پرل ایس بَک (Pearl Sydenstricker Buck) پہلی امریکی خاتون ہیں جنھیں 1938 میں ادب کا نوبیل انعام ملا۔ یہ انعام اُن کے ناول ‘گڈ ارتھ’ پر دیا گیا تھا۔
پرل بک امریکی تھیں، لیکن چینیوں سے ان کا ذہنی اور قلبی تعلق نہایت گہرا تھا۔ وہ چار ماہ کی تھیں جب والدین کے ساتھ چین چلی گئی تھیں اور پھر وہاں پرل بَک نے دو دہائیاں گزاریں۔ بچپن اور نوعمری کے ساتھ اپنے عنفوانِ شباب میں وہ عام چینی باشندوں سے میل جول کے ساتھ اُس سماج میں گھل مل گئی تھیں۔ یہی وجہ ہے کہ پرل بَک نے جب قلم تھاما تو چین کے ہر طبقاتِ عوام اور ان کی معاشرت کو اپنی تحریروں میں شامل کرتی چلی گئیں۔ اسی لیے وہ اپنی وفات تک امریکہ میں چینی تہذیب و ثقافت کی ایک ماہر کے طور پر بھی مشہور رہیں۔ ایک موقع پر پرل بَک نے کہا تھا “میں پیدائشی طور پر امریکی ہوں، لیکن کہانی کا میرا ابتدائی علم، کہانیاں سنانے اور لکھنے کا طریقہ بھی میں نے چین میں رہ کر سیکھا۔”
پرل بَک (Pearl Sydenstricker Buck) والد کے غصّے کے باوجود بچّوں کا ادب پڑھنے لگی تھیں، ناول اور کہانیوں میں ان کی دل چسپی وقت کے ساتھ بڑھتی گئی اور بعد میں چین ہی میں رہتے ہوئے انھوں نے فکشن رائٹر کی حیثیت سے اپنا سفر شروع کیا، پرل بَک نے اپنے مشاہدات اور تجربات کو اپنی تحریروں کا حصّہ بنایا۔ ناول نگار پرل بَک 1892ء میں امریکا میں پیدا ہوئی تھیں۔ ان کے والد عیسائیت کے پرچارک تھے اور اپنی شریکِ حیات کے ساتھ تبلیغی مشن پر چین میں مقیم تھے اور ولادت کا وقت قریب آیا تو یہ جوڑا امریکہ لوٹ آیا جہاں پرل بَک نے جنم لیا۔ والدین ننھّی پرل بَک کو لے کر دوبارہ چین چلے گئے۔
اردو زبان میں ناول دا گڈ ارتھ کا ترجمہ پیاری زمین کے نام سے ممتاز ادیب اور مترجم ڈاکٹر اختر حسین رائے پوری نے کیا تھا۔ یہ وہ ناول تھا جس پر نوبیل انعام حاصل کرنے سے چھے سال پہلے یعنی 1932ء پرل بَک کو پلٹزر پرائز دیا جا چکا تھا۔ 1937ء میں ان کے اس ناول پر فلم بھی بنائی گئی تھی جو آسکر کے لیے نام زد ہوئی اور اس بات سے اندازہ کیا جاسکتا ہے کہ اس ناول کو اُس کی اشاعت کے اوّلین برسوں ہی میں کس قدر توجہ اور پذیرائی ملی تھی۔ امریکہ میں دا گڈ ارتھ بیسٹ سیلر ناول بھی رہا۔ اس ناول کو نوبیل انعام دینے کی وجہ یہ تھی کہ مصنّفہ نے چین کی دیہاتی زندگی کی سچّی اور دل چسپ تصویر کشی کی اور یہ سوانحی شاہ کاروں پر مشتمل تھا۔
پرل بَک نے اپنے ناول میں ایک کسان وانگ لنگ کی زندگی کو دکھایا ہے جس نے انتہائی غربت جھیلی اور اسی دوران ہمّت کرکے اپنا کام شروع کیا۔ ایک باندی سے شادی کے بعد اس کی مستقل مزاجی اور محنت نے اس کی زمینوں کو وسعت دی۔ حالات موافق رہے اور وہ ایک کسان سے زمین دار بنتا گیا۔ ناول میں مصنفہ نے یہ بتایا ہے کہ انسان بالخصوص ایک کسان کا زمین کے ساتھ اٹوٹ رشتہ ہوتا ہے، وہ اسے کبھی ختم نہیں کر پاتا۔
اس ناول میں ایک تاریخی قحط کا ذکر بھی کیا گیا ہے جس کے بعد کسان اور اس کا خاندان بھوک کے ہاتھوں مجبور ہو کر اپنی زمین چھوڑ کر شہر میں آباد ہوتا ہے۔ وہ بھیک مانگ کر بھی گزارہ کرتے ہیں۔ پرل بَک نے نہایت خوب صورتی سے ناول کے مرکزی کردار کی زندگی کے اتار چڑھاؤ کو واضح کیا ہے۔ مصنّفہ نے انسانی فطرت، غربت اور اس کے بطن سے پھوٹنے والے مسائل، مال و دولت کی فراوانی کے نتیجے میں جنم لینے والی خرابیوں کے علاوہ سماجی نفسیات کے کئی پہلوؤں کو بھی بیان کیا ہے جو اس ناول کو اہم بناتا ہے۔
پرل ایس بَک کا پورا نام پرل سیڈنسٹریکر تھا، جن کی شادی 1917ء میں جان لوسنگ بَک نامی شخص سے ہوئی اور اسی نسبت سے وہ پرل سیڈنسٹریکر بَک ہو گئیں۔ انھیں پرل بَک کے نام سے پکارا گیا۔
پرل بَک نے چارلس ڈکنز کو شوق سے پڑھا۔ اور ساتھ ساتھ تعلیمی میدان میں بھی آگے رہیں۔ وہ 1911ء میں گریجویشن کرنے کے لیے امریکہ گئیں اور ورجینیا کی ایک جامعہ سے 1914ء میں سند یافتہ ہوئیں۔ اگرچہ تعلیم کا یہ مرحلہ طے کرنے کے بعد خود پرل بَک چین جاکر مشنری خدمات انجام دینے کا کوئی ارادہ نہیں رکھتی تھیں، لیکن اپنی والدہ کی بیماری کی وجہ سے انھیں چین لوٹنا پڑا۔ اس کے بعد ان کی شادی ہوگئی اور وہ انوہی صوبے کے ایک چھوٹے سے قصبے سوزہو میں منتقل ہو گئیں۔ اس علاقے کا ذکر انھوں نے “دا گڈ ارتھ” کے علاوہ اپنے ناول “سنز” میں بھی کیا ہے۔ چند سال بعد وہ مزید تعلیم کے حصول کی غرض سے امریکہ لوٹیں۔ انھوں نے 1924ء میں ماسٹرز کی ڈگری حاصل کی اور اس کے اگلے ہی برس چین چلی گئیں۔
یہ 1929ء کی بات ہے جب پرل بَک نے اپنے ایک ناول “ایسٹ ونڈ: ویسٹ ونڈ” کا مسودہ نیویارک میں پبلشر کو تھمایا تھا۔ اگلے سال ان کا یہ ناول شائع ہوگیا۔ اس کی کہانی بھی چین کے گرد گھومتی ہے۔ 1931ء وہ سال تھا جب پرل ایس بَک نے دا گڈ ارتھ کی اشاعت کے بعد عالمی سطح پر ادیبوں کی صف میں نام و مقام پا لیا۔ اس شناخت کے ساتھ وہ اہم اعزازات بھی اپنے نام کرنے میں کام یاب ہوئیں۔
1934ء میں پرل بَک نے نیویارک میں مشنری خدمات سے متعلق ایک بیان دیا اور پھر وہ اُس ملک کا دوبارہ رخ نہ کیا جس کی کہانیوں نے انھیں دنیا بھر میں پہچان دی تھی۔ 1935ء میں اپنے پہلے خاوند سے علیحدگی کے بعد پرل بَک نے رچرڈ والش سے دوسری شادی کی اور 1960ء میں رچرڈ کی وفات تک دونوں پینسلوینیا میں مقیم رہے۔
پرل ایس بَک کی کہانیوں میں تنوع نظر آتا ہے جو خواتین کے حقوق، ایشیائی ثقافتوں، ہجرت، مذہب اور تبلیغ کے ساتھ جنگ اور ایٹم بم جیسے موضوعات پر مشتمل ہے۔ 43 ناولوں کے علاوہ پرل بَک نے کئی کہانیاں اور غیر افسانوی ادب بھی تخلیق کیا اور ان کی درجنوں کتابیں شایع ہوئیں۔
نوبیل انعام یافتہ پرل بَک 1973ء میں اس دنیا سے رخصت ہوگئی تھیں۔
