پنجاب بھر میں شدید دھند کا راج ہے علامہ اقبال انٹرنیشنل ایئرپورٹ پر بھی حد نظر انتہائی کم ہونے کے باعث کئی پروازیں منسوخ کر دی گئیں۔

اے آر وائی نیوز کے مطابق لاہور سمیت پنجاب بھر میں گزشتہ کئی روز سے شدید دھند کا راج برقرار ہے جس نے معمولات زندگی درہم برہم کردیے ہیں۔ علامہ اقبال ایئرپورٹ پر بھی دھند چھائی ہوئی ہے اور حد نگاہ انتہائی کم ہوکر صرف 50 میٹر تک رہ گئی ہے جس کے باعث کئی ملکی اور بین الاقوامی پروازوں کو آج بھی منسوخ کردیا گیا ہے۔

ایئرپورٹ ذرائع کے مطابق استنبول سے لاہور اور لاہور سے استنبول جانے والی پروازیں منسوخ کر دی گئی ہیں۔ اسی طرح مسقط جانے والی غیر ملکی ایئر لائن کی پرواز ڈبلیو وائی 342 کو بھی منسوخ کر دیا گیا ہے۔

کراچی سے لاہور اور لاہور سے کراچی جانے والی پروازیں بھی منسوخ کردی گئی ہیں۔

یہ بھی پڑھیں: شدید دھند نے ٹرینوں کی رفتار بھی سست کردی، گھنٹوں کی تاخیر

دبئی سےآنے والی پی آئی اے کی پرواز پی کے203 دس گھنٹے تاخیر کا شکار ہے جب کہ دبئی سے ہی آنے والی پی آئی اے کی ایک اور پرواز پی کے 204 کو جمعرات کی صبح 4 بجے آپریٹ کرنے کا فیصلہ کیا گیا ہے۔

ماہر معاشیات شبر زیدی کا کہنا ہے کہ مارچ میں نگراں حکومت آسکتی ہے معلومات کے مطابق نگراں حکومت کیلیے ایک ماہ کا ٹائم فریم دیا گیا۔

اے آر وائی نیوز کے مطابق ماہر معاشیات اور سابق چیئرمین ایف بی شبر زیدی کا گفتگور کرتے ہوئے کہنا ہے کہ مارچ میں نگراں حکومت آسکتی ہے۔ صرف اس کی مدت کا مسئلہ ہے جس کا آئینی حل تلاش کیا جا رہا ہے۔ معلومات کے مطابق نگراں حکومت کے لیے ایک ماہ کا ٹائم فریم دیا گیا ہے۔

شبر زیدی نے مزید کہا کہ ملک میں معاشی صورتحال کے باعث معاشی ایمرجنسی لگائی جاسکتی ہے۔ ملک کے لیے مشکل فیصلے سیاسی حکومت برداشت نہیں کرسکتی۔ نگراں حکومت کو دو سال دینے چاہئیں تاکہ وہ ایسے فیصلے کرسکے جو سیاسی جماعتیں نہیں کرنا چاہتیں۔

یہ بھی پڑھیں: پاکستان کی معاشی صورتحال پر جلد بڑا فیصلہ ہونے والا ہے، شبر زیدی

ان کا کہنا تھا کہ وزیراعظم شہباز شریف نے بھی کہا ہے کہ اندازہ نہیں تھا کہ معاشی حالات اتنے خراب ہیں۔ حکومت سوچ رہی ہے کہ غیر سیاسی فیصلہ کر کے الیکشن کا اعلان کر دیا جائے۔

لاہور سمیت پنجاب بھر میں جاری شدید دھند نے ٹرینوں کی رفتار بھی سست کردی ہے اور وہ گھنٹوں تاخیر کا شکار ہو رہی ہیں۔

اے آر وائی نیوز کے مطابق لاہور سمیت پنجاب بھر میں گزشتہ کئی روز سے جاری شدید دھند نے جہاں شہریوں کے معمولات زندگی درہم برہم اور فضائی سفر کو متاثر کیا ہے وہیں اب ٹرینوں کو بھی اپنی رفتار دھیمی کرنی پڑ گئی ہے اور وہ منزل تک پہنچنے کے لیے گھنٹوں تاخیر کا شکار ہو رہی ہیں۔

دھند کی شدت اتنی ہے کہ پنجاب کا ہر منظر دھندلا گیا ہے اور حد نگاہ انتہائی کم ہونے سے چند فٹ سے آگے کچھ دکھائی نہیں دے رہا ہے۔ ایسے میں کراچی اور کوئٹہ سے مسافر ٹرینیں کئی گھنٹے تاخیر سے لاہور پہنچ رہی ہے جس سے مسافروں کو بھی مشکلات کا سامنا کرنا پڑ رہا ہے۔

ریلوے ذرائع کے مطابق پاکستان ایکسپریس 7 گھنٹے اور پاک بزنس ایکسپریس 6 گھنٹے تاخیر کا شکار ہے۔ کراچی سے لاہور آنے والی تیز گام ایکسپریس ساڑھے 5 گھنٹے لیٹ ہے۔

اسی طرح رحمان بابا ایکسپریس 5، ملت ایکسپریس 4، علامہ اقبال ایکسپریس 3 گھنٹے 40 منٹ دیر سے لاہور اسٹیشن پہنچیں گی۔ خیبر میل ایکسپریس بھی 3 گھنٹے تاخیر کا شکار ہے۔

یہ بھی پڑھیں: ملک میں شدید سردی اور پنجاب میں دھند کا راج برقرار

کراچی ایکسپریس کی آمد ڈھائی گھنٹے، قراقرم ایکسپریس 2 جب کہ فرید ایکسپریس ڈیڑھ گھنٹہ تاخیر سے پہنچیں گی۔ مچھ سے جعفر ایکسپریس کی آمد میں بھی 2 گھنٹے 20 منٹ کی تاخیر ہوگی۔

کراچی سے بھی ٹرینوں کی روانگی تاخیر کا شکار ہے۔ سکھر ایکسپریس 14 گھنٹے بعد بھی روانہ نہیں کیا جا سکا ہے اور اس کی جیکب آباد روانگی میں مزید 4 گھنٹے کی تاخیر ہے۔ لانڈھی، ڈرگ روڈ اور کینٹ اسٹیشن پر رات گئے سردی میں مسافر مشکلات کا شکار رہے اور سردی سے بچنے کے لیے مسافروں نے پلیٹ فارم پر موجود لکڑیوں کو آگ لگا کر ٹھنڈ کی شدت کم کرنے کی کوشش کی۔ ریلوے افسران کا فون بند اور معلومت نہ ملنے پر بھی مسافر دہری اذیت کا شکار ہیں۔

ملک بھر میں شدید سردی اور پنجاب میں دھند کا راج برقرار ہے موٹر ویز کئی مقامات پر بند ہیں اور شہریوں کو مشکلات کا سامنا ہے۔

اے آر وائی نیوز کے مطابق لاہور، ملتان، فیصل آباد، ساہیوال، حافظ آباد، ڈسکہ، پسرور، نورپور تھل، جھنگ، رینالہ خورد، حویلی لکھاں، ملکوال سمیت پنجاب کے بیشتر علاقوں میں دھند کا راج اور شدید سردی کی لہر برقرار ہے۔ حد نگاہ انتہائی کم ہوگئی ہے اور دھند نے ہر منظر کو دھندلا دیا ہے جس کے باعث ٹریفک کی روانی متاثر اور موٹر ویز کئی مقامات پر بند ہیں جب کہ ٹرینوں کی آمدورفت بھی شدید متاثر ہوئی ہے اور گھنٹوں کی تاخیر سے پہنچ رہی ہیں۔

گہری دھند کے سبب لاہورملتان موٹر وے فیض پورسے ننکانہ تک بند ہے۔ لاہور سیالکوٹ موٹر وے ایم الیون پر بھی دھند کی وجہ سے ٹریفک معطل ہے۔ موٹر وے ایم 2 لاہور سے ہرن مینار تک بند کردیا گیا ہے۔ ایسٹرن بائی پاس، ٹھوکر نیاز اور بابو صابو سے موٹر وے مکمل بند ہے۔ سیالکوٹ موٹر وے ایم 11 کو بھی بند کردیا گیا ہے۔

اس حوالے سے ترجمان موٹر ویز نے کہا ہے کہ موٹر ویز کو عوام کی حفاظت اور محفوظ سفر یقینی بنانے کے لیے بند ہیں۔ شہری غیر ضروری سفر سے گریز کریں اور دوران سفر فوگ لائٹس کا استعمال کریں۔

سی ٹی او ڈاکٹر اسد ملہی نے کہا ہے کہ شہر لاہور کے داخلی و خارجی راستوں پر وارڈنز کی نفری میں اضافہ کر دیا گیا۔ انہوں نے شہریوں سے محتاط ڈرائیونگ کی اپیل اور سرکل افسران کو داخلی وخارجی راستوں کے دورے کی ہدایت کی ہے۔

اس کے علاوہ بلوچستان کے کئی علاقے شدید سردی کی لپیٹ میں ہیں اور وہاں درجہ حرارت منفی میں جا چکا ہے۔ سندھ کے میدانی علاقوں میں بھی سردی کی لہر جاری ہے۔