کینیڈا کے شہر نیو فاؤنڈ لینڈ میں ایک خاتون نے پیزا میں پنیر کی مقدار کم ہونے پر پولیس کو کال کردی۔
پولیس کے مطابق خاتون نے پہلے مطلوبہ پیزا سینٹر پر فون کیا اور ان سے شکایت کی کہ اسے بھیجے جانے والے پیزا میں پنیر کی مقدار اتنی نہیں جتنی ان کے بروشر میں دکھائی گئی ہے۔
انتطامیہ کے مناسب جواب نہ دینے پر خاتون نے جھنجھلاہٹ میں 911 پر فون کردیا۔
کانسٹیبل جیف ہڈگن کے مطابق لوگ پولیس کو ایسے معاملوں کے لیے بھی فون کرتے ہیں جن کے لیے پولیس کچھ نہیں کر سکتی۔
انہوں نے بتایا، ’بعض لوگ ریڈیو پر چلنے والے پروگرامز سے بھی بور ہو کر پولیس کو فون کر دیتے ہیں۔ ان کا مطالبہ ہوتا ہے کہ ہم ریڈیو چینل کو ان کی مرضی کے پروگرام چلانے پر مجبور کریں۔ ہم سمجھ نہیں پاتے کہ یہ کالز کرنے والے کیا واقعی صحیح الدماغ لوگ ہوتے ہیں یا وہ ہمیں تفریح فراہم کرنے کے لیے ایسی کالز کرتے ہیں‘۔
واضح رہے کہ مغربی ممالک میں پولیس کو روزانہ ایسی بے شمار کالز موصول ہوتی ہیں جن کا پولیس سے کوئی تعلق نہیں ہوتا۔ ان میں سے کچھ کالز ایسی بھی ہوتی ہیں جن میں فون کرنے والا اپنے گھر کے باہر کتے، بلی یا کسی اور جانور کی آوازوں سے پریشان ہوتا ہے۔
