اسلام آباد : ڈائریکٹرایف آئی اے اسلام آبادزون نے لوگوں کو جعلی دستاویزات پربیرون ملک بھجوانے میں ملوث 2ملازمین کو برطرف کردیا۔
تفصیلات کے مطابق ڈائریکٹر ایف آئی اے اسلام آباد زون وقار احمد چوہان نے ایف آئی اے اسلام آباد میں خود احتسابی کا عمل تیز بناتے ہوئے دو ملازمین کو ملازمت سے برطرف کر دیا۔
ایف آئی اے امیگریشن اسلام آباد ایئرپورٹ کے کرپشن میں ملوث 2 ملازمین کو برطرف کیا گیا ، برطرف ملازمین لوگوں کو جعلی دستاویزات پر بیرون ملک بھجوانے میں ملوث پائے گئے۔
برطرف ملازمین کے خلاف مقدمات بھی درج کیے گئے تھے، بعداز مکمل انکوائری اور انکوائری آفیسر کی رپورٹ پر برطرف کیا گیا۔
ایف آئی اے کا کہنا ہے کہ برطرف ملازمین کو اپنے حق میں صفائی پیش کرنے کا پورا موقع دیا گیا لیکن ملازمین اپنے اوپر لگائے گئے الزامات کا کوئی تسلی بخش جواب پیش نہ کر سکے تھے۔
ڈائریکٹر ایف آئی اے نے مزید کہا کہ تحقیقات کا دائرہ کار مزید وسیع کرتے ہوئے جعلی سفری دستاویزات بنانے والے ایجنٹس کے خلاف بھی تحقیقات شروع کر دی گئی۔
وقار احمد چوہان کا کہنا تھا کہ کرپشن کرنے والے ملازمین کے لیے ایف آئی اے میں زیرو ٹالرنس رہے گی۔