اسلام آباد : صدرمملکت آصف علی زرداری اوروزیراعظم شہبازشریف نے یومِ دفاع وشہدا پر غازیوں اور شہدا کو خراج عقیدت پیش کرتے ہوئے کہا کہ یہ دن ملکی خود مختاری کے دفاع کی جانب غیرمتزلزل قومی عزم کی یاد دلاتا ہے۔
تفصیلات کے مطابق صدر مملکت آصف علی زرداری اوروزیراعظم شہبازشریف نےیومِ دفاع وشہداپر خصوصی پیغامات دیئے۔
صدر آصف زرداری نے اپنے پیغام میں کہا کہ مسلح افواج قومی خودمختاری،ملکی سالمیت کودرپیش چیلنجز سے نمٹنے کیلئے ہمہ وقت تیارہیں۔
آصف زرداری کا کہنا تھا کہ کشمیری عوام کی حالت زارکاازالہ کرکےہی خطےمیں دیرپاامن ممکن ہے۔۔ہم سب دہشت گردی کی لعنت کو ختم کرنےکیلئےسیکیورٹی فورسز کےساتھ ہیں،ادارے بھی دہشت گردی کو شکست دینےکیلئےپوری طرح تیار ہیں۔
وزیراعظم شہبازشریف نے اپنے پیغام میں کہا کہ پاکستان کی تاریخ میں 6ستمبرانتہائی اہمیت کا حامل ہے، یوم دفاع ہمارےدفاع اور استقلال کی علامت بن چکا ہے، ہماری افواج کاحوصلہ، فرض سے لگن ہی پاکستان کی سلامتی کی بنیاد ہے۔
شہباز شریف کا کہنا تھا کہ شہداکی قربانیوں کی بدولت ہم ایک آزاد،خودمختارمملکت میں زندگی گزاررہےہیں، حکومت تصادم کی بجائے مکالمے،ٹکراؤ کی بجائے تعاون پریقین رکھتی ہے۔
انھوں نے کہا کہ مسئلہ کشمیر کا حل نہ ہوناخطےمیں قیام امن،ترقی کی راہ میں بڑی رکاوٹ ہے، دہشت گردی کی جڑوں کوباہمی تعاون اور مشترکہ مفاد کی حکمت عملی سےاکھاڑنے کی ضرورت ہے۔
وزیراعظم نے شہدا ،غازیوں کے خاندانوں کو بھی سلام پیش کرے ہوئے کہا کہ آیئے!شہدا کےجذبے کواپنے دلوں میں بساکرپاکستان کا تحفظ اور تعمیر کریں۔
