اسلام آباد : وزیراعظم عمران خان نے زلزلے کے باوجود اجلاس جاری رکھا، سیکورٹی حکام کی جانب سے درخواست کے باوجود بریفنگ روم سے باہر نہیں نکلے۔
تفصیلات کے مطابق وزیراعظم عمران خان کی صدارت میں پارٹی رہنماؤں کا اجلاس جاری تھا اس دوران زلزلے کے جھٹکے محسوس کیے گئے، اجلاس میں موجود پارٹی رہنما زلزلے کے باعث گھبرا کر اپنی نشستوں سے اٹھ گئے۔
صورتحال دیکھ کر وزیر اعظم کے سیکورٹی حکام نے انہیں میٹنگ روم سے باہر آنے کی درخواست کی جس پر وزیراعظم نے باہر جانے سے انکار کردیا، اجلاس جاری رکھا، وزیراعظم عمران خان کا کہنا تھا کہ جہاں جاؤں گا وہاں پر بھی زلزلہ ہی ہوگا۔
وزیراعظم کو بیٹھا دیکھ کر دیگر پارٹی رہنما بھی دوبارہ نشستوں پر براجمان ہوگئے، ذرائع کے مطابق اجلاس میں وزیراعظم نے معاشی اور توانائی سے متعلق معاملات پر پالیسی سے آگاہ کیا۔
اس موقع پر وزراء نے پارٹی رہنماؤں کو توانائی، گیس اور معاشی معاملات پر بریفنگ دی ا جلاس میں وزیراعظم کے دورہ سعودی عرب کے حوالے سے اس کے شیڈول اور امور پر بھی مشاورت کی گئی۔
