دبئی: آئی سی سی ٹیسٹ رینکنگ میں پاکستان دوسرے نمبر پر پہنچ گیا، سری لنکا سے شکست کے بعد آسٹریلیا کی حکمرانی ختم، بھارت پہلے نمبر پر آگیا۔
سری لنکا نے آسٹریلیا کو پہلی پوزیشن سے محروم کردیا، ایشیا میں ٹیسٹ سیریز جیتنے کا آسٹریلین خواب پورا نہ ہوسکا،تین ٹیسٹ میچوں کی سیریز میں آسٹریلیا کو سری لنکا کے ہاتھوں کلین سوئپ شکست کے بعد پاکستان کے پاس تاریخ میں پہلی بار رینکنگ میں حکمرانی کا موقع ہے۔
ویسٹ انڈیز، بھارت کے خلاف آخری ٹیسٹ میچ جیت جائے یا ڈرا بھی کرلے تو پاکستان رینکنگ میں پہلی پوزیشن پر قبضہ جمالے گا، سری لنکا کے خلاف وائٹ واش شکست نے آسٹریلیا کو دو درجے تنزلی کے بعد پہلے سے تیسرے نمبر پرپہنچا دیا ہے۔
بھارت ایک سو بارہ پوائنٹس کےساتھ ٹاپ پرہے، پاکستان اور بھارت میں صرف ایک ریٹنگ پوائٹ کا فرق ہے، پاکستان ایک سو گیارہ پوائنٹس کے ساتھ دوسرے نمبر پر ہے جبکہ انگلینڈ بدستور چوتھے نمبر پر براجمان ہے، تاہم سری لنکا کی ٹیم ایک درجے بہتری کے بعد چھٹے نمبر پر آگئی۔
