وفاق کراچی کے مسائل حل کرنے کے لیے بھرپور کردار ادا کرے گا، عارف علوی arif alvi
The news is by your side.

Advertisement

وفاق کراچی کے مسائل حل کرنے کے لیے بھرپور کردار ادا کرے گا، عارف علوی

کراچی کو وسائل ملتے ہیں تو وہ پاکستان کی ترقی کا باعث بنتے ہیں، خالد مقبول صدیقی

کراچی: نامزد صدر اور پی ٹی آئی رہنما عارف علوی نے کہا ہے کہ ایم کیو ایم سے اتحاد کا مقصد کراچی کی بہتری کے لیے کام کرنا ہے، وفاق کراچی کے مسائل حل کرنے کے لیے بھرپور کردار ادا کرے گا۔

ان خیالات کا اظہار انہوں نے ایم کیو ایم کے رہنماؤں سے ملاقات کے بعد میڈیا سے گفتگو کرتے ہوئے کیا، پی ٹی آئی وفد میں عمران اسماعیل، فردوس شمیم نقوی، جمیل صدیقی ودیگر شامل تھے، ایم کیو ایم کی جانب سے خالد مقبول صدیقی، فیصل سبزواری، امین الحق ودیگر رہنما ملاقات میں شریک تھے۔

عارف علوی نے کہا کہ کراچی سمیت ملک بھر کے عوام ہماری طرف دیکھ رہے ہیں، کراچی کے مسائل کو کس طرح حل کرنا ہے اس پر ایم کیو ایم رہنماؤں سے گفتگو ہوئی، ایم کیو ایم کی قیادت کا مشکور ہوں انہوں نے اپنے موقف سے آگاہ کیا۔

نامزد صدر نے کہا کہ پی ٹی آئی، ایم کیو ایم ورکنگ ریلیشن شپ مزید مضبوط کرنا ہے، وزیراعظم نے پالیسی بیان میں کراچی کے مسائل کی نشاندہی کی ہے، وزیر اعظم نے ان مسائل کو حل کرنے کی ترجیحات کا کھل کر ذکر کیا ہے۔

پی ٹی آئی کو پہلے بھی مایوس نہیں کیا، آئندہ بھی نہیں کریں گے، خالد مقبول

ایم کیو ایم کے رہنما خالد مقبول صدیقی نے کہا ہے کہ کراچی کو وسائل ملتے ہیں تو وہ پاکستان کی ترقی کا باعث بنتے ہیں، پی ٹی آئی کو پہلے بھی مایوس نہیں کیا آئندہ بھی نہیں کریں گے، دو سیاسی جماعتیں مل کر چل رہی ہیں، وقت کے ساتھ مزید بہتری آئے گی۔

خالد مقبول صدیقی نے کہا کہ پی ٹی آئی اور ایم کیو ایم میں تعاون کا سفر شروع ہوا ہے، دونوں جماعتوں کے اتحاد کا مقصد عوام کی زندگی کو بہتر کرنا ہے، بہتر کراچی ہی بہتر پاکستان ہے اس کے لیے مل کر جدوجہد کریں گے۔

کنوینر ایم کیو ایم پاکستان نے کہا کہ ہمارا دل کہتا ہے کراچی کے دن بھی تبدیل ہوں گے، پی ٹی آئی سربراہ نے ہمیں حق دیا ہے کہ تحفظات سے آگاہ کریں، پی ٹی آئی نے تعاون کے لیے اتحاد کا معاہدہ کیا ہے مل کر مسائل حل کریں گے۔

ذرائع کے مطابق عارف علوی نے ایم کیو ایم سے صدارتی انتخاب میں حمایت کی درخواست کی، ایم کیو ایم کی جانب سے صدارتی انتخاب کے لیے پی ٹی آئی امیدوار کی حمایت کا امکان ہے، ایم کیو ایم کے پاس صدارتی انتخاب کے لیے 33 ووٹ ہیں۔

پی ٹی آئی وفد کی امیرجماعت اسلامی کراچی حافظ نعیم سے ملاقات

دوسری جانب پی ٹی آئی وفد کی امیر جماعت اسلامی حافظ نعیم الرحمان سے ملاقات ہوئی، عارف علوی نے کہا کہ پی ٹی آئی اور جماعت اسلامی کی دوستی پرانی ہے، ملاقات میں صدر کے لیے ووٹ دینے کی درخواست کی ہے۔

عارف علوی نے کہا کہ انتخابات پر جماعت اسلامی کے تحفظات اپنی جگہ ہیں، آئندہ انتخابات کے لیے الیکٹرانک ووٹنگ مشین کا استعمال ہوگا، جماعت اسلامی کے انتخابات سے متعلق تحفظات کو حل کریں گے۔

پی ٹی آئی رہنما نے کہا کہ کسی بھی ادارے کی نجکاری مسائل کا حل نہیں ہے، کراچی کے حالات پر پی ٹی آئی، جماعت اسلامی کا موقف ایک رہا ہے۔

حافظ نعیم الرحمان کا کہنا تھا کہ عارف علوی کو ووٹ دینے کا فیصلہ پارٹی مشاورت کے بعد کریں گے، کراچی کو بہت نظر انداز کیا گیا اب تعمیر، ترقی کا سفر شروع ہونا چاہئے، پی آئی اے، پاکستان اسٹیل، کے الیکٹرک پر توجہ دینے کی ضرورت ہے۔

انہوں نے کہا کہ تحریک انصاف کی کامیابی پر مبارکباد پیش کرتے ہیں، شہر قائد سے صدارتی امیدوار کی نامزدگی خوش آئند ہے۔

Comments

comments

یہ بھی پڑھیں