تحریک انصاف کے امیدوار عمر ایوب نے کہا ہے کہ پی ٹی آئی قومی اسمبلی میں وزارت عظمیٰ کا الیکشن لڑے گی اور جیتے گی۔
تفصیلات کے مطابق پی ٹی آئی کی جانب سے وزارتِ عظمیٰ کے لیے نامزد سینئر رہنما عمر ایوب نے کہا ہے کہ ہم نے عام انتخابات میں 180 نشستوں کے ساتھ کامیابی حاصل کی۔ قومی اسمبلی میں تحریک انصاف وزارت عظمیٰ کا الیکشن لڑے گی اور جیتے گی۔
عمر ایوب کا کہنا تھا کہ ہم اپنا مینڈیٹ چوری کرنے کی اجازت نہیں دینگے۔ بانی پی ٹی آئی کی جانب سے وزارت عظمیٰ کیلئے نامزد کرنے پر خوش ہوں۔
انھوں نے کہا کہ ہماری پہلی ترجیح بانی پی ٹی آئی و دیگر قائدین و ممبران کی فوری رہائی ہے۔ بانی پی ٹی آئی، پارٹی ممبران اور عوام کے اعتماد پر پورا اترنے کی کوشش کرونگا۔پی ٹی آئی بطور جماعت جمہوری اداروں کی مضبوطی کیلئے کام کریگی۔
عمر ایوب نے کہا کہ ملکی معیشت کو مثبت سمت کی طرف گامزن کریں گے۔ عوام کو فائدہ پہنچانے کے لیے اپنا اصلاحاتی پروگرام شروع کریں گے۔
