واشنگٹن : امریکی محکمہ خارجہ کے ترجمان میتھیوملر نے پاکستان میں ایکس سمیت انٹرنیٹ پلیٹ فارمز پر حکومتی بندش کی مذمت کرتے ہوئے کہا کہ ہم پاکستانی حکام پربنیادی آزادیوں کےاحترام کی اہمیت پرزوردیتے رہیں گے۔

تفصیلات کے مطابق واشنگٹن میں ترجمان امریکی محکمہ خارجہ میتھیو ملر نے پریس بریفنگ کے دوران کہا کہ دنیابھرکی طرح پاکستان میں بھی آزادی اظہارکی حمایت کرتے ہیں۔

میتھیو ملر نے ایکس سمیت انٹرنیٹ پلیٹ فارمز پر حکومتی بندش کی مذمت کرتے ہوئے کہا کہ ہم پاکستانی حکام پربنیادی آزادیوں کے احترام کی اہمیت پرزوردیتے رہیں گے۔

انہوں نے نشاندہی کی کہ امریکی محکمہ خارجہ نے ماضی میں بھی حکومت کی طرف سے انٹرنیٹ پلیٹ فارمز کی جزوی یا مکمل بندش کی مذمت کی ہے۔

یاد رہے اس سے قبل ترجمان امریکی محکمہ خارجہ میتھو ملر نے واشنگٹن میں پریس بریفنگ میں کہا تھا کہ امریکا پاکستان سمیت دنیا بھر میں اظہار رائے اور صحافتی آزادی دیکھنے کا خواہاں ہے اور چاہتے ہیں کہ پاکستانی عوام اپنی حکومت اور پاکستان کے مستقبل کا فیصلہ کریں۔

اسلام آباد : پیپلزپارٹی نے آصف زرداری کو صدر بنانے کیلئے نمبر گیم پورا کرلیا اور دعویٰ کیا کہ آصف زرداری کو تین سو پینتالیس الیکٹورل ووٹ کی یقین دہانی ہوگئی ہے۔

تفصیلات کے مطابق پیپلزپارٹی نے آصف زرداری کو صدر بنانے کیلئے نمبرپورے کرلیے، ذرائع کا دعویٰ ہے کہ آصف زرداری کوتین سوپینتالیس الیکٹورل ووٹوں کی یقین دہانی ہو چکی ہے۔

ذرائع کا کہنا ہے کہ ایم کیو ایم نے آصف زرداری کوووٹ دینے کی یقین دہانی تاحال نہیں کرائی، ایم کیوایم کی جانب سے فیصلہ آج کیے جانے کا امکان ہے۔

دوسری جانب صدارتی مہم کمیٹی کے ارکان نے بلاول بھٹو سے ملاقات کی، جس میں انہیں بتایا گیا آصف زرداری کے لیے ق لیگ، آئی پی پی، بی اے پی کی حمایت حاصل ہوگئی ہے۔

خیال رہے پاکستان کے نئے صدر مملکت کا انتخاب ہفتہ 9 مارچ کو ہوگا، جس میں مسلم لیگ ن، پیپلز پارٹی، مسلم لیگ (ق)، ایم کیو ایم پی، آئی پی پی، بی اے پی، مسلم لیگ ضیاء اور نیشنل پارٹی پر مشتمل اتحاد کی جانب سے نامزد آصف علی زرداری اور پی ٹی آئی اور سنی اتحاد کونسل کے نامزد کردہ پشتونخوا ملی عوامی پارٹی کے سربراہ محمود خان اچکزئی میں مقابلہ ہوگا۔