فلسطینیوں سے اظہار یکجہتی کرنے کے سلسلے میں نگراں وزیراعظم نے نئے سال کی تقریبات پر پابندی کا اعلان کردیا۔
تفصیلات کے مطابق نئے سال کے آغاز سے قبل نگراں وزیراعظم انوارالحق کاکڑ کا خصوصی پیغام میں کہنا تھا کہ فلسطینیوں پر ظلم و ستم کے پہاڑ توڑے جارہے ہیں۔ فلسطین کی صورتحال کے باعث پوری قوم رنج و غم کا شکار ہے۔
نگراں وزیراعظم نے کہا کہ تمام پاکستانی مظلوم فلسطینیوں کے ساتھ اظہار یکجہتی کریں۔ پاکستانیوں سے اپیل ہے نئے سال پر سادگی کو ملحوظ خاطر رکھیں۔
انوارالحق کاکڑ نے کہا کہ سرکاری سطح پر نئے سال سے متعلق کوئی تقریب نہیں ہوگی۔ تمام شہریوں سے گزارش ہے نئے سال کی آمد کو سادگی سے منایاجائے۔ اللہ سے دعاگو ہوں نئے سال کا سورج امن و آشتی کا پیغام لے کر طلوع ہو۔
وزیراعظم نے کہا کہ 7 اکتوبر سے اب تک 21 ہزار سے زائد فلسطینی شہید ہوچکے ہیں۔ شہید ہونے والوں میں بڑی تعداد بچوں کی ہے۔
انھوں نے کہا کہ مظلوم فلسطینیوں کی نسل کشی پر پاکستانی قوم اور امت مسلمہ رنج کے عالم میں ہے۔ فلسطین میں خونریزی روکنے کیلئے پاکستان عالمی سطح پرآواز بلند کرتا رہےگا،
نگراں وزیراعظم انوارالحق کاکڑ نے کہا کہ فلسطین کیلئے امدادی کھیپ کے سلسلے میں اردن اور مصر کے ساتھ رابطے میں ہیں۔
وزیراعظم نے کہا کہ فلسطین کیلئے 2 امدادی کھیپ بھجوائی جا چکی ہیں۔ فلسطین کیلئے تیسری امدادی کھیپ جلد بھجوائی جارہی ہے۔
