فیصل آباد: مسلم لیگ (ن) پنجاب کے صدر رانا ثنا اللہ کا کہنا ہے کہ 9 مئی کو اداروں پر حملہ کیا گیا اب لیول پلئینگ فیلڈ مانگ رہے ہیں، پی ٹی آئی بلاشبہ سیاسی جماعت ہے لیکن ان کے لیڈر نے ریڈ لائن کراس کروائی۔

تقریب سے خطاب کرتے ہوئے رانا ثنا اللہ نے کہا کہ 2018 میں جس شخص کو لایا گیا اس نے ملک کا بیڑہ غرق کیا، اس آدمی نے بس یہی رٹ لگائے رکھی کسی کو نہیں چھوڑوں گا۔

رانا ثنا اللہ نے کہا کہ 2018 میں مشکل حالات تھے بہت سی قوتیں مسلم لیگ (ن) کا راستہ روک رہی تھیں، 2017 میں ڈالر 108 روپے اور پیٹرول 65 روپے لیٹر تھا، اُس وقت دنیا بھی کہہ رہی تھی پاکستان نے اپنے مسائل پر قابو پالیا ہے۔

متعلقہ: (ن) لیگ الیکشن میں اکثریت حاصل کرنے جا رہی ہے، رانا ثنا اللہ

انہوں نے کہا کہ جو کہتے تھے جیلوں میں ڈالوں گا وہ خود اس کا شکار ہوگئے، جھوٹے مقدموں کے بعد ہمیں جیلوں تک بھیجا  گیا، وہ شخص اپنے گناہوں کی وجہ سے جیل میں ہے لیکن وہاں ہر سہولت دی گئی، دورہ امریکا پر اس شخص نے کہا تھا نواز شریف کے جیل کمرے سے اے سی اتار دوں گا۔

’اس شخص کے اس رویے کی وجہ سے ملک بد حال ہوگیا۔ اس شخص نے 9 مئی کو اداروں پر حملہ کیا اب لیول پلئینگ فیلڈ مانگ رہا ہے۔ احتجاج کا یہ مطلب نہیں ملکی دفاعی اداروں پر چڑھ دوڑیں۔ اداروں پر حملوں کو سیاسی احتجاج نہیں کہا جا سکتا۔ احتجاج کے نام پر حد سے تجاوز کرنے والوں کو معافی نہیں ملے گی۔‘

انہوں نے کہا کہ شہباز شریف نے اسمبلی میں کھڑے ہو کر مل بیٹھنے کی بات کی لیکن اس شخص نے جواب دیا تھا تم لوگوں کو جیلوں میں ڈالوں گا، پچھلی حکومت نے پونے 4 سال سیاسی مقدمے اور گالیاں سکھانے پر ضائع کیے، وہ حکومت ملک میں سماجی، اخلاقی اور سیاسی بحران لائی۔

استحکام پاکستان پارٹی کے صدر علیم خان کا کہنا ہے کہ عوام عام انتخابات میں منتخب کریں ہم ان 300 یونٹ بجلی مفت میں فراہم کریں گے۔

علیم خان نے اپنے ایک بیان میں کہا کہ اپنے حلقے میں دوستوں سے رابطہ شروع کیا ہے، عوام کی خدمت الیکشن جیتنے کیلیے نہیں کر رہے، فری ڈسپنسری چلا رہا ہوں، یہ وہی ڈسپنسریاں ہیں جو پورے ملک میں بنانا چاہتا ہوں۔

انہوں نے کہا کہ لوگوں کا سب سے بڑا مسئلہ بجلی کا بل ہے، لوگوں کے پاس بل ادا کرنے کے پیسے نہیں ہیں، ہماری حکومت واپڈا کو پیسے دے گی اور عوام کو بجلی مفت ملے گی، 300 یونٹ سے زائد بل والا اپنا بل خود ادا کرے گا۔

اس سے قبل حافظ آباد میں ورکرز کنونشن سے خطاب کرتے ہوئے علیم خان نے ایسا ہی دعویٰ کیا تھا۔ ان کا کہنا تھا کہ ہماری حکومت آئی تو پیٹرول 140 روپے فی لیٹر ملے گا۔

علیم خان نے کہا تھا کہ 2018 میں پیٹرول کی قیمت 95 روپے تھی اور آج 290 روپے ہے، بجلی کی قیمت فی یونٹ 11 روپے تھی اور آج 60 روپے ہے، چینی 52 روپے فی کلو تھی اور آج 225 روپے ہے، آٹا 37 روپے تھا اور آج 200 روپے فی کلو ہے۔

صدر آئی پی پی نے کہا تھا کہ یہ فرق 5 سال رہنے والے حکمرانوں نے کیا ہے، جن لوگوں نے مہنگائی کی ہے کیا ان کو ووٹ دینا چاہیے؟ جب یہ لوگ ووٹ مانگیں تو ان سے کہنا مہنگائی آپ نے کی ہے۔

ان کا کہنا تھا کہ آئی پی پی مزدور کی تنخواہ کم از کم 50 ہزار مقرر کرے گی، ہمارے دور میں 295 روپے والا پیٹرول 140 روپے میں ملے گا، غریبوں کیلیے نئی فیکٹریاں لگائی جائیں گی، ہنرمند نوجوان کو قرض دیا جائے گا تاکہ وہ اپنا کام کر سکیں۔