کراچی: شہر قائد کے باسیوں کا طویل انتظار ختم، وزیر اعظم عمران خان آج گرین لائن بس منصوبے کے ٹرائل آپریشن کا افتتاح کریں گے۔
تفصیلات کے مطابق وزیر اعظم عمران خان آج گرین لائن بس منصوبے کے ٹرائل آپریشن کا افتتاح کریں گے، سرجانی سے نمائش تک بیس کلومیٹر ٹریک پر اسی بسیں روزانہ تین لاکھ افراد کو سفر کی سہولت فراہم کریں گی۔
گرین لائن کا کم سےکم کرایہ15روپےمقرر کیا گیا ہے جبکہ پورےدن کےلیے100روپےکا کارڈ خریدنےکی سہولت فراہم کی گئی ہے،اس کے علاوہ خواتین اور معذور افراد کے لئے علیحدہ نشستیں مختص کی گئیں ہیں۔
رپورٹ کے مطابق سرجانی ٹاؤن سے چلنے والی گرین لائن بس فی الحال نمائش چورنگی تک چلائی جائے گی، جس کا کرایہ 15 روپے سے 55 روپے تک ہوگا۔
گذشتہ روز گورنر سندھ عمران اسماعیل اور وفاقی وزیر منصوبہ بندی اسد عمر نے گرین لائن بس پر سفر کیا، اس موقع پر انہوں نے مختلف اسٹیشنز کا دورہ کیا اور تیاریوں کا جائزہ لیا۔
واضح رہے کہ حال ہی میں کراچی گرین لائن بس کیلئے 80 بسیں منگوائی گئی تھی، جس کیلئے 200 ڈرائیوز بھی بھرتی کئے جاچکے، سرجانی ٹاؤن سے نمائش تک بس 22 اسٹیشنز پر رکے گی، ایئرکنڈیشنڈ بسوں میں موبائل چارجنگ کی سہولت بھی موجود ہوگی۔
