اسلام آباد: پاکستان تحریک انصاف (پی ٹی آئی) رہنما فواد چوہدری کا کہنا ہے کہ ملک میں اسٹیبلشمنٹ ایک حقیقت تھی لیکن اب عمران خان بھی ایک حقیقت ہے۔
اے آر وائی نیوز سے خصوصی گفتگو کرتے ہوئے سابق وزیر اطلاعات فواد چوہدری کا کہنا ہے کہ ’جو بھی یہ سمجھتا ہے کہ وہ عمران خان کو نظر انداز کرکے ملک کو آگے چلا سکتا ہے تو وہ ملک اور اپنا بہت نقصان کروائے گا۔
ڈبل گیم کے سوال پر فواد چوہدری نے کہا کہ ’ڈبل گیم ہو یا ٹرپل ہو اسمبلی تو توڑنی پڑے گی اس معاملے پر عمران خان سیریس ہیں اگر اسمبلی نہیں ٹوٹے گی تو پھر ہم اسمبلی میں نہیں ہوں گے۔
فواد چوہدری نے کہا کہ آرمی چیف جنرل سید عاصم منیر کی کمان سنبھالنے کے بعد سے فرق پڑا ہے نہ اب نامعلوم کالز آرہی ہیں اور نہ ہی عمران خان کا میڈیا پر بلیک آؤٹ کیا جارہا ہے۔
اس سے قبل میڈیا سے گفتگو کرتے ہوئے فواد چوہدری نے کہا تھا کہ ’مارچ اپریل انتخابات کے مہینے ہوں گے فوج سمیت تمام اداروں کو الیکشن کے لیے کردار ادا کرنا چاہیے سب اپنی ذمہ داری کو سمجھیں اور غلطیوں سے سیکھیں۔‘
ان کا کہنا تھا کہ گیارہ جنوری سے بہت پہلے اعتماد کا ووٹ لے لیں گے جبکہ ن لیگ کے کچھ اراکین اسمبلی کی سیٹ ایڈجسٹمنٹ بھی زیر غور ہے۔
سابق وزیر اطلاعات کا کہنا تھا کہ ’موجودہ دور حکومت میں مہنگائی بڑھ رہی ہے، نوکریاں ختم ہورہی ہیں، ملک میں دہشت گردی دوبارہ سر اٹھارہی ہے۔
واضح رہے کہ اس سے قبل وزیراعظم شہباز شریف نے عمران خان پر تنقید کرتے ہوئے کہا تھا کہ عمران نیازی نے پاکستان کی عزت کو خاک میں ملایا، چین کو اتنا ناراض کیا تھا سن کر آپ حیران پریشان ہوجائیں گے۔
پی ٹی آئی چیئرمین عمران خان نے وزیراعظم کے بیان پر ردعمل دیتے ہوئے کہا کہ ’ہماری سفارتی حکمت عملی بہترین تھی قوم کو منفی اثرات سے بچایا، ہم نے ملک سیاحت کا مرکز بنایا لیکن اب دوبارہ دہشت گردی کے شکنجے میں جارہا ہے۔
