اسلام آباد : وزیراعظم شہباز شریف کا کہنا ہے کہ معاشی صورتحال پاکستان کے لئے زندگی اورموت کا مسئلہ ہے، رونے دھونے سے کچھ نہیں بدلے گا، چیلنج قبول کرتےہوئے آگے بڑھنا ہے۔

تفصیلات کے مطابق وزیراعظم شہباز شریف کی زیرصدارت معاشی صورتحال اور ایف بی آرکی آٹومیشن پراجلاس ہوا ، جس میں معاشی نظام کی اصلاح اورحکومتی اخراجات میں کمی کیلئے جامع سفارشات طلب کرلی گئیں۔

اجلاس میں ایف بی آر کی مکمل ڈیجیٹلائزیشن اور آٹومیشن کےعمل کے فوری آغازکی ہدایت کرتے ہوئے کہا کہ ایف بی آر کی ڈیجیٹلائزیشن کیلئے دنیا کا بہترین ماڈل اپنایا جائے۔

وزیراعظم نے بہترین خدمات کےفوری حصول کے امکانات کا جائزہ لینے کی ہدایت کرتے ہوئے کہا کہ ٹریک اینڈٹریس سسٹم کیلئے میرٹ پرقابل لوگ لائےجائیں، وزارت داخلہ اسمگلنگ کےخاتمےکیلئے پوری قوت سے کام کرے گی، مسلح افواج بھرپور معاونت کرے گی اور خود نگرانی کروں گا۔

شہباز شریف کا کہنا تھا کہ معاشی صورتحال پاکستان کےلئےزندگی اورموت کامسئلہ ہے، ماضی میں جو ہوگیا اس سےہم سبق سیکھ کر آگے بڑھیں، رونے دھونے سے کچھ نہیں بدلے گا،چیلنج قبول کرتے ہوئے آگےبڑھناہے۔

انھوں نے مزید کہا کہ ادھار کی زندگی سےنجات حاصل کرنے کی راہ اختیارکرناہوگی، ملک کودرپیش حالات کےسب ذمہ دارہیں جبکہ قابل لوگ ہرجگہ ہیں، آج درست راستے پر سفرشروع کیا تو جلد کامیابی کی منزل سےہمکنارہونگے۔

اجلاس میں کہا گیا کہ پیشہ ورانہ قابلیت رکھنے والے افسران کو انعامات دیں گے ، ریونیو دینے اورغیرمعمولی ریونیو جمع کرنے والوں کو انعام دینے پر غور ہے۔

وزیراعظم نے شمشاداختر،سیکریٹری خزانہ امداداللہ اورٹیم کی تعریف کرتے ہوئے کہا ڈیفالٹ سےبچانےکی بنیادہم رکھ کر گئے تھے، ٹیم نےمحنت سے آگے بڑھایا، شمشاداخترکی میرٹ پالیسی سےبہت متاثرہوں۔

اسلام آباد : آئی ایم ایف کی شرائط پرعملدرآمد کرتے ہوئے نئی حکومت یکم جولائی سے نئی رضاکارانہ پنشن اسکیم لانے کی تیاری کررہی ہے۔

تفصیلات کے مطابق نئی حکومت میں بھی آئی ایم ایف کی شرائط پرعملدرآمد جاری ہے، سرکاری ملازمین کے لیے نئی اسکیم کی تجویز سامنے آگئی۔

سرکاری ملازمین کو حکومتی پنشن کے بجائے رضاکارانہ پنشن کی اسکیم دی جائے گی، ذرائع وزارت خزانہ کا کہنا ہے یکم جولائی سے نئی رضاکارانہ پنشن اسکیم لانے کی تیاری کی جارہی ہے، نئی پنشن اسکیم سکیورٹیز اینڈ ایکسچینج کمیشن نے تیار کی ہے۔

وزارت خزانہ نے کہا ہے کہ مجوزہ اسکیم کے تحت ملازمت کی تبدیلی کی صورت میں بھی ملازمین کو پنشن کی سہولت جاری رہے گی، اس اسکیم کے سرکاری اور نجی دونوں شعبوں پراطلاق کی تجویزبھی دی گئی ہے۔

خیال رہے آئی ایم ایف نے پاکستان سے پنشن اخراجات کو محدود کرنے کیلئے رضاکارانہ پنشن اسکیم شروع کرنے کا مطالبہ کیا ہے، رضاکارانہ پنشن اسکیم کی ضروری قانون سازی فنانس بل میں ہوگی۔

آئی ایم ایف نے تجویز دی تھی کہ قبل از وقت ریٹائرمنٹ کی حوصلہ شکنی کی جائے اور پنشنرزکو صرف ایک پنشن دی جائے، مختلف اداروں میں کام کرنیوالے ریٹائرڈ افسران کوالگ الگ پنشن نہ دی جائے، ایک پنشنر کو 3،3پنشن دینے کا سلسلہ ختم ہونا چاہیے۔

کراچی : سندھ ہائیکورٹ نے سوشل میڈیا ایپ ایکس کی بندش کے کیس میں چیئرمین پی ٹی اے کو توہین عدالت کی درخواست پر نوٹس جاری کرتے ہوئے اگر ایکس کی بندش سے متعلق کوئی معقول جواز عدالت کے سامنے پیش نہ کیا تو توہین عدالت کی کارروائی ہوگی۔

تفصیلات کے مطابق سندھ ہائیکورٹ میں سوشل میڈیا ایپ ایکس کی بندش کے کیس کی سماعت ہوئی، سندھ ہائیکورٹ نے توہین عدالت کی درخواست پرتحریری حکم نامہ جاری کردیا۔

عدالت نے چیئرمین پی ٹی اے کو توہین عدالت کی درخواست پر نوٹس جاری کردئیے اور کہا کہ ایکس کی بندش پر معقول جواز پیش نہ کیا تو توہین عدالت کی کارروائی ہوگی، ایسا کرکےچیئرمین پی ٹی اےتوہین عدالت کی کارروائی کیلئے خود کو پیش کررہے ہیں۔

سندھ ہائیکورٹ نےایکس کی بحالی سےمتعلق جاری حکم امتناع میں توسیع کردی اور عدالتی احکامات وفاقی حکومت ،پی ٹی اے سمیت دیگر کو ارسال کرنے کا حکم دے دیا۔

عدالت نے کہا کہ وفاقی حکومت اور پی ٹی اے کی جانب سےجواب جمع کرانے کیلئےمہلت طلب کی ہے ، جس پر آئندہ سماعت سےقبل وزارت داخلہ اور پی ٹی اے سے جواب طلب کرلیا گیا۔