اسلام آباد : وفاقی تحقیقاتی ادارے ( ایف آئی اے) کا سائبر ونگ ختم کرکے نیشنل سائبرکرائم انویسٹی گیشن ایجنسی فعال کردی گئی۔

تفصیلات کے مطابق وفاقی تحقیقاتی ادارے نے سائبر ونگ ختم کردیا اور نیشنل سائبرکرائم انویسٹی گیشن ایجنسی فعال کر دی گئی۔

وفاقی تحقیقاتی ادارے سائبر ونگ کا تمام عملہ اب این سی سی آئی اے کے ماتحت کام کرے گا اور سائبر ونگ کے مقدمے این سی سی آئی اے کو منتقل کر دیے گئے۔

پولیس گریڈ بیس کے افسر وقار الدین سید کو ڈی جی نیشنل سائبرکرائم ایجنسی تعینات کر دیا گیا، جس کا نوٹی فکیشن بھی جاری ہو گیا ہے، وقارالدین سید ایف آئی اے میں خدمات سرانجام دے رہے تھے۔

اسلام آباد : سابق نگراں وزیر گوہر اعجاز  نے امریکا کے ساتھ فری ٹریڈایگریمنٹ کی تجویز دے دی اور کہا امریکا کیساتھ برآمدات پر ڈیوٹیز اور ٹیکسز میں کمی کیلئے مذاکرات کیے جائیں۔

تفصیلات کے مطابق سابق نگراں وزیر گوہر اعجاز نے امریکا کے ساتھ فری ٹریڈ ایگریمنٹ کی تجویز دیتے ہوئے امریکا کے ساتھ آزادانہ تجارتی معاہدے پر مذاکرات کیے جائیں، پاکستان امریکی مصنوعات کو ڈیوٹی فری درآمدات کی اجازت دے سکتا ہے۔

گوہر اعجاز کا کہنا تھا کہ امریکا کیساتھ برآمدات پر ڈیوٹیز اور ٹیکسز میں کمی کیلئے مذاکرات کیے جائیں، امریکا کا بڑا اعتراض ہے پاکستان نے امریکی مصنوعات پر ٹیرف لگایا۔

سابق نگراں وزیر نے کہا کہ امریکا کو شکایت ہے پاکستان امریکی مصنوعات کو اجازت نہیں دے رہا، امریکی مصنوعات کو پاکستان کی مارکیٹ تک کھلی اجازت دینا فائدہ مند ہے۔

ان کا کہنا تھا کہ پاکستان اپنی مارکیٹ کھول کر امریکا کا تجارتی خسارہ کم کرسکتا ہے، پاکستان کا امریکا کے ساتھ 3 ارب ڈالرز کا تجارتی سرپلس ہے، امریکا پاکستانی مصنوعات کی سب سے بڑی مارکیٹ ہے۔

سابق نگراں وزیر نے مزید کہا کہ ٹرمپ ٹیرف پاکستان کے لیے ایک منفرد موقع ہیں، پاکستان امریکی مصنوعات کو ترجیح دے سکتا ہے، پاکستان امریکا سے کاٹن کی درآمد پر ٹیکسز اور ڈیوٹیز زیرو کر سکتا ہے اور امریکا سے مشینری کی درآمد پر ڈیوٹیز کی چھوٹ دے سکتاہے۔

انھوں نے بتایا کہ امریکا کی لیدر اور جوتوں کی مارکیٹ کو دیگرسپلائرز سے دھچکا لگا ہے، پاکستان امریکا کی لیدراور فٹ ویئر مارکیٹ میں جگہ بناسکتاہے، پاکستان9.5 سینٹ بجلی کے نرخ اور 100 ڈالر لیبر پر عالمی منڈی میں مقابلہ کرسکتا ہے۔

سابق نگراں وزیر کا کہنا تھا کہ امریکی مصنوعات کو کم ترین ٹیرف پر پاکستان تک رسائی دی جائے، امریکا نے چین پر 54 فیصد اور ویتنام پر 46 فیصد ڈیوٹیز عائد کی ہیں، پاکستان نے گزشتہ 8 ماہ میں امریکا کو 4 ارب ڈالرزکی مصنوعات برآمد کی۔

انھوں نے تجویز دی کہ چین کی صنعتوں کو پاکستان منتقل کرنے کے لیے پارٹنر شپ کی جائے۔

لاہور: محکمہ وائلڈ لائف نے کارروائی کرتے ہوئے بٹیر کی اسمگلنگ کی کوشش ناکام بناتے ہوئے 110 بٹیر برآمد کرلئے۔

تفصیلات کے مطابق محکمہ وائلڈلائف نے بٹیر کی اسمگلنگ کی کوشش ناکام بنا دی، ڈی جی خان میں وائلڈلائف نے کارروائی کرتے ہوئے 110 بٹیر برآمد کرلئے۔

سینئیر صوبائی وزیر مریم اورنگزیب نے کہا کہ کہ بٹیر اسمگلنگ ناکام بنا کر جنگلی پرندوں کے تحفظ میں اہم پیشرفت ہوئی، ملزمان کیخلاف کارروائی جاری ہے ، تفتیش کا دائرہ وسیع کیا جا رہا ہے۔

مریم اورنگزیب کا کہنا تھا کہ جنگلی حیات پرحملہ قدرتی توازن پرحملہ ہے،ایسے عناصر کو بخشا نہیں جائےگا۔

سینئیر صوبائی وزیر نے بتایا کہ محکمہ وائلڈلائف نےآگاہی مہم شروع کردی، تعلیمی اداروں اوردیہات میں سرگرمیاں ہوں گی، نوجوانوں میں جنگلی حیات کی اہمیت اجاگر کرنے کیلئے تربیتی پروگرامز کررہے ہیں۔

انہوں نے مزید کہا کہ وزیراعلیٰ پنجاب کی زیر قیادت جنگلی حیات کے تحفظ کے لیے زیرو ٹالرنس پالیسی پر سختی سے عملدرآمد جاری ہے۔ وائلڈ لائف ٹیمیں کرین اور بٹیر سمیت دیگر قیمتی پرندوں کے تحفظ کے لیے مختلف ہاٹ اسپاٹس پر مسلسل گشت کر رہی ہیں۔

کراچی : قومی ایئرلائن ( پی آئی اے) کی جانب سے قبل از حج آپریشن کا اعلان کردیا گیا، آپریشن 29 اپریل سے یکم جون تک جاری رہے گا۔

تفصیلات کے مطابق پاکستان انٹرنیشنل ایئرلائن (پی آئی اے) نے حج آپریشن کی تیاریاں مکمل کرلیں ، قبل از حج آپریشن 29 اپریل سے یکم جون تک جاری رہے گا۔

اس دوران قومی ایئرلائن مجموعی طور 56 ہزار سے زائد عازمین حج کو 280 پروازوں سےحجازمقدس پہنچائے گی۔

قومی ایئرلائن کا بعد از حج آپریشن 12 جون سے 10 جولائی تک جاری رہےگا ، حج آپریشن میں بوئنگ 777 اور ائیر بس 320 طیارے آپریٹ کرے گا۔

ذرائع کے مطابق رواں سال 20 ہزار عازمین سرکاری حج اسکیم کے تحت جب کہ 36 ہزار پرائیویٹ اسکیم کے تحت پی آئی اے کی پروازوں سے سفر کریں گے۔

ترجمان کا کہنا ہے کہ تمام پروازیں وقت پر اور محفوظ طریقے سے مکمل کرنے کے لیے خصوصی انتظامات کیے گئے ہیں اور عازمین حج کو کسی بھی زحمت سے بچانے کے پیش نظر ہر ممکن سہولت فراہم کی جائے گی۔

کراچی: تاریخ میں پہلی بار یورپی یونین کی ہدایت پر یورپ کی سول ایوی ایشن ٹیم پاکستان آ رہی ہے۔

تفصیلات کے مطابق سول ایوی ایشن اتھارٹی پاکستان کی کوششوں کے نتیجے میں تاریخ میں پہلی بار یورپی سول ایوی ایشن ٹیم کی پاکستان آمد ہو رہی ہے۔

2 ارکان پر مشتمل یورپ کی سول ایوی ایشن ٹیم اگلے ہفتے پاکستان پہنچے گی، یہ ٹیم اسلام آباد ایئرپورٹ پر سول ایوی ایشن سیکیورٹی ریگولیٹرز کو ٹریننگ اور سرٹیفیکیشن دے گی۔

ترجمان سول ایوی ایشن کا کہنا ہے کہ ریگولیٹرز کو یورپی اسٹینڈرڈ کے مطابق ETD اور EDD پر خصوصی ٹریننگ دی جائے گی۔

برطانوی ٹیم نے قومی ایئرلائن اور سول ایوی ایشن کا آڈٹ مکمل کر لیا

یاد رہے کہ رواں برس فروری کے ابتدائی ہفتے میں برطانیہ کی 7 رکنی ٹیم، جو برطانوی سول ایوی ایشن اور محکمہ ٹرانسپورٹ کے اہلکاروں پر مشتمل تھی، نے سول ایوی ایشن اور پاکستان انٹرنیشنل ایئر لائن کا آڈٹ کیا تھا۔ اس آڈٹ میں کامیابی پر پی آئی اے سمیت تمام پاکستانی ایئر لائنز پر 2020 سے لگی پابندی ختم ہو جائے گی۔