کراچی: بلوچستان کے علاقے نانی مندر میں ایک فارسی تیندوا دیکھا گیا ہے۔
تفصیلات کے مطابق کئی دہائیوں بعد بلوچستان میں لسبیلہ کے علاقے نانی مندر میں فارسی تیندوا دیکھا گیا ہے، فارسی تیندوا بلوچستان کے تقریباً بڑے حصے بالخصوص ساحلی علاقوں میں ہوتا تھا۔
تکنیکی مشیر ڈبلیو ڈبلیو ایف پاکستان معظم خان کے مطابق فارسی تیندوا ہنگول نیشنل پارک کا رہائشی ہے، شکار اور خوراک کی کمی کی وجہ سے فارسی تیندوے کی آبادی کم ہو رہی ہے۔
واضح رہے کہ خلیج فارس کی مناسبت سے اسے فارسی تیندوا کہا جاتا ہے، 2016 سے اسے IUCN ریڈ لسٹ میں خطرے سے دوچار نوع کے طور پر درج کیا گیا ہے، کیوں اس کی بالغ آبادی کا تخمینہ 1000 سے کم ہے۔
فارسی تیندوے کی کھال خاکستری، ہلکی سی سرخی مائل ہوتی ہے، اس کے کولہوں کے پاس اور کمر پر بڑے گلاب نما پھول ہوتے ہیں، جب کہ کندھے اور ٹانگوں کے اوپری حصوں پر چھوٹے پھول ہوتے ہیں، سر اور گردن پر دھبے ہوتے ہیں۔ فارسی تیندوے مختلف رنگ کے ہوتے ہیں، ایران میں پیلے اور سیاہ دونوں رنگ کے تیندوے پائے جاتے ہیں۔
