The news is by your side.

Advertisement

امریکا میں فیس بک پر تبصرے نے مطلوب ملزم خاتون کو گرفتار کرا دیا

پنسلوانیا : امریکی ریاست پنسلوانیا میں پولیس کو مطلوب خاتون کا فیس بک پرطنزیہ تبصرہ اس کی گرفتاری میں معاون ثابت ہوا ہے۔

تفصیلات کے مطابق کلو جونز نامی خاتون جو حملے اور عدالت میں پیش نہ ہونے پر پولیس کو مطلوب تھیں، نے گرین کاﺅنٹی پولیس کی جانب سے اپنی گرفتاری کے لیے لگائی گئی پوسٹ پر طنزیہ تبصرہ کیا تھا۔

پنسلوانیا کی گرین کاﺅنٹی کے شیرف نے سماجی رابطے کی ویب سائٹ فیس بک پر اپنے آفیشل پیج پر مطلوب خاتون کی تصویر شیئر کی، تصویر کے کیپشن میں خاتون کا نام اور ان پر الزامات کی تفصیلات بھی دی گئیں تھی۔

غیر ملکی خبر رساں ادارے کا کہنا تھا کہ خاتون نے پوسٹ پر پولیس اہلکاروں پر طنزیہ تبصرہ کرتے ہوئے لکھا کہ ’آپ لوگ لے کر جانے کی خدمات ہی فراہم کرتے ہیں یا ڈلیوری سروسز بھی دیتے ہیں؟‘ تبصرہ کے ساتھ ہنسنے والی چار ایموجیز بھی بنائی گئی تھیں۔

امریکی میڈیا کے مطابق اس کمنٹ کے بعد دیگر سوشل میڈیا صارفین نے بھی پوسٹ پر تبصرے شروع کردیئے اور جونز ان کے ساتھ بحث میں الجھ گئیں، انہوں نے یہ دعویٰ کیا کہ وہ اس وقت ویسٹ ورجینیا کے مورگن ٹاﺅن میں واقع ایک ہسپتال میں ہیں۔

پولیس حکام نے رواں ہفتے خاتون کا سراغ لگایا اور انہیں حراست میں لیتے ہوئے پنسلوانیا میں حکام کے حوالے کردیا۔

مقامی خبررساں ادارے کا کہنا تھا کہ قانون نافذ کرنے والے ادارے نے خاتون کی گرفتاری کے اعلان کے لیے بھی فیس بک کا سہارا لیا اور لکھا کہ جیل میں انٹرنیٹ کی سہولت نہ ہونے کی وجہ سے جونز کو اب ہمارے کمنٹ سیکشن میں طنزیہ تبصرہ کرنے میں رکاوٹ کا سامنا ہے۔

Comments

comments

یہ بھی پڑھیں