بیجنگ : پاکستان اور چین کی مشترکہ فضائی مشقیں شاہین 10 جاری ہے، پاک فضائیہ کے جے ٹین سی طیارے پہلی بار بیرون ملک مشقوں میں حصہ لے رہے ہیں۔
تفصیلات کے مطابق پاکستان اور چین کی مشترکہ فضائی مشقیں شاہین 10 جاری ہے ، چین اور پاکستان کی فضائی افواج کی مشترکہ تربیتی مشقیں چین میں ہورہی ہیں۔
چینی میڈیا کا کہنا ہے کہ مشترکہ مشقیں شاہین 10 چین کے شمال مغربی علاقوں میں منعقد کی جا رہی ہیں اور شاہین سیریز کی 10ویں مشترکہ تربیتی مشقوں کا انعقاد کیا جارہا ہے۔
فضائی دفاع، جوابی اقدامات، قبضے اور کنٹرول کے آپریشنز مشقوں میں شامل ہیں جبکہ مشترکہ تربیتی مشقوں میں جنگی منظرناموں کی تربیت پر توجہ دی جائے گی۔
چینی میڈیا کے مطابق مشقوں میں آپریشنل حکمت عمل سمیت تربیت اور کوآرڈی نیشن کو مزید بہتر بنایا جا سکے گا۔
مشقوں میں لڑاکا اور دیگر طیارے ، زمینی افواج ، میزائل دستے، ریڈار اور سگنل کور بھی شامل ہیں اور چینی بحری ہوابازی کے یونٹ بھی مشترکہ تربیتی مشق میں حصہ لے رہے ہیں۔
پاک فضائیہ کے جے 10سی طیارے پہلی بار بیرون ملک مشقوں میں حصہ لے رہے ہیں اور پاک فضائیہ کے ایف 16 اور جے ایف 17 تھنڈرز بھی مشقوں میں شامل ہیں ، اس کے ساتھ پی ایل اے ائیرفورس کے جے 10 سی، جے 11 اور جے 16 بھی مشقوں میں حصہ ہیں۔
ذرائع نے بتایا کہ بحری اہداف کو نشانہ بنانے سمیت زمین سے فضا میں اہداف کو نشانہ بنانے کی مشق بھی ہو گی۔
خیال رہے چینی اور پاکستانی فضائیہ نے "شاہین (ایگل)” مشترکہ تربیتی مشقوں کا آغاز مارچ 2011 میں کیا تھا۔
