پشاور: صوبہ خیبر پختونخواہ کے شہر پشاور میں نامعلوم افراد کی گاڑی پر فائرنگ کے نتیجے میں تین افراد جاں بحق ہوگئے۔
تفصیلات کےمطابق خیبرپختونخواہ کے دارالحکومت پشاور میں چارسدہ روڈ پر نامعلوم افراد کی گاڑی پر فائرنگ کےنتیجے میں تین افراد جان کی بازی ہار گئے۔
پولیس کے مطابق واقعہ چارسدہ روڈ پر تھانہ خزانہ کی حدود میں پیش آیا جہاں گھات لگائے ملزموں نے ایک گاڑی کو نشانہ بنایا۔فائرنگ کے نتیجے میں گاڑی میں سوار تین افراد موقع پر ہی دم توڑ گئے جبکہ حملہ آور فرار ہوگئے۔
حادثےکی اطلاع ملتے ہی پولیس کی بھاری نفری موقع پر پہنچ گئی اور لاشوں کو پوسٹ مارٹم کے لیے اسپتال منتقل کردیا گیا۔
پولیس حکام کا کہنا ہے کہ حملے میں جاں بحق ہونے والوں کی شناخت نہیں ہوسکی جبکہ گاڑی پر فائرنگ کی تحقیقات شروع کردی گئی۔
مزید پڑھیں: پشاور میں فائرنگ،پولیو افسر جاں بحق
یاد رہے کہ گزشتہ ہفتے خیبرپختونخوا کے دارالحکومت پشاور میں نامعلوم موٹر سائیکل سوار مسلح افراد نے فائرنگ کرکے پولیو افسر کو جاں بحق کردیا تھا۔
واضح رہےکہ کالعدم جماعت الحرار نے ڈاکٹر ذکاء اللہ پر حملے کی ذمہ داری قبول کی تھی۔گروپ کے ترجمان احسان اللہ احسان نے ایک جاری بیان میں خبردار کیا کہ وہ مزید حملے کریں گے۔
