہو گئی ہے۔

اے آر وائی نیوز کے مطابق الیکشن کمیشن کی جانب سے مخصوص نشستوں کی الاٹمنٹ مکمل ہونے کے بعد پنجاب اسمبلی میں 336 نشستوں کی نئی پارٹی پوزیشن جاری کر دی گئی ہے۔

مسلم لیگ ن کی پنجاب اسمبلی میں نشستوں کی مجموعی تعداد 224 ہو گئی ہے۔ ن لیگ نے اسمبلی کی 139 جنرل نشستیں جیتیں، 21 آزاد اراکین شامل ہوئے۔ خواتین کی 57 اور اقلیتوں کی 7 نشستیں ملیں۔

سنی اتحاد کونسل کے پنجاب اسمبلی میں جنرل نشستوں پر کامیاب ارکان کی تعداد 106 ہے تاہم الیکشن کمیشن کی جانب سے سنی کونسل کو مخصوص نشستوں کی الاٹمنٹ سے انکار کے باعث ان کی نشستوں میں اضافہ نہیں ہوا۔

پنجاب اسمبلی میں پیپلز پارٹی کی نشستوں کی تعداد 16 ہو گئی۔ پی پی نے 10 جنرل نشستیں جیتیں، ایک آزاد رکن شامل ہوا جس کی بنیاد پر اس کو خواتین کی 4 جب کہ اقلیت کی ایک نشست ملی۔

پنجاب اسمبلی میں ق لیگ کے ارکان کی تعداد 11 ہو گئی۔ اس جماعت نے 8 جنرل نشستیں جیتیں جس کی بنیاد پر اس کو خواتین کی تین مخصوص نشستیں ملیں جب کہ استحکام پاکستان پارٹی کے پنجاب اسمبلی میں ارکان کی تعداد 6 ہو گئی ہے۔ آئی پی پی نے ایک جنرل نشست جیتی، تین آزاد اراکین شامل ہوٗے جس کی بنیاد پر خواتین کی دو مخصوص نشستیں ملیں۔

پنجاب اسمبلی میں تحریک لبیک پاکستان، مسلم لیگ ضیا اور مجلس وحدت مسلمین کی ایک، ایک نشست ہے۔

واضح رہے کہ پنجاب اسمبلی کے ایک حلقے میں الیکشن نہیں ہوا جب کہ 4 حلقوں کے نوٹیفکیشن الیکشن کمیشن نے روک رکھے ہیں۔

پلڈاٹ نے عام انتخابات 2024 سے متعلق جائزہ رپورٹ جاری کر دی جس میں سب سے کم منصفانہ اسکور ریکارڈ کیا گیا ہے۔

پاکستان میں 8 فروری 2024 کو ہونے والے عام انتخابات سے متعلق پلڈاٹ نے جائزہ رپورٹ جاری کر دی ہے جس میں کہا گیا ہے کہ حالیہ عام انتخابات میں سب سے کم منصفانہ اسکور ریکارڈ کیا گیا جب کہ انتخابات کے شیڈول میں کافی تاخیر، سیاسی جبر، نگراں حکومت کی غیر جانبداری کا فقدان بھی دیکھا گیا۔

اس جائزہ رپورٹ میں کہا گیا ہے کہ الیکشن سے قبل خیبر پختونخوا اور بلوچستان میں امن و امان کی بگڑتی ہوئی صورتحال تھی جب کہ پولنگ کے دن موبائل، انٹرنیٹ سروسز معطل کی گئیں جس کی وجہ سے انتخابی عمل میں عوام کی شرکت میں مشکلات پیدا ہوئیں۔

پلڈاٹ کا کہنا ہے کہ موبائل، انٹرنیٹ سروسز معطل کر کے الیکشن منیجمنٹ سسٹم سے بھی سمجھوتہ کیا گیا، پولنگ کے بعد عارضی نتائج کے اعلان میں تاخیر نے انتخابات کی ساکھ پر سنگین سوالات کو جنم دیا جب کہ فارم 45 اور 47 میں بڑے پیمانے پر تفاوت کے الزامات نے بھی انتخابی ساکھ پر خدشات کو بڑھایا۔

رپورٹ میں اس بات کی بھی نشاندہی کی گئی  ہے کہ الیکشن کمیشن کی ویب سائٹ پر فارم 45، 46، 48 اور 49 کی اشاعت میں تاخیر سے ہوئی، الیکشنز ایکٹ 2017 کی خلاف ورزی نے الیکشن کی ساکھ کو مزید نقصان پہنچایا۔

پلڈاٹ نے اپنی رپورٹ میں سنی اتحاد کونسل کو مخصوص نشستوں کی الاٹمنٹ کا معاملہ بھی اٹھایا ہے اور کہا ہے کہ سنی اتحاد کونسل کو مخصوص نشستوں کی الاٹمنٹ پولنگ کے دن سے ہی بڑا تنازع بنی رہی، الیکشن کمیشن کی جانب سے اس جماعت  کے سوا باقی تمام پارلیمانی جماعتوں کو مخصوص نشستیں الاٹ کی گئیں۔