کوئٹہ: وزیر اعظم شہباز شریف نے صوبہ بلوچستان میں انفرااسٹرکچر کی بحالی میں مصروف مزدوروں کے لیے 50 لاکھ روپے کا اعلان کیا، انہوں نے کہا کہ متاثرہ سڑکوں کو جلد سے جلد بحال کیا جائے گا۔
تفصیلات کے مطابق وزیر اعظم شہباز شریف نے صوبہ بلوچستان کے ضلع کچھی کا دورہ کیا، وزیر اعظم نے سیلاب سے متاثرہ روڈ، ریلوے انفرااسٹرکچر کی بحالی اور سیلاب سے بہہ جانے والے پنجرا پل کی بحالی کے کام کا جائزہ لیا۔
انہوں نے بی بی نانی میں ریلوے پل کا بھی فضائی جائزہ لیا۔
وزیرِ اعظم شہباز شریف کو بلوچستان میں سیلاب سے تباہ ہوئی بی بی نانی پُل پر بریفنگ دی جا رہی ہے۔ https://t.co/SydEFvSpbo
— PML(N) (@pmln_org) September 4, 2022
وزیر اعظم کو امدادی کارروائیوں اور بحالی کے کاموں کے حوالے سے بریفنگ دی گئی۔ بریفنگ میں بتایا گیا کہ انفرا اسٹرکچر کی بحالی کا کام تیزی سے جاری ہے۔
وزیر اعظم کا کہنا تھا کہ ہم یہاں موجود تمام افراد کا شکریہ ادا کرتے ہیں، آپ لوگ بہت مشکل وقت میں کام کر رہے ہیں۔
وزیراعظم محمدشہبازشریف نے کہاہے کہ سیلاب سے ہونے والے بڑے پیمانے پر ملک بھر میں تباہی ہوئی ہے ۔ایسے موقع پر پوری قوم متحدہے ہم سب کومل کر اس چیلنج کا مقابلہ کرناہوگا۔ pic.twitter.com/obDQw4qqDq
— PML(N) (@pmln_org) September 4, 2022
انہوں نے کہا کہ سیلاب سے لاکھوں گھر تباہ ہوگئے، لوگوں کے مویشی سیلاب میں بہہ گئے، فصلیں تباہ ہوگئیں، انفرااسٹرکچر کی بحالی میں مصروف عملہ قوم کی عظیم خدمت کر رہا ہے۔
وزیر اعظم کا کہنا تھا کہ یہاں انفرااسٹرکچر کی بحالی میں مصروف مزدوروں کے لیے 50 لاکھ روپے کا اعلان کرتا ہوں، متاثرہ سڑکوں کو جلد از جلد بحال کیا جائے۔