اسلام آباد: قومی ایئر لائن (پی آئی اے) کے حق میں 13 سال قبل مقدمے کا فیصلہ آگیا جس کے نتیجے میں مالی معاوضے کی مد میں 3 ارب 9 کروڑ 10 لاکھ روپے موصول ہوئے۔

وفاقی وزیر ہوا بازی خواجہ آصف نے سوشل میڈیا پلیٹ فارم ایکس پر جاری اپنے بیان میں تصدیق کی کہ پی آئی اے سے متعلق بہترین خبر سامنے آئی ہے، 13 سال پہلے مقدمے کا فیصلہ پی آئی اے انویسٹمنٹ لمیٹڈ کے حق میں آیا۔

یہ بھی پڑھیں: پی آئی اے اچانک اتنا منافع بخش کیسے ہوگیا؟ خسارے کی بڑی وجہ سامنے آگئی

خواجہ آصف نے کہا کہ فیصلے کے بعد پی آئی اے انویسٹمنٹ لمیٹڈ کے اکاؤنٹ میں 3 ارب 9 کروڑ 10 لاکھ روپے موصول ہوئے، فیصلے اور اس پر عملدرآمد میں 28 سال کا وقت لگا۔

An excellent news to share finally Justice prevailed, and PIA investment Ltd last evening received in its account a sum of US$ 11m, in compliance with the Arbitration Award rendered in its favor 13 years back.
It took 28years for arbitration+implementation of arbitration award.

— Khawaja M. Asif (@KhawajaMAsif) July 4, 2025

یاد رہے کہ اپریل 2025 میں قومی ایئر لائن کے بورڈ آف ڈائریکٹرز نے اس کے سال 2024 کے سالانہ نتائج کی منظوری دی تھی جس کے مطابق ادارے نے 21 سال کی طویل مدت کے بعد خالص منافع حاصل کیا۔

سال 2024 کے نتائج کے مطابق پی آئی اے نے 9.3 ارب روپے آپریشنل منافع جبکہ 26.2 ارب روپے خالص یا نیٹ منافع کمایا۔ اس کا آپریٹنگ مارجن 12 فیصد سے زیادہ رہا جو دنیا کی کسی بھی بہترین ائیر لائن کی پرفارمنس کے ہم پلہ ہے۔ اس کا آخری منافع سال 2003 میں حاصل کیا تھا جس کے بعد دو دہائیوں تک یہ خسارے سے دوچار رہی۔

حکومت پاکستان کی سرپرستی سے پی آئی اے میں جامع اصلاحات کیے گئے اور ان اصلاحات کے دوران اس کی افرادی قوت اور اخراجات میں واضح کمی، منافع بخش روٹس میں استحکام، نقصاندہ روٹس کا خاتمہ اور بیلنس شیٹ ریسٹرکچرنگ کی گئی۔

وزیر ہوا بازی خواجہ آصف کی جانب سے اس امر کا باضابطہ اعلان کیا گیا اور اس اعلیٰ مالیاتی کارکردگی کو نجکاری کیلیے بہت اہم قرار دیا گیا تھا۔

کراچی: ترجمان سندھ حکومت نادر گبول کا کہنا ہے کہ لیاری کے علاقے بغداد میں گرنے والی عمارت کے مکینوں کو بلڈنگ کی خستہ حالت کا بتایا گیا تھا لیکن ان کا یہی کہنا تھا کہ ہم کہاں جائیں گے۔

اے آر وائی نیوز سے گفتگو کرتے ہوئے ترجمان سندھ حکومت نے بتایا کہ وزیر اعلیٰ مراد علی شاہ نے کمیٹی بنائی ہے ذمہ داروں کا تعین ہوگا، یہ درست ہے 80، 80 گز کے پلاٹ پر بغیر اجازت عمارتیں کھڑی کر دی جاتی ہیں۔

نادر گبول نے بتایا کہ میرے والد نبیل گبول نے ایس بی سی اے کے سربراہ سے ملاقات بھی کی تھی اور عمارتوں کی خستہ حالت پر ایکشن لینے کا بھی کہا تھا، ایسی بہت سی عمارتیں ہیں جن کے اوپر کی منزلیں توڑی گئی ہیں،

یہ بھی پڑھیں: کراچی میں 6 منزلہ رہائشی عمارت گر گئی

انہوں نے کہا کہ کراچی کے بہت سے علاقے ایسے ہیں جہاں جھونپڑیاں بنا کر قبضہ کیا جاتا ہے، سندھ حکومت اپنے وسائل سے ہر ممکن اقدامات کر رہی ہے، خستہ حال عمارتوں سے متعلق مکینوں میں بھی آگاہی دینے کی ضرورت ہے۔

ان کا کہنا تھا کہ لیاری میں گلیاں تنگ ہیں اس لیے امدادی سرگرمیوں میں مشکلات کا سامنا ہے، کوشش کر رہے ہیں کہ تمام مشینریز کو جائے وقوع پر پہنچایا جائے۔

نادر گنول نے مزید بتایا کہ وزیر اعلیٰ سندھ مراد علی شاہ واقعے کے بعد صورتحال کو خود مانیٹر کر رہے ہیں، صوبائی حکومت اردگرد کی عمارتوں کی حالت دیکھ کر اقدامات کرے گی، اگر وہ مخدوش ہوئیں تو رہائشیوں کو متبادل فراہم کریں گے۔

اسلام آباد: صدر مملکت آصف علی زرداری اور وزیر اعظم شہباز شریف نے کراچی میں رہائشی عمارت گرنے سے جانی نقصان پر افسوس کا اظہار کیا ہے۔

صدر مملکت آصف علی زرداری نے حادثے پر گہرے دکھ اور رنج کا اظہار کیا جبکہ سندھ حکومت کو امدادی سرگرمیوں میں تیزی لانے کی ہدایت کی۔

آصف علی زرداری نے متاثرہ افراد کو فوری ریسکیو کرنے اور ملبے تلے پھنسے افراد کو نکالنے پر زور دیا۔ انہوں نے جاں بحق افراد کے اہل خانہ سے دلی تعزیت اور ہمدردی جبکہ زخمیوں کی جلد صحتیابی اور بحالی کی دعا کی۔

یہ بھی پڑھیں: کراچی میں سب سے زیادہ مخدوش عمارتیں کس ضلع میں ہیں؟

انہوں نے حادثے کی وجوہات کا فوری تعین کرنے اور مستقبل میں ایسے واقعات سے بچاؤ کیلیے مؤثر اقدامات کی ہدایت کی۔

وزیر اعظم شہباز شریف نے کراچی میں رہائشی عمارت گرنے سے ہونے والے جانی نقصان پر افسوس کا اظہار کیا اور جاں بحق ہونے والوں کی بلندی درجات کی دعا اور ان کے اہل خانہ سے اظہار تعزیت کیا۔

شہباز شریف نے زخمیوں کی جلد صحت یابی کی دعا۔ انہوں نے زخمیوں کو ہر ممکن طبی سہولتیں فراہم کرنے اور ملبے میں پھنسے افراد کو بچانے کے حوالے سے ریسکیو آپریشن تیز تر کرنے کی ہدایت کی۔

انہوں نے کہا کہ آئندہ ایسے حادثات سے بچاؤ کیلیے ترجیحی بنیادوں پر حکمت عملی ترتیب دی جائے۔