اسلام آباد: صدر مملکت ڈاکٹر عارف علوی نے کہا ہے کہ غیر محفوظ خوراک کی وجہ سے روزانہ اوسطاً 16 لاکھ افراد کا بیمار ہونا تشویشناک امر ہے۔
صدر مملکت ڈاکٹر عارف علوی نے تحفظِ خوراک کے عالمی دن کے موقع پر جاری پیغام میں کہا کہ تحفظِ خوراک کا عالمی دن تحفظِ خوارک کے معیارات کی طرف توجہ دلانے کیلئے منایا جارہا ہے۔
صدر مملکت کا کہنا ہے کہ غیر محفوظ خوراک کی وجہ سے روزانہ اوسطاً 16 لاکھ افراد کا بیمار ہونا تشویشناک امر ہے، بیماریوں کی وجہ سے روزانہ 5 سال سے کم عمر کے اوسطاً 340 بچے موت کے منہ میں چلے جاتے ہیں۔
صدر مملکت ڈاکٹر عارف علوی نے کہا کہ معیاری خوراک کی فراہمی، مضرِ صحت خوراک سے متعلق خطرات کم کر کے لاکھوں جانیں بچا سکتے ہیں، صاف، محفوظ اور غذائیت سے بھر پور خوراک ہمیں فعال اور صحت مند زندگی گزارنے میں مدد دیتی ہے۔
انہوں نے کہا کہ غیر صحت بخش اور ملاوٹ شدہ خوراک صحت کے مختلف مسائل پیدا کرتی ہے، پاکستان میں تحفظِ خوراک کے معیارات پر عمل کرتے ہوئے فوڈ سیفٹی کو یقینی بنانا ہوگا۔
صدر مملکت ڈاکٹر عارف علوی نے مزید کہا کہ یہ ہم سب کی مشترکہ ذمہ داری ہے کہ خوراک کو احتیاط کے ساتھ استعمال کریں، قومی اور بین الاقوامی فوڈ سیفٹی معیارات کے مطابق تحفظِ خوراک کے تقاضوں پر عمل کرنا ہوگا۔
